الموضوع: باركن العربية على ال N فى مشكلة ؟؟؟

ولا حاجة العربيتين هيقفوا
ده لو مجرد ترييح
لكن لو خبطه جامده العربيه ممكن تتزق سنه لقدام بس الجير بوكس مش بيتلكك يعنى
مش هيبوظ كده فى ساعتها :)

انا مرة كنت راكن عمودي على الرصيف وفي رصيف تاني من على شمالي ومن على يميني .... يعني مش ممكن أطلع إلا من مكان ما دخلت "من الخلف فقط"

رجعت لاقيت واحد شيروكي راكن ورايا عمودي برضه (وبصراحة دي كانت غلطتي انا لأني كان المفروض أركن على حرف الرصيف من بره لكن انا عندي ضمير ودخلت بيها لغاية جوة خالص) وكان حاطط الفيتيس على الـ P ومافيش أي حل اني أخرج من المكان ده إلا إذا الراجل ده خرج الأول

فضلت واقف مثلا بتاع ساعة بدور علية ومالقيتوش وطبعا مش ممكن أعرف أزق العربية بإيدي روحت مشغل عربيتي وقلت أزق عربيته بعربيتي بصراحة عربيته ماتحركتش من مكانها (كان معايا الـ 505 ساعتها) لغاية ما الإكسدام بتاعه اتكسر هوة والفوانيس بتاعته وبرضه العربية مارضتش تتحرك مكانها لدرجة اني قلت هوة الفتيس ده معمول من إيه

في الآخر طلعت من على الرصيف اللى قدامي ومشيت عليه ونزلت من الناحية التانية وكتبتله ورقة شتمته فيها وسيبتله رقم تلفوني ومشيت

وتاني يوم روحت لاقيت العربية لسة راكنة نفس الركنة تماما يعني ماتحركتش يعني هوة ركن ورايا كده وهوة عارف انه مش ماشي في وقتها خالص بصراحة ضميري استريح لأني كنت حاسس اني كسرتله عربيته بس ساعتها روحت رايح ماسح نمرتي من على الورقة اللى علقتهاله في المساحة ومشيت


على فكرة انا طول عمري باسيب أي عربية اتوماتيك على الـ N مش على P الا أذا كان الطريق نازل أو طالع وسواء على الـ P أو الـ N الموضوع ده مايفرقش خالص بالنسبة لموتور العربية وهية واقفة ولا الفتيس ولا بيقصر عمره ولا حاجة بس في بعض الدول الأجنبية القانون فيها يلزم السائق بترك السيارة على الوضع P فقط وهية واقفة عشان ماتتحركش بصورة غير مقصودة مما يتسبب في الضرر للآخرين
لكن من ناحية ان في أي تأثير على الموتور والفتيس في أي وضع من الوضعين فمافيش أي فرق بينهم نهائي

والوضع في مصر مايسمحش ان الواحد يسيب عربيته على الـ P خصوصا لو كان في مكان زحمة أو في وسط البلد للأسباب اللى اتقالت هنا سواء تشريفة أو حد معدي