تجربة سيئة مع بريدجستون الايطالي :( ارجو المساعدة
ازيكوا يا شباب
انا رحت لعبده أمين في المعادي وكان ذوق بصراحة وبعتلي عامل خدني من المكان اللي انا فيه لحد المحل، لاقيت عنده بريدجستون ايطالي ب٥٥٠ وبريدجستون ياباني ب٦٥٠ جنيه
سألته ايه الفرق بينهم؟ قالي الاتنين زي بعض، قولت في تفسي اكيد ما بينصبش عليا لأنه مالوش مصلحة يقولي الايطالي زي الياباني وقولتله هاتلي ٤ ايطالي وركبهم ورصصهم وشحنه نيتروجين ودفعت ٢٢٠٠ جنيه
المشكلة بقي لما قلبت في الكاوتشات لاقيتها تراكشن بي مش ايه ولا دابل ايه، سألت العامل قالي البريدجستون بينزل بي مافيش منه ايه، انا صدقت وسكت، وصدقت بس عشان قريت هنا مش فاكر في اي موضوع ان مافيش فرق بين تراكشن ايه وبي، وكمان العامل بيقول اول مرة اشوف حد بيسأل عن التراكشن، الكل بيهتم بالسنة والنوع والدولة والسرعة وبس
وانا بقي في طريقي من المعادي لاكتوبر، حاسس ان الكاوتشات بقت بتتزحلق في الفرامل مع ان عندي ايه بي اس!!!!!! وجربت في مرة اضغط فرامل جامد قبل مطب لاقيت الكاوتشات فرملت واتزحلقت علي الطريق مع صوت الزحف الشهير بتاعت الكاوتشات المتكلبشة في الرصيف نتيجة الفرامل
بصراحة مضايق جدا ومش حاسس بالامان مع الفرامل دلوقتي، شايفين اعمل ايه؟
ارجعله واقوله يركبلي الياباني وادفعله ٤٠٠ ولا اعمل ايه؟؟؟؟؟؟
برجاء الافادة