الموضوع: مشاكل عندي في كورسا 2004

بص ياباشا
اولا: بالنسبة لموضوع المياه له اسباب كتير جدا واغلبها حصلت معايا وحقولهالك
1- اتاكد من غطاء قربة المياه ومدى صلاحيته عشان ممكن يكون بيسرب
2- اتاكد من الخرطوم اللى راكب فى كوعة المياه عشان ممكن يكون بيسرب لو الافيس مش ماسك عليه كويس
3-اتاكد من القربة بتاعة المياه نفسها عشان ممكن تكون بتسرب وحصلت معايا قبل كده وغيرتها
4- مكن برضه يكون التسريب سببه ان فيه طبه من طبب المياه بتسرب وحصلت معايا وبتغيرها طبعا وده بيحصل لما بيحصل تأكل فى الطبة نتيجة الاملاح الناتجة عن استخدام المياه العادية.
5- فيه حاجة مهمة اوى برضه وهى ان فى قطعة اسمها حنفية التكييف السخن او المياه السخنة ودى بتكون فى صدر العربية وحصلت عندى من فترة ولما بتبوظ بتجيب مياه وهنا يبقي قدامك حل من اتنين الاول انك بتلغى القطعة دى خالص وبتسد خراطيمها ودهش بيتلاتب عليه الغاء التكييف السخن واتحدى ان كان حد شغله قبل كده اصلا وده اللى انا عملته عشان ملقتهاش استيراد ولقيتها فى التوكيل ب 300 وكمان قلت اريح دماغى خالص واشيلها بدل ما تسرب تاتى والحل التانى انك تغيرها وانا شايف انها مش مستاهلة ريح دماغك احسن وكمان انا سمعت انها بتحسن التكييف عشان الحمل كله بيبقي عالبارد وبرضه عايز اقولك ملحوظة ممكن تلاقى تسريب من عند القطعة دى لكن مش بسببها ولكن بسبب الخراطيب اللى راكبه فيها فخلى اللى يبصلك عليها يركز فى الموضوع ده.
6- بيبقى فى خراطيم تانية فى العربية لكن معرفش الصراحة اسمائهم فخلى الميكانيكى يبصلك بصفة عامة عليهم كلهم وعلى شجرة المياه.
وبعد ما تطمن ان شاء الله وتعرف العيب منين وتصلحه ابقى روح لواحد بتاع ريداتير شاااطر وخليه يعملك دورة مياه حمرا ويفضل يكون نوعها ابرو وياخد لك الهواء الزيادة اللى فى المياه وده مهم جدا والكتالوج موصى بيه وخليه بالمرة يبصلك عالريداتير يبيقي انت كده اطمنت الحمد لله على كل حاجة خاصة بالمياه.
وعايز اقولك حاجة مهمة جدا خلى بالك من موضوع المياه ده وصلحه بسرعة لان العربية ممكن تسخن منك كذا مرة وتيجى جايبة جوان لا قدر الله وحصلت معايا لما اهملت موضوع المياه.

اما بالنسبة لموضوع ان العربية بتعمل صوت كلكس لما تيجى تقفلها ده ياريس بيكون بسبب ان العربية بيكون الزجاج بتعاها مش عارف يتقفل كويس بمعنى ان بيبقي فى كاوتش او جلد عالزجاج من بره فاحيانا بيكون مش معدول وتلاقيه داخل لجوه فحضرتك تقوم عدله باى حاجة او بمفتاح الشقة مثلا وهى ان شاء الله حتقفل ومش حتعمل الصوت ده واتاكد برضه ان مقبض الباب من بره مش معلق ولا حاجة لان ساعات ممكن يعلق يعنى يبقي على وضع الفتح فهنا برضه العربية تديك نفس الصوت
و بالنسة لموضع لمبة الصالون بصراحة مش حقدر افيدك فيها بس روح لكهربائى شاطر جدا جدا جدا اوعى تخلى واحد مش فاهم يلعبلك فيها او يحاول يخترع وانا برضه ححاول اسالك واقولك ان شاء الله

واخيرا موضع ان العربية مبترضاش تدور دى ياريت تشرحلنا الموضوع بالتفصيل الممل وتوضحلنا انك لما بتيجى تدورها بتسمع صوتها بس مش راضيه تدور ولا فاصلة خالص كأن البطارية نامت