الموضوع: Terios 2x4ستاهل ولًا!!!!

هيا التيريوس 2*4 جر أمامي ولا دفع خلفي؟

أعتثد أنها دفع خلفى

Rontato
استقريتى على ال 2*4 و لا ال 4*4
علشان انا كمان محتار ما بينهم .

انا كنت رايحة احجز ال 2*4 بس ماما و اختى ماعجبهمش انها مافيهاش اغلب الكماليات و اقنعونى انى اقسط على مدة اطول و اجيب ال 4*4 فول ابشن، فتوكلت على الله لانى حسيت انى مرتاحة لل 4*4 اكتر خصوصاً انى عملت استخارة كتير. انا لسة ماستلمتش و كل شوية اراجع نفسى بس بادعى ربنا ييسر لى و اقدر اسدد على مدة اقل إن شاء الله.

المشاركة الأصلية كتبت بواسطة sab3aawy

بنظرة موضوعية انا ارشح ليكى الماتريكس

ليس لأن التيريوس وحشة، التيريوس عربية ممتازة وانا اصلا حاططها ضمن اختياراتى لسيارتى القادمة ، لكن نحسبها بالعقل

الماتريكس صالونها اوسع لأنها جر امامى(يوجد ارتباط وثيق بين هذا وذلك)، التكنولوجيا بتاعتها معروفة للجميع حاليا، عفشتها اريح لأنها جر امامى ومصممة لاستخدام المدينة ، ويوم ما هتزهقى منها هتبيعيها فى عشرة دقائق وهتجيلك فلوسك

الفروق بين الكورى واليابانى معادتش واسعة ، كما ان الماتريكس-وعن تجربة لسيارات كتير عاملة كيلومترات عالية-عربية معمرة، اما بالنسبة للتوكيل فهو زحمة ومبيصلحوش حاجة سواء هيوانداى او ديهاتسو، كل الفرق فى دايهاتسو انهم بيكلموا الزبون كويس ، لكن المحصلة واحدة، لكن تتميز الماتريكس ان اللى بيفهموا فيها كتير جدا وان قطع غيارها كتير جدا

ميزات التيريوس مش هتكون مهمة بالنسبة لك، هى هتكون مفيدة جدا لحد بيحب يركن فوق الأرصفة ويمشى فى طرق مكسرة ، يعنى مثلا حد بيسافر او عنده مزرعة او بيروح مواقع بناء، الخ، لكن مالهاش ميزة بالنسبة لاستخدام المدينة العادى

من الآخر الماتريكس سيارة سهلة وعملية، التيريوس سيارة بنيت لاغراض معينة مش هتكون ممتعة للى عايز سيارة للاستخدام العادى

انا مش مع سبعاوى خالص ، و خصوصا ان الماتركيس اسهمها فى الارض اليومين دول و محدش بيشكر فيها خالص.
تانى حاجة بالنسبة للبيع ، التريوس مفيهاش مشكلة خالص فى اعادة بيعها .
بالنسبة لمميزات التريوس بالنسبة للطرق اللى زى ما بيقول سبعاوى انها مفيدة للى عنده مزرعة او بيروح مواقع بناء ، مصر كلها مواقع بناء و حفر و مطبات و الصراحة انا انشالله هجيب التريوس علشان اسوق على راحتى و امشى فى اى مطبات من غير ما اخاف على العربية .
و الصراحة العربية اشيك بكتير من الماتريكس و كفاية انها 4*4 و يابانى .

شكراً للجميع، الحمد لله توكلت على الله و حجزت التريوس 4*4 بس لسة محتارة فى اللون اسود ولا فيرانى ولا فضى!!!! عندى لحد بكرة بليل عشان اقرر.
الموضوع طلع صعب اوى