الموضوع: تقرير استلام 301 مانوال

المشاركة الأصلية كتبت بواسطة abohend

ربنا يخليك يا باشا
و الله أنا كمان استفدت من مشاركات الأعضاء
و المنتدى ده هو السبب في أني قررت أغير و حجزت البيجو
بس نصيحة لله بلاش لعب فالضفيرة بره التوكيل عشان العربية متخرجش من الضمان
و عن تجربة مع البيجو 206 عمري مشتغلت فالضفيرة بره التوكيل و الموضوع اتحل
ما شاء الله كل كهربائية الإسكندرية تعبانين و اللي مبيفهموش (بيجمبره)
بالنسبة ebd سيبك من موقع الشركة لأن في أبشنز كتير بتتشال عشان الجمارك
النسخة المصرية بتبقى دايماً أفقر بكتير من مثيلتها فالخليج أو بلد المنشأ
ربنا يحفظهالك و يرزقك خيرها

تصحيح صغير بس للنقطة دي في كلامك,,
مفيش حاجة أسمها سيبك من موقع الشركة لأن فيه أوبشن بتتشال في الجمرك,,
الجمرك مش بيشيل أوبشن من العربية,, !!

العربية نازلة بمصر فيها abs+ebd في كل الفئات,
ومفيش بيجو في مصر فيها abs من غير ebd ولو فيه ياريت تقولي علي الموديلات لو عندك خلفية.. ؟!!
ال ebd أساساً subsystem لل abs,, يعني مش بينزلو من غير بعض يا أبو هند.

المشاركة الأصلية كتبت بواسطة abohend

بسم الله ما شاء الله
ألف ألف مليون مبروك

ربنا يباركلك فيها و يكفيك حسد كل ذي حسد و عين كل ذي عين
و يجعلها لك عوناً في طاعته

قلي بقى يا سيدي جبت الدواسات و بقية الكماليات منين؟؟
و أسعارها أخبارها ايه؟؟
و الدواسات بتاعتها و عليها اسم الموديل و علامة البيجو و لا لأ؟؟
و هل العربية فيها EBD و لا لأ...عشان الموضوع ده إختلفت فيه الأقاويل؟؟

و ايه اللي خلاك تجيب من القاهرة مش الأسكندرية..رغم أن كفر الشيخ أقرب للأسكندرية على ما أظن؟؟


و كفاية كده أسئلة عشان أكيد خنقتك

أسعار قطع الغيار الأصلي والدواسات,
http://www.nilemotors.net/Nile/378310-301.html
http://www.nilemotors.net/Nile/378310-301-2.html
http://www.nilemotors.net/Nile/387442-301.html
http://www.nilemotors.net/Nile/381727-301.html

والدواسات اللي جابها صاحب الموضوع ب 255 من كفر الشيخ أعتقد أنها كويسة لأن سعرها غالي في التوكيل,

وأكيد اللي بيجيب من القاهرة بيكون عشان حاجة من أتنين يا فرق سعر أقل,
يا بضاعة حاضرة وفترة أنتظار أقل.

المشاركة الأصلية كتبت بواسطة on1touch

الله يبارك فيك ياباشا والله الموضوع دا محيرني جدا ولازم حد يكون فهم العربيه دي اوي ينزلنا شرح في اقرب فرصه ياريت نعمل موضوع متابعه تلين ال 1000 ك لل 301 اول باول من غير اي فتي اللي فاهم يقول وبس واي اسئله محدش يحرج ونتابع مع بعض ان شاء الله ولو حد يشوفلنا مهندس الصيانه نكلمه ويتابعنا ع الموقع تبقي فكره احسن

المشاركة الأصلية كتبت بواسطة on1touch

الله يبارك فيكوا كلكوا يارب وربنا يرزق الجميع بيها وبالاحسن منها كمان يارب
بالنسبة للتقرير المصور بصراحه هيتعبني لاني مليش في المنتديات ومش بعرف ارفع الصور
انا شايف الاهم بس حد يتابعنا في التليين اول 1000 ك ويشرحلنا العربيه من جوه الكبوت ميه وزيوت وفلاتر وكل حاجه

حضرتك ممكن تعمل التقرير وتبقي تبعتي لي الصور وأنا أرفعهالك,


بالنسبة لفترة التليين عندك أول 500 ل 1000 كيلو تمشيهم بالعربية يكونو علي سرعة أقل من 90 أو 100 كحد أقصي,
متحرقش علي الغيارات بمعني رجليك تبقي هادية علي دواسة البنزين متعليش عدد لفات الموتور عن 3000 لفة في الدقيقة علي أي غيار,

وبعد كدا أفتح بالعربية وأمشي براحتك,, بس خد بالك طبعاً وفي التأني السلامة, :-)


عندك أول صيانة علي 2500 دي مجانية,,
يفضل تعملها في غمرة دا المركز الرئيسي,
بتروح بيكشفو علي العربية وعلي مستوي السوائل من زيت موتور وزيت باور وفرامل والمية,
وبيربطو عفشة وبيعملو أبديت للسوفت ويير بأخر أبديت نزل من يوم ما أشتريت العربية.
وبيسئلوك لو عندك ملحظوات أو شكاوي في خلال الفترة دي وبيعملو لك اللازم,

وبعد كدا أول صيانة فعلية علي 10,000 كيلو ودي تغير زيت وفلتر زيت بس,,
وأنت في صياناتك إن شاء الله من هنا لحد ال 30 ألف مش هتغير غير زيت وبس,
الزيت تكشف عليه كل أسبوع أو زي ما تحب, في الجديد عمتاً علي عكس القديم أغلبنا مش بيكشف عليه لأنه مش بيقل ولو حصل والزيت قل هتطلع لك رسايل تحذرك إن الزيت قل,

المية في القربة بتاعتها علي أيديك الشمال لما تفتح الكبوت,, تكون دايماً في المستوي ما بين min و max
ودي مش بتتزود غير بمية مقطرة, أو مية زيها من نفس النوع واللون,
والتغير لسه كمان 5 سنين,, يعني يديك ويدينا العمر,,

تغير زيت الباور والفرامل كل سنتين, بس أغلبنا بينسي يعمله خصوصاً لو مش مواظب مع التوكيل في الصيانات, لما تعدي السنتين أبقي غيره في التوكيل لأن العربية هتكون لسه في الضمان,,

وبس كدا,

مبروك البيجو 301 عربيه محترمه جدا