بفكر في كليو وخايفة جدا

**mooonlight** · 10-11-2013 03:24 PM

السلام عليكوا :)

دي اول عربية اجيبها وانا بنت فا مش هعرف الف كل يومين على ميكانيكي و بجد هحوت فيها كل اللي معايا من 45000-48000

انا بفكر اشتري كليو اوتوماتيك 2005 - 2006 فهل الاوتوماتيك كويس ؟

محتاجة اعرف من الاعضاء هل هي سيارة كويسة ولا لأ و كمان انا كدة هاجيبها مستعملة حوالي 7 سنين و لسة هتعود معايا كتير 5 سنين مثلا فهل هي هتستحمل ولا لأ

هل موديل 2005-2006 كدة يبقى بقالوا كتير و هيفتح كل شوية تصليح