الموضوع: مشكلة مع موظفة كانت عندي

المشاركة الأصلية كتبت بواسطة sherifmt

مع احترامي اتاخرت لكن لحقت نفسك .... الشغل شغل ومتزعلش لو ظهر بعدين في الشغل كلام كان بيتقال عليك بيتهموك انك انت اللي كنت مقويها علشان كنت مديرها المباشر ومسؤول عنها طول مدة عملها..... خدها مني نصيحه يا أخي سواء كان موظف او موظفة من اول يوم شغل لازم حسب قوانين الشركة لازم مدير القسم يقعد في اجتماع مع كل موظف جديد يشرحلة الرؤيا و المهمة الخاصة بالشركة و قوانين الشركة ودورة في القسم وانا كمان بزود عليها حقنة من عندي عن اداب التعامل داخل القسم والالتزام بالترتيب والنظام والحضور والانصراف وحدود التعامل مع الزملاء عايز اقولك ان احيانا بعد الاجتماع ده في موظفين مبيرجعوش تاني..... تقدر تسميها تصفية بدري بدري لكن اللي بيكمل بيكون فعلا جاي يشتغل وبنمشي رسمي تإخير اكتر من ربع ساعة في ساعتها يمضي ورقة اسمها ديسكشن فورم واللي يغيب زيها مع الخصم ومن اول 90 يوم نراجع الملف واللي ملفه خفيف يستاهل وادائة مقبول يكمل ونفتح العقد بسنتين واللي ملفة تقيل ومفيش أداء يعني بيدلع يروح ......ممكن يكرهك لكن بيحترمك علشان ماشي صح وقت الشغل شغل مع تقدير اللي يستاهل ووقت الضحك مش عيب لكن بحدود.... لكن احسن من اللي يضحكلك ومستضعفك ومستني اللحظة اللي يبيعك فيها وانت فاكره ملاك او فاكر انك ملكش دعوة علشان مش انت اللي معينه...... ونصيحة كمدير اخدت قرار خلاص خلصت يتنفذ وخليك قد قرارك ..... علشان قراراتك هي خلاصة شغلك الموظفين اللي تحت منك بيترقبو رد فعلك علشان يقلدوها لو لزم الامر والمديرين اللي اعلي بيتراقبو رد فعلك علشان يقيموا ترقيتك الجاية ممكن تكون قريب ولا هتطول في مكانك ؟ .....واعرف انك كل يوم بتبني وبتأكد شخصيتك في شغلك عن طريق فريقك القوي اللي بيحترمك علشان بشخصيتك تقدر تفرض احترامك علي الكل لكن متقدرش تجبرهم يحبوك !!!!! ... اثبت وانسي اللي ميسدش في مكان ميستاهلوش علشان متضيعش حق حد يستاهل وافتكر انت نفسك مدير في مكانك علشان تشتغل وتشغل موظفينك مش علشان تراضيهم ويحبوك ولسة اللي جايلك طول ما انت مدير لازم تكون قدوة واتعود شغلك في المكتب وبس اوعي تشيلة معاك للبيت علشان انت بتقبض مرتب شغل 9 ساعات في اليوم بس والمفروض تعيش ال15 ساعة الباقية لنفسك ولأهلك....... متزعلش من كلامي انا بكلمك عن تجربة ونجاحها انا فخور بيه جداً .........تحياتي من مكة (:

متفق معاك في كل كلمة
وحازم جدًا مع الموظفين وحذر من أي تساهل إتجاه حد أو من حد
وممكن أعدي بعض الحجات اللي مش هتأثر على سير الشغل
في التأخير مثلًا لكن أهم حاجة يعمل شغله كويس
وأكتر إنسان بكره العشوائية في القرارات والتساهل مع الشخص المخطئ
لكن عمري مافصلت حد فحياتي
وهما عارفين ضعفها وقابلينه
بعد الواقعة دي كرهت الترقية ومش عايز أكون مسؤول عن موظفين تاني خلاص
أنا هكون مرتاح لو هشتغل شغلي وبس
لكن بفكر في حل مش عارف هل هيكون مناسب أو لاء
إني أعمل تقرير عنها لشركة تانية وأخليهم هما يتواصلوا معاها بدون ماكون أنا فالصورة وبدون ذكر لموضوع الفصل
لكن دا لو حد دقق ممكن يكون فيها مساءلة لإنها مش موظفة حاليًا
بالإضافة لإنها هتتحسب من مقاعد موظفين الشركة
فمش عارف أعمل كدا ولا إيه التصرف المناسب في الحالة دي