الموضوع: حملة خلي سرعتك 100 او اقل ( ربنا يحفظنا جميعا ) من شر الحوادث

السلام عليكم ورحمه الله وبركاته
تحية طيبة لكل اعضاء هذا المنتدي

الموضوع اللي هتكلم فيه ده يا ريت كلنا نعمل بيه ويا رب تبقي حملة مننا ونعممها في مصر للحد من الحوادث المروعة اللي بنشوفها كل يوم ويروح فيها ضحايا او يطلع منها مصابين بعجز او حتي خساير في السيارات ودي اخف الخساير



الموضوع وما فيها ان السواقة ملهاش كبير وكلنا عارفين الكلام ده ولا ان عربيتك ثابته وصاجها قوي ( بردوا ملهاش اي علاقة ) لان في الاول والاخر ده قضاء ربنا ولازم ينفذ

بس الحكاية يا عمنا انك تسوق بسرعة معقولة ( انت لو مش خايف علي روحك ) خاف علي الناس اللي معاك في العربية ( ولو لوحدك فيها ) خاف علي اللي ماشيين في الشارع جايز فيهم حد تعرفه ولو حصل لاقدر الله حاجة ممكن تضيع فيها مش روحك انت بس ارواح كتير

بردوا بلاقي ناس غرز وافلام علي الطريق وماشي اكتر من 120 ( والله ما تفرق علي زراعي او صحراوي او ستين حارة حتي ) الغلطة بموته او عجر لاقدر الله
هتستفاد ايه من غرز وكلام من ده وحد يسخنك علي الطريق تشد معاه عشان تتباها بعربيتك انها طلعت من العربية الفلانية وعدت من العربية العلانية ( بس سيادتك لاقدر الله لو عملت حادثة ادعي انك تطلع من المستشفي بالف خير وسلامه ) يا جماعة الموضوع مش غرز وعدت وطلعت وثابته وصاج وكل ده فيه اخطاء واردة وفيه قضاء وقدر لازم ينفذ وفيه اخطاء الغير يعني لو ماشي 140 وطلع لك حاجة فجأه مش ممكن تروح فيها او تتسبب في اذي غيرك لانك ملحقتش تتصرف ما بالك بقي لو ماشي سرعة بسيطة مش ممكن تلم نفسك وتلحق تتصرف
عشان ما طولش عليكم عاوز اقول نبطل يا جماعة نبص للسواقة علي الطرق المصرية ( اللي كلنا عارفين انها جميلة طبعا ) انها شد وغرز وسرعة عالية واختبار للعربية واختبار لقدرتنا ملهاش اي علاقة عاوز تجري وتشد وعندك قدرة شوف سباقات الرالي والاتوكروس وادخل فيها دي بتكون مجهزة للكلام ده انما شوارعنا وطرقنا مش مجهزة خاصة اننا بلد زحمة والكثافة السكانية عالية
ارجوك ابدأ بنفسك خاف عليها وعلي غيرك وعلي مالك وامشي علي ادك ولو مستعجل يا اخي انزل بدري عن ميعادك عشان متجريش وتعرض حياتك او حياه غيرك للخطر متقولش انا معايا عربية ولا كلمة والله مش مقياس
ارجوك ابدأ بنفسك وعرف كل صحابك ونبههم متجريش بالعربية وامشي معقول والله ما عشاني عشانك انت وعشان عيالك واهلك
وطبعا كلنا شوفنا حادث انهاردة في الدقي والمصيبة انها جوة البلد مش علي الطريق الزراعي او الصحراوي منهم واحدة ماتت الله يرحمها وحوادث كتير اوي منهم اللي عايش بس عنده عجز ومنهم اللي فارق الحياه والكارثة اننا بقينا بنشوف سرعة عالية جوة البلد مش بس علي الطريق ربنا يلطف بينا
ارجوك انزل واركب عربيتك وتوكل الله في اي مكا عاوز تروحه بس متجريش والله هتوصل في الميعاد اللي ربنا رايده ليك لا اكثر ساعة ولا اقل نص ساعة كله بميعاد بس ناخد بالاسباب
انا مش بخوفك بالعكس انا خايف عليك لان كلنا اخوات ولازم نخاف علي بعض ومش لازم نعمل حادثة لاقدر الله عشان نبطل نجري
وشوف الصور دي يمكن اللي بيجري يراجع نفسه ويمشي بالمعقول وربنا يسترها علينا وعليكم

























بعد ده كله هتقدر تمشي 100 او اقل


ويا سلام لو تبقي



بس ارجوك بلاش الامبير يعدي الـ 100







ربنا يحفظنا جميعا من شر الحوادث ويجعل شعارنا في التأني السلامة

دومتم جميعا بالف خير وعفانا وعفاكم الله شر الطريق