لمبة الانذار اتحرقت

**HRH_Sameh** · 14-09-2008 01:56 PM

لمبة الانذار اتحرقت من فترة بسيطة
طبعا كلنا عارفين دورها المهم لضعاف النفوس
دلوقت انا من هواة عمل الحاجات البسيطة بنفسي
هل ممكن اشتري لمبة جديدة غيرها واركبها مكانها
والا ممكن يكون مش من اللمبة؟
طيب هي اسمها لما اسال عليها؟ وبكام ؟
وهل موجودة عند بتوع الاكسسوار والا محل كهربائي عادي
والا اكبّر دماغي واروح للكهربائي بتاعي؟

شكرا على الردود مقدما ورمضان كريم

**dr_abooody** · 14-09-2008 04:12 PM

لمبة الانذار دة بتكون دايود لونة احمر او ازرق و بتنور و تطفي
و لية دايود مش لمبة عادية لان الدايود بيحس بس بالكهربة و مش بيستهلك حاجة خالص لو سيبت العربية اسبوع مش هينيمها
و لو عايز تجيبها و تغيرها بنفسك دة حاجة سهلة و بتشتريها من اي واحد بتاع الكترونيات و ممكن تروح النخيلي اللي في وسط البلد هتلاقيها ب50 قرش الواحدة

بس على فكرة اللمبة دة صعب اوي تتحرق الا اذا عدى عليها كهربة عليا
انا بصراحة شايف انها ممكن تكون حاجة تانية مش من اللمبة انها محروقة روح للكهربائي احسن

انا على فكرة معنديش جهاز انذار بس عامل فكرة اللمبة دة تموية كدا اشتغالة يعني و كمان شكلها خطير و اي حد من صحابي يشوفها يقولى دة انذار و بردة ضعاف النفوس هيفكروا قبل ما يعملوا حاجة و مرة باظت مني و شلتها كدا مؤقتا و كنت حاطط mp4 في العربية راح اتسرق علطول و دة بيبين فايدة اللمبة الحمرا

**HRH_Sameh** · 15-09-2008 10:47 AM

شكرا ليك على ردك الجميل
بإذن الله هاشتري واحدة واغيرها لو اشتغلت كان بها
مش كده هاروح للكهربائي وبإذن الله اقولك اللي تم

**HRH_Sameh** · 26-11-2008 09:13 AM

انا دخت عليها في كل المحلات (عندنا في البلد) مالقيتهاش
المهم اخويا جابلي واحدة من الكهربائي اللي بيصلح عنده العربية
ووصلتها منوّرتش
طلع ان السلك بتاعها اللي راكب في الاتذار نفسه فرده منه مفصوله
يعنى ماكانتش محروقة فعلا
ووصلتها واشتغلت تمام
وشكرا للاهتمام