وﻻزال مسلسل العذاب مستمر بين الصنى واوتو ايجبت ....

**dr_hassan1eg** · 03-11-2013 06:14 PM

السﻻم عليكم
بصراحة انا زهقت زهقت زهقت من نيسان وتوكيلاتها ... اووووووووف ... حاجة .....
النهاردة صيانة ال 20 الف للعربية النبو صنى.
حاجز من أسبوعين فى اوتوايجبت.
الصيانة اللى فاتت كانت فى السبع وكانت مية الغسيل بتدخل الصالون كلها! !!!!
وقالولى صلحناها ومع اول غسله كانت كل المياه جوة....
اتحملت عشان انا من بره القاهرة ومش فاضى وقلت اعملها في صيانة ال20 الف وغيرت السبع ورحت اوتو ايجبت. ..
اول كلمه قلتها للمهندس انا لى رجاء واحد.. الحاجة اللى تتعمل تتصلح بجد عشان من مش فاضى ومش هاجى غير الصيانة الجاية... حاضر عيونى..
سلمت العربية الساعة 10 صباحا ... هتستلمها يا فندك من 3 الى 3 ونص... وطبعا حتى لحظة كتابة السطور الساعة 6 واقف مستنى...
خير يا هندسة الميه منين.. قالى خرطوم كان مرحل عن مكانه واتصلح وده تكلفته 112 جنيه. . ليه يا عم هى مش فى الضمان؟ ﻻء هو كده حاضر دفعت..
التيل والفرامل بايظين وهنغيرهم على حساب التوكيل ... شكرا
بس هم مش موجودين وابقى عدى علينا بعدين !!!!
طاسة العجلة طارت منى ... تمنها كام؟؟؟ 350 جنيه .... حاضر ... بس هى مش موجودة عدى بعدين..
عﻻمة نيسان الحلفية اتسرقت ... 95 جنيه .. حاضر ... بس هى مش موجودة وعدى بعدين...
يا هندسة السوبتش بتاع باب السواق كان بيعلق.... حاضر .. احنا ظبطناه .. وانا بستلم لقيته باظ خالص الحمد لله... طيب هنغيرهولك فى الضمان. .. شكرا ... بس هو مش موجود وعدى بعدين؟؟؟؟
لحد هنا وعقلى طار
يا عم نور الصالون هيفضل والع .. ابقى اطفيه يا بيه من الزرار !!!!
يا عم السنتر مش هيقفل طول ما الكمبيوتر حاسس ان الباب مفتوح .... معلش ابقى إقفلها يدوى .....
هنا بقه ﻻ مؤاخذه كنت هقول كلمة وحشة...
احنا خلصنا شغلنا يا بيه وعدى بكرة...
يا عم انا من بعيد ومعطل نفسي ومش هينفع اجة تانى اﻻ كمان اربع شهور وانتوا لاهفين 926 جنيه فى الصيانه..
وانا اعملك ايه؟؟؟؟
ﻻء بقه انا مش ماشي ﻻنى مبلغ عن العطل ده من الصبح وانتوا قلتولى اتصلح... عالاقل رجعوه بيعلق زى الاول او افصلوه خالص..
على فكرة يا بيه وجودك فى منطقة الصيانة غلط... طيب قولى اعمل ايه؟؟ روح الاستراحة واستنى ساعة لحد ما نتصرف....
وادينى واقف منتظر ولسه عندة سفر 3 ساعات وشغل بعد ما اروح؟؟؟
حسبى الله ونعم الوكيل

**edodahab** · 03-11-2013 07:13 PM

توكيل معندوش حاجة
ايه المهزلة دى دنتا لو رحت الحرفيين هتلاقى الحاجات دى موجودة

**speed_magnum** · 03-11-2013 07:22 PM

يالهوي علي البرود
ايه الردود البارده والسماجه دي
انا بصراحه مش مستحمل
الله يكون في عونك

**Silent~Dream** · 03-11-2013 08:11 PM

جشع و طمع و استغلال بس هما مش عايزين يعملوا غير كده و حسبى الله و نعم الوكيل بيستحلوا الفلوس الى الناس تعبانه و شقيانه فيها و مفيش ضمير

**Al-Farooq** · 03-11-2013 09:21 PM

ايه الكلام دة! دة مهندس ولا حلاق بيحلق للعملاء!

**tareq mm** · 03-11-2013 09:51 PM

الكلام ده فى منتهى الخطورة ... نتمنى ان لا يكون هذا هو مستوى خدمة ما بعد البيع .... كده الواحد هيعيد نظر فى شراء النيو صنى ... نحن فى انتظار التقرير النهائى لصيانة العشرين الف .. ان شاء الله العربية تتظبط و تبقى ذى الفل ..

**dr_hassan1eg** · 03-11-2013 09:52 PM

الموضوع خلص.
والله هتضحكوااااا
المهندس بعد غياب ساعة رجع قالى مطلعش عيب الحساس ده طلع من الضفيرة
وابقى عديها علينا بعدين لانها هتاخد شغل 3 ساعات واحنا ده كله منتظرين عشانك وتعبنا
وعموما احتمال مع اى مطب تلقاها اصلحت. .... اه والله قال كده
وحتى لو متصلحتش اقعد اقفل بالريموت وافتح كذا مرة لحد ما تقفل معاك
واهى لو مقفلتش إقفلها مانيوال بالمفتاح...
والنتيجة ان العربية واقفة فى الشارع ﻻ عاوزة تقفل بالريموت وﻻ حتى بالمغتاح..
مفتوحة حﻻل على اى حرامى يخلصنى منها ومن وش وﻻد ال.....

**dr_hassan1eg** · 03-11-2013 10:16 PM

دى صورة الفاتورة عشان محدش يفتكر انى بتبلى عليهم...

وطبعا حاليا مقدرش اركب ولادى العربية لان اللوك بتاع الابواب مش شغال وده خطر عليهم
منهم لله وحسبى الله ونعم الوكيل