بداية..
السادة القائمين على المنتدى..
برجاء قراءة الموضوع بعناية واتخاذ ما ترونه مناسباً:
إما بإعتباري ضال السبيل و"مفتري" وحذف عضويتي،
أو الإختيار الثاني (..............) ولكم فيه مطلق الحرية..

أعتذر عن الإطالة فيما ستقرأونه.. حتى وإن كانت بغرض التعليق على تجربة "صيانة" فيستفيد منها الجميع، أو تحوى مشاركتي في مضمونها "تحذير" فيستفيد الجميع أيضاً (وأعتقد أنه مسلك التحذير معتمد بين الأعضاء)

بسم الله الرحمن الرحيم

أثرت من قبل إنني قد اشتريت سيارة تيجرا 97 .. وكنت انتويت أن أعيد تأسيسها من كافة الجوانب (أشدها)، وأن أنقل للسادة الأعضاء تجربتي في كل المراحل للإفادة العلم..

بدأت بعمل صيانة للعفشة والميكانيكا.. وحالياً مرحلة "السمكرة"..

لم أجد أفضل مما يمدح فيه العديد من أعضاء المنتدى من جانب، والقائمين عليه من جانب آخر.. وتوكلت على الله وذهبت إلى مركز "ماستر" المملوك للمهندس طناني..

بدأنا بالعفشة.. والحمدلله.. لم يتم تغيير "مسمار" واحد.. العفشة كانت الأصلية، وسليمة جداً جداً وحالتها ممتازة جداً جداً جداً.. لم تحتاج إلا "تربيط" فقط لا غير.. الحمدلله جداً جداً جداً..

عامية:

دخلنا بقى على الشغل اللي كانت خايف منه أوي.. "الميكانيكا"..
تم تغيير الزيوت وخلافه..
العربية دخلت على الجهاز.. (مش موجودة على الجهاز - مش مشكلة.. العربية نادرة - مش مهم)..
حالة الموتور.. والحساسات.. الحمدلله ممتازين جداً جداً.. (ليه: لأن العربية مرفوعة حوالي 7 سنين، وماشية 62 ألف كيلو بس.. - ده كلام حلو أوي أوي)

بس الدبرياج بيعمل صوت مش حلو..
ايه المشكلة...
غير البلية..
حاضر.. هتاخد وقت قد إيه ؟؟
ساعتين بالكتير..
اتفقنا.. اتفضل اشتغل..

قعدت من الساعة 12 الظهر لغاية الساعة 12.30 بالليل..

طب ليه كل ده..
مش عارفين نفك أو نربط الفتيس..
ولا يهمك انا عارف ان العربية ضيقة.. وبتحتاج جهد ووقت طويل (بس أكيد مش 12 ساعة)

المهم.. وده صلب الموضوع:

هنغير سير الكتينة بالمرة.. عشان اللي راكب فيها ده سير الفابرييكة وأكيد لازم يتغير حتى لو مش بايظ..
طيب .. اتفضل..

"الصنايعية" الموجودين في المركز مش عارفين يفكوا مسمار الكرنك لأنه عمره متفك قبل كده،، وفي نفس الوقت مش عاوزين يضغطوا عليه لأنهم مش عاوزين يبوظوه (ناس حريصة .. الحمدلله)

"المهندس" طناني.. فتح صدره وتصدى للموضوع ده بقوة (وده مش لأنه البرنجي.. إنما لأن الوقت أتأخر وعاوز يقفل..
وبيني وبين نفسي - على الرغم من اللي انا شايفه - والله بقول (الراجل ده الناس بتشكر فيه.. أنا المفروض مقلقش من حاجة)...

روحت أنا أجيب سير مكان اللي شالوه..
وأنا هناك (وانا عرفت اللي حصل بعد ما رجعت)
حاول يفك المسمار ... معرفش ... الباشا جاب شاكوش ودق على المسمار.. وسط ذهول من الصنايعية..
راح إيه اللي حصل ؟؟؟
المسمار فعلا فك ... بس باظ طبعاً ..

ركب السير.. بدون ما يشد الشدادات ... وعاوز يقفل ...
قولتله ايه اللي انت بتعمله ده ؟؟
قالي : خلاص بقفل الشغل..
طب والسير المرخي ده انا هعمل فيه إيه ؟؟
قالي: عادي ... مش مشكلة.. هو هيظبط لوحده..
كنت هتجنن بجد..

اتدخل صنايعي كبير في السن.. لما شافني بدأت اتجنن وشايف مستوى الشغل..
وراح مظبط "السير المرخي" ...
(وبالنسبة للصنايعية.. هما فاهمين كويس.. ومن كتر مهما فاهمين .. قاعدين يلسنوا ما بعض بكلام على المهندسين عديمي الخبرة الموجودين بما فيهم طبعهم صاحب المركز)

طيب دلوقتي عاوزين نربط المسمار..
مع كل دقة طناني دقها... انا قلبي كان بيقع بجد مش تهريج..
.... كنت بشوف قدامي المكان اللي حوالين المسمار بيبوظ، لانه ساند عليه مكان الدق ،، ولما اتكلم يقولي عادي عادي نبقى نغيره)

طيب يا بشمهندس انا هجيب مسمار تاني وتركبهولي مكان اللي باظ ده (ما بيدي حيلة)..
قالي: يا عم ولا تخاف من حاجة.. لما تغير سير مرة تانية.. بعد 40 ألف كده نبقى نغير المسمار..
انت متأكد..؟؟
طبعا يا استاذ ...

