اخيرا غيرت العفشه في الشارك

**mimohsen** · 29-10-2013 08:44 PM

معايا شارك 2008 كنت شاريها زيرو ماشيه دلوقت 169.000 كم ... مغيرتش حاجه في العفشه الا المساعدين على 150.000 كم وبقالي فتره العربيه بتخبط في المطبات وكانه فرح بطريقه مزعجه وخصوصا المدقات او الشوارع المكسره على خفيف

المهم رحت لعفشجي قالي علبة الدريكسيون وجلب مقصات والناس قالولي بلاش تصلح علبة الدريكسيون علشان هاتبوظ تاني على طول ...

طنشت وروحت لمركز صيانه في المعادي كشف وقالي الاول نغير البارات وطقم تيشات (صلحولي الاسم لو غلط) وجلب مقصات وطلعنا جربنا الخبط والرزع قل جدا بس لسه مش تمام فغيرنا الميزانين (شدادات) وعند الخراط عمل جلب للمسامير اللي في الجزء اللي بيمسك التيل عشان كانوا بيخبطوا (اعذروني على الاسماء لاني مش بفهم في الليله دي) ... طلعنا جربنا الدنيا بقت تمام بنسبة 90% ... انا اتبسطت بس المهندس لا ... قالي حاجه واحده نعملها اي وقت وهي خاصه بفك وتركيب المساعدين وعمل خراطيم وبصراحه ما فهمتش قلتله بعدين

قطع الغيار كلها اصلي والموضوع اتكلف 3000 جنيه ... دفعت بس بيني وبين نفسي قولت اتضحك عليا ولا ايه ... كلمت صحبي عنده محل قطاع غيار وقلتله على الحاجات اللي اتغيرت وكلها اصلي من نفسه قالي يبقى دفعت 3000 جنيه ... ارتحت ودلوقت حاسس اني راكب عربيه جديده
.
.
اسف على الاطاله

**lanos2004** · 29-10-2013 08:56 PM

مبروك على الصيانه ونقل التجربه

**mohammed dodda** · 29-10-2013 09:59 PM

شكرا على الافادة والعفشة روح الثبات فى العربية وغلطتها صعبة

**M_Marwan** · 29-10-2013 11:01 PM

صلحتها فين ؟ فى المعادى ؟؟

**Ahmed Amin** · 29-10-2013 11:41 PM

مبروك علي الصيانة, وأكيد هتحس إن العربية غير بعد ما تجربها تاني بعد الشغل دا,,

وفعلاً علبة الدركيسون لو أتعملها جلب ممكن متتظبطش وهتبوظ تاني,,
والتكلفة معقولة لو مغير كل حاجة أصلي لأن دا الرينج بتاعها,,