كنت عايز اعرف البيجو 205 عربية اعتمادية وقطع غيارها متوفرة ولا اصرف نظر عنها

**msaeid** · 23-11-2013 03:17 PM

المشاركة الأصلية كتبت بواسطة aw2100

تحياتى !!

صديقي aw2100 أشكرك على المشاركه و إسداء النصح، بمنتهي الصدق أنا برضه كنت بفكر جدياً إني أمسك مشاكل العفشه كلها شهر ديسمبر ده و أشتغل عليها لحد ما أحلها كلها بإذن الله تعالي و ترجيحك لإني أجيب طقم المساعدين و أقضي على المشاكل العفشه أولاً حفاظاً على الشاسيه شجعني على الرغم من إنها قطمة وسط في المرتب بتاع الشهر اللي جاي بس أنا متأكد إنها هتريحني بعدين إن شاء الله.

وبالنسبه لزيت الفتيس بتاع المكنه النايمه الـ 1100 cc بتاعت العربيه دي بيبقه هو وزيت الموتور واحد مبيختلفوش عن بعض حتي هتلاقي طبة زيت الموتور هي نفسها طبة زيت الفتيس مش زي بقية العربيات للفتيس طبه و للموتور طبه مختلفه

لذلك جربت الزيت المتعدد أول ما اشتريت العربيه دي منفعش معايا و كانت العربيه دايماً صوتها عالي و كان معدل فقده كبير مع التسريب وده اللي إضطرني لأني أقرأ المانيوال بتاع العربيه دي لاقيتهم كاتبين إنها بتاخد زيت متعدد 10W/40 و 15W/40 و المناسب لها من الأحادي هو ال SG-CD و بالصدفه لاقيت الدرجه دي مكتوبه على جركن زيت من زيوت بنزينة وطنيه و أشتريته و غيرت الزيت و الفلتر و بفضل الله لزوجته عاليه و معدل الفقد بتاعه معقول جداً بالنسبه للتسريب اللي في العربيه من تحت وصوت الموتور بفضل الله أصبح هادئ ومن يوم تغيير الزيت و الغيارات أصبحت معقوله أكتر في تعشيقها مع الأخذ في الإعتبار مسايسة و زق الأول و التاني و التالت و زعيق المارشدير نسيت أكتب كمان حاجه إن دواسة الدبرياج عندي عاليه بالفعل وبجيب آخرها لحد الأرض قبل تعشيق أي غيار لكن أنا بسمع رزعه بصوت في العربيه لما بضغط على الدبرياج مع الغيار الأول و التاني ولحد النهارده مكشفتش على الرزعه دي ولا طلعت بها على اي ميكانيكي و غالباً هأجل مسألة الدبرياج و الغيارات لحد الشهر اللي بعد الجاي.

ولك مني جزيل الشكر مرة أخري على مشاركتك

**msaeid** · 23-11-2013 03:33 PM

دي صورة الموتور من تحت و عند رقم تلاته المتعلم عليه بدائره حمراء هتلاقي مكتوب جنبها طبة زيت الموتور و الفتيس مع بعض و ده اللي قصدت به إن زيت الفتيس هو نفس زيت الموتور

**iBiZa** · 23-11-2013 06:56 PM

المشاركة الأصلية كتبت بواسطة msaeid

لكن أنا بسمع رزعه بصوت في العربيه لما بضغط على الدبرياج مع الغيار الأول و التاني ولحد النهارده مكشفتش على الرزعه دي ولا طلعت بها على اي ميكانيكي و غالباً هأجل مسألة الدبرياج و الغيارات لحد الشهر اللي بعد الجاي.

اكشف على القواعد.

**msaeid** · 24-11-2013 12:10 PM

المشاركة الأصلية كتبت بواسطة iBiZa

اكشف على القواعد.

أشكرك أولاً iBiZa على إهتمامك و تفكيرك معايا، طيب لو هي المشكله عندي في القواعد هل تحب ترشح حد يكون بيتاجر في قطع غيار العربيه دي وتكون متوفره عنده القواعد وهل القواعد الإستيراد تكون جيده ومناسبه ولا أدور على الجديد لحد ما أجيبه مهما كانت تكلفته؟

عموماً برضه أنا هروح للميكانيكي و هكشف على القواعد زي ما إنت قلت ولو ظهر فيها مشاكل هشوف تكلفتها هتكون في حدود كام كلها على بعضها "قطع الغيار+المصنعيه"و هشوف إن كنت هقدر أعملها مع العفشه في ديسمبر ده ولا هأجلها لشهر يناير السنه الجديده

**HOSSAM99** · 24-11-2013 04:41 PM

مع إن الواحد الحمد لله ركب موديلات كتير من بيجو كلها حديثة و فخمة إلا إني بدور علي 205 gti تكون حالة نادرة ستوك .... نفسي في العربيه دي جداً

**iBiZa** · 25-11-2013 03:26 AM

المشاركة الأصلية كتبت بواسطة msaeid

أشكرك أولاً ibiza على إهتمامك و تفكيرك معايا،

يا ياشا تحت امرك.

المشاركة الأصلية كتبت بواسطة msaeid

طيب لو هي المشكله عندي في القواعد هل تحب ترشح حد يكون بيتاجر في قطع غيار العربيه دي وتكون متوفره عنده القواعد وهل القواعد الإستيراد تكون جيده ومناسبه ولا أدور على الجديد لحد ما أجيبه مهما كانت تكلفته؟

معتقدش هتلاقى منها جديد استيراد اصلى, اغلب الظن لو لقيت هيبقى صينى ف فى الحالع ديه يبقى هاتها استيراد علاطول.

استيراد فيه كذا واحد فى الوكاله اشهرهم حميدو و ده متخصص 205. لو جديد يبقى التوفيقيه فا الاتنين مشوار واحد عشان جمب بعض بس المهم تتاكد الاول من الميكانيكى انها قواعد و انهى فيهم اللى محتاج يتغير.

بالنسبه للدبرياج فا على وصفك هو محتاج رجلاش و لو مظبطش هتحتاج طقم دبرياج.

**iBiZa** · 25-11-2013 03:29 AM

المشاركة الأصلية كتبت بواسطة hossam99

مع إن الواحد الحمد لله ركب موديلات كتير من بيجو كلها حديثة و فخمة إلا إني بدور علي 205 gti تكون حالة نادرة ستوك .... نفسي في العربيه دي جداً

غالبا مش هتلاقى حاجه نادره ستوك لان اغلبها مع شباب.

اخر واحده ستوك فبريكه كانت السوده مودبل 91 او 93 من كذا سنه و اتباعت على ما اذكر ب45.

**msaeid** · 25-11-2013 10:27 AM

المشاركة الأصلية كتبت بواسطة iBiZa

يا ياشا تحت امرك.

ربنا يسعدك

المشاركة الأصلية كتبت بواسطة iBiZa

معتقدش هتلاقى منها جديد استيراد اصلى, اغلب الظن لو لقيت هيبقى صينى ف فى الحالع ديه يبقى هاتها استيراد علاطول.

لو الجديد صيني يبقه غالباً هبقه ميال للإستيراد حتي لو نصف عمر لكنه بتاع بلاده ومتصنع بالمواصفه الصح

المشاركة الأصلية كتبت بواسطة iBiZa

استيراد فيه كذا واحد فى الوكاله اشهرهم حميدو و ده متخصص 205.

أشكرك على ترشيحك ده و إن شاء الله هيكون ده أول واحد هسأل عنده على حاجتها في الوكاله لما أنزلها بإذن الله و هقول برضه عملت إيه و الأسعار كانت عامله إزاي علشان برضه الإخوه اللي عندهم نفس العربيه لو عندهم أسئله شبه أسئلتي يلاقوا إجابتها في الموضوع ده وربنا يوقعنا في قطع غيار تعمر معانا إن شاء الله

المشاركة الأصلية كتبت بواسطة iBiZa

بالنسبه للدبرياج فا على وصفك هو محتاج رجلاش و لو مظبطش هتحتاج طقم دبرياج.

بالنسبه لطقم الدبرياج لسه سائل عليه الجديد بتاع الـ 205 من عند المسيري 650 جنيه و ملاقيتوش عند رضا عشماوي شارع دمشق ولا لاقيته عن بديع دسوقي التوفيقيه و هنزل برضه اشوفه في الوكاله و اتمني إني ألاقي حاجه حالتها كويسه و سعرها في المتناول

وبالنسبه للقواعد علشان أطمئن عليها وديتها إمبارح عند ميكانيكي فتح الكبوت ووقف يراقب الموتور وقال لي دوس على الفرامل و الدبرياج و العربيه دايره و إديها الأولاني و إرفع رجلك ببطئ شديد من على الدبرياج و مترفعهاش من على الفرامل إطلاقاً و نفذت اللي هو قاله و انا جوه العربيه وفضلت ارفع رجلي من على الدبرياج و انا مديها غيار و دايس فرامل لحد ما العربيه بطلت تماماً قال لي القواعد سليمه قولتله اشمعني قال لي المكنه متحركتش من مكانها قولتله طيب و مشيت