الموضوع: عاوز رأيكوه فيه قدامى كيا ايرانى < سابا> موديل 2006

انا اسف مشوفتش الموضوع الا دلوقتي (علي فكره انا مش متابع الموقع عامة فلو فيه استفسار عاجل ياريت تبعت علي الخاص او ايميل)

بص يا سيدي العربية ممكن تبان غريبة الاول لان شبكتها وفوانيسها متغيريين مع امكانية تركيب الفوانيس القديمة والشبكة القديمة بس طبعا الفوانيس الكريستال اللي نازلة مع الايراني اجمل
لاكن العربية هيا هيا البرايد الكوري ومتصنعة في نفس خط الانتاج الكوري بعد نقلة لايران سنة 99
ثانيا العربية اثبتت كفائة في الاسواق السورية وحققت المركز الاول في المبيعات وبعديها الهيونداي فيرنا بس السابا مبيعاتها كانت اكتر للتاكسي وانت عارف العربية اللي تشتغل تاكسي تبقي عربية اكل عيش

من حيث قطع الغيار فهي متوفرة في كل الاماكن وهي هي نفس قطع غيار الكيا القديمة ما عدا الشبكة والفوانيس الامامية فقط

العربية تختلف عن القديمة في النقاط التالية

1- نفس الوزن مع موتور 1300 سي سي بعزم 100 علي 2800 وقدرة حصانية 62 حصان وده طبعا مخلي سحبها حلو جدا وادائها حلو جدا مع الحمولة علي عكس الكوري
بالاضافة لسلاسة الاداء علي السرعات البطيئة لدرجة ان كفاية تدي العربية الغيار الاول او التاني وهي هتمشي باستمرار حتي لو الطريق مكسر

2- الكوري (معايا واحدة عصفورة مو 97 اول يد برضوا) هتعافر معاها عشان تجيب 140 الايراني سهل توصل بيها ل 160 واقصي سرعة ليها 180

3- الايراني اعلي من الكوري وده كويس عشان المطبات بس بالنسبة للسيدان ده هيفدك نسبة من توازن العربية علي السرعات العالية لاكن الهاتش باك لاء

4- الاسكسوارات هشة والخامات فقيرة جدا (جلد ، تابلوة ولاعة كاسيت )

6- البطارية الايراني اللي بتنزل معاها وحشة وانا غيرتها في التوكيل بواحدة كلوريد بضمان خارجي

7- الكاوتش بتاعها حلو بس اتخزن كتير فهتلاقية ناشف حبتين انصحك تمشي نفسك بيه سنة ولا اتنين وتبقي تغيرة

8- الجنط صغير 13 والكاوتش 165/65 بس ممكن تكبرة ل 165/70 R14 بس اوعي تعرض عشان هيحك في كرتيرة الرفرف واصلا الكاوتش عرضة كويس 165

9- الصاج ضعيف وده عيب متوارث من الكيا الاصلية بس السبب مش ضعف الصاج نفسة لاكن المشكلة ان الرفارف فيها بومبيهات كبيرة وده بيخلي تطبيقها سهل لاكن في المقابل الاكصدام من اقوي ما يكون في العربيات الحديثة ولو هتقارنة يبقي تقارنة باكصدام الادا انا خبطت بيه شاهين فوقع اكصدام الشاهين وعندي اتشرخت الشبكة كمان الابواب فيها بارات صلب عرضية

10- العفشة ناعمة جدا وهتحس بنعومتها اكتر لو غيرت الكاوتش بس ده ميزة وعيب خاصة لو هتاخد غرزة علي سرعة لازم تاخد بالك ان العفشة طرية وهتعوم العربية شوية

11- نصيحة لاي عربية تقفيل شرق اوسطي (عالم ثالث) اول ما تاخد العربية روح ربط العفشة وقواعد الموتور وكل حاجة بمعني الكلمة (يعني كل مسمار) وراجع الزوايا والترصيص واكشف علي البطارية وعلي خلوصات وارتفاعات دوسات الفرامل والدبرياج وكل الافايزات والخراطيم

مش عارف اقولك ايه تاني بس لو عندك استفسار كلمني ولو تحب تكشف علي العربية قولي وانا اجي معاك

(اخوك) وائل مجدى ، ابو نورا (نانا الزنانة)