(انا مش شغلتي ميكانيكي .. ولا انا مهندس... انا خبرتي زي خبرة اي واحد او اقل.. )

ماشي ...
انا كده تمام ؟؟ العربية تمام ؟؟؟ البلية والسير والمسمار تمام يا بشمهندس؟؟؟
قالي كلوا تمام ومتقلقش من أي حاجة خالص...

قولت الحمدلله..

التجربة.. (الساعة 12.30 بالليل)

اركب العربية وامشي... لقيت:

1- مفيش دريكسيون (مش هتصدقوها ولا هتعرفوا تتخيلوها انا عارف)...
فعلا مفيش دريكسيون.. عبارة عن هواء... الطارة ملهاش اي علاقة بالعربية..

* روحت رجعتلو علطول ... وخليته يجرب.. قالي كلامك صح... واتفاجأ بالموضوع... وتحليله الجامد "العربية محتاجة ظبط زوايا" ... (طبعا انا كنت بدأت اتشعوز بجد )
طب بص على الاكس او بص على العفشة كلها ... مجرد تبص بس.. مفيش فايدة..
المهم يمين شمال في الكلام (وهو عشان عاوز يقفل) قولتله هظبط بكره ولو متظبطتش هجيلك وهيكون فيه مشكلة..

عاوز امشي بقى عاوز اروح..
لقيت المشكلة التانية:
2- مفيش دبرياج.. (سبحان الله.. برده... هو كلو مفيش كده ... غريب الموضوع ده)
كلمت مهندس عنده (اللي معايا رقمه).. قولتله اوعى تقفل ... انا على بعد شارعين من عندك ... مفيش دبرياج..

* المهندس البرنجي تصدى طبعا للموضوع..
بسأله عن السبب ... قالي حاجة ضحكتني اوي: سلك الدبرياج (مش مربوط)..
ليه يا بشمهندس ؟؟ هو انتوا مش غيرتوا البلية وركبتوا الفتيس... وظبطتوا الدبرياج... ازاي مش مربوط يعني ؟؟
واحد من الصنايعية تبرع بالإجابة وقال: وانا بظبط الدبرياج مربطتوش عشان مش لاقي الصامولة بتاعته إظاهر ضاعت ... وهي عاوزة صامولة 14 واحنا معندناش منها دي ...

بصراحة .. انا بقى كنت جبت آخري.. وفي نفس الوقت زي ما بيقولوا (مصلحتى عندهم.. الساعة جابت 1 بالليل ... ومش عارف اعمل ايه... انا مجبر اخليني وراهم)..

لفيت انا بنفسي المنطقة اللي فيها المركز عشان الاقي حد فاتح.. طبعا ملقتش... اتعطف عليا واحد على موتوسيكل كنت سألته على اي حد فاتح دلوقتي ... وخدني لمحل خردوات بتاعه وفتحه.. واداني صامولة.. الله أعلم بتاعت ايه عنده... وقولت الحمدلله..

رجعت الورشة واديت طناني الصامولة... المهم.. ربط السلك.. هو على الدبرياج على الآخر جدا... (قولت مش مشكلة انا عاوز امشي وخلاص تيجي زي ما تيجي)..

.... فعلا انا روحت اليوم ده وايدي على قلبي وبقول يا رب نجيني ... كلمت واحد صاحبي يمشي ورايا عشان لو لا قدر الله حصل حاجة ألاقي اللي يلحقني في الوقت ده.. وجالي فعلا وروحت على خير الحمدلله.. طبعا كنت ماشي بسرعة السلحفاة بسبب البحر اللي كنت راكب فيه.. وخوفي الشديد.. وكمان طريقي كله دائري..

.... تاني يوم روحت اظبط زوايا ... الراجل بيقولي انت عندك اكس مش مربوط اصلا يا استاذ... وشفتوا بعيني ... (لا تعليق في الجزء ده من الآخر)

.... حطيت لساني في بقى ... ومرديتش اكلم حد من المركز ... وقولت خلاص ... انا مش هروح هناك تاني والحمدلله على كل حال... عديت على ميكانيكي (بقرش) خليته يراجعلي على الدبرياج وظبطهولي والحمدلله ..

المشكلة التالتة والأخيرة..

العربية جابت صبابات !!!!!!

ليه ؟؟؟؟؟؟؟؟؟؟؟؟؟؟؟؟؟؟؟

لان مسمار الكرنك ريح في مكانه ... السير رخى جامد جدا .... الكاتينة نطت ...

تخيلوا ؟؟؟

طب انا دلوقتي اعمل ايه !!!!!!

للكلام كمالة طبعا .... سواء كان "حديث" أو "أفعال" .....

بس هكتفي بكلمة واحدة يمكن تدركوها بجد ... تدركوها أوي ....

"لا تعليق"

حسبي الله ونعم الوكيل