الموضوع: أهل الخبرة فى السماعات الصوتية 5.1 !!

المشاركة الأصلية كتبت بواسطة dede_dodo88

أنا روحت توكيل أونكيو مخصوص عشان أجرب الموديل ده بس للأسف كان في علبته و مش معروض.. بس ده علبته لوحدها في حجم الغسالة الأوتوماتيك!! Lol

فجربت موديل ht-s3700 و معجبنيش أوي و الرسيفير بتاعه مفيهوش أي أمكانيات, و جربت تجميعة تانية بسماعات atmos و صوتها كان هايل مع تحفظي على أداء الـatmos اللي مش حاسه عامل فرق كبير..


تعرف لو في فرق بين 7700 و 7705 ؟ لأن اللي موجود على أمازون 7700 بس و واضح انهم نفس كل حاجة مع أختلاف رقم الموديل..
حاجة تانية, أيه نظام الصوت عندك في ملفات الأوديو, أغاني و موسيقى, هل هو بنفس الجودة بتاعة تشغيل الأفلام من حيث توزيع الصوت و الbass ؟, لأن قريت review بيقول أن الصوت مش بيبقى بنفس الجودة و الصب ووفر مش دقيق..

أنا بفكر جدياً أجيب ال7700 بس محتاج أتأكد الأول من الأداء عامل أزاي و هل في موديلات تانية كويسة تستحق التجربة لأن في أنواع تانية برضه أسمها كويس زي yamaha, pioneer, harman /kardon,,, و غيرهم..

ال 7700 ده موجه للسوق الامريكى وهو اخو ال 7705 بس يختلف فى الصب ووفر
ال 7700 الصب بتاعه اكبر شوية 10 انش والسماعة بتاعته 25 سنتى وبيطلع 120 وات
ال 7705 الصب 8 انش والسماعة 20 سنتى وبيطلع 80 وات
يعنى الصب فى الموديل 7700 اقوى شوية ومعرفش الكهربا بتاعته خارجية زى بتاعى ولا لأ
ومعرفش برده الموديل 7700 ده بيقبل الفولت بتاعنا ولا لأ عشان فى امريكا ليهم ترددات غيرنا ولو هتجيبوا اتأكد الاول من النقطة دى

الصوت فى ملفات الأوديو بيختلف على حسب جودة المقطع نفسه
وبتقدر تتحكم فى اعدادات الصوت والاوضاع كتير . وبتشوف انهى وضع يعجبك وتسييه وبتقدر تتحكم فى البيز والترييل وسماعة السنتر وكل حاجة
وكل ده بعمله من البرنامج على الموبايل

عايز اقولك ان السبوع بتاع ابنى كان يوم الجمعة والمسرح عمل احلى واجب
والصوت كان عالى جداا ونقى جدا والبيز ممتاز والصوت كان مسموع من الشارع وانا ساكن فى الخامس :)
ممكن فى المستقبل اجيب صب ووفر كبير واوصله عادى والريسيفر بيقبل 2 يشغلهم
ممكن احدث السماعات واجيب مثلا سماعة سنتر كبيرة واوصلها عادى

مش هتلاقى باكدج كاملة زى الاونكيو فى البايونير او الياماها او اى شركة تانية بنفس مستوى الاونكيو
لكن هتلاقى سماعات منفصلة وموديلات كتير من الريسيفر
وطبعا دول مافيش خلاف عليهم بس هتلاقى الميزانية خرمت على 15 الف واكتر

خدلك بصة على توكيل بايونير يمكن تلاقى عندهم سماعات جرب وشوف

مش عارف موضوع الكونفيرتر بصراحة
اسأل حد متخصص

هو هيقف عليك بكام لو هتجيبه من امازون

أنا عندى سماعات 5.1
ماركة ZoltrixiXound نوعها Hurricane
2000 وات اندونيسى
كنت شاريها من حوالى 12 سنة بسعر 275 جنيه تقريبا
وكان فيه موديلات اقل وموديلات اعلى
بس كان اغلى حاجه ايامها بحوالى 400 جنيه

كنت مشغلها على مازر بورد جيجا بات 945 بتدعم النظام الصوتى ده
طبعا ليها 3 وصلات بتاعت سماعات بيركبوا فى ال 3 فتحات اللى فى الكيسة من ورا
وكارت الصوت الخاص بالمازر بورد بيحس بيهم ويتعرف على السماعات والصب ووفر
وبتوزع السماعات فى الغرفة يبقى فيه يمين وشمال وفى الوسط وورا يمين وشمال وليها ارجل بتركب للسماعات علشان تحطها على الارض ويبقى توزيع الصوت مثالى ومجسم
وبتكون ممتازة جدا فى الافلام ذات الجودة العالية والالعاب بتحس انك فى وسط الحدث

بس يعيبها ان صوتها مزعج
وصلات واسلاك كتيره متوزعه فى الغرفة وبتسبب ازعاج عند محاولة تحريك اى شيئ فى الغرفة أو تنظيفها ولو فيه اطفال كل سنة وانت طيب هتلاقى السماعات بتقع وبتتكسر
البوردة عندى اتحرقت وجبت لاب توب طبعا اللاب توب مفيهوش كارت صوت بـ 3 مخارج مش عارف اشغلها عليه يادوب عامل وصله واحده وشغال بسماعتين فقط وباقى القطع كده ملهاش لازمة مش عارف بقى ياترى فيه كارت صوت USB ممكن يركب على اللاب توب لتشغيلها ولا ايه

حتى الاجهزة الاوريجنال استعمال الخارج اللى مغرقة السوق اليومين دول بيكون فيها فتحتين لكارت الصوت فقط ومش بتدعم النظام السمعى ده وديه حلها انك تشترى كارت صوت مخصوص

نصيحة هاتلك صب ووفر 3 قطع احسن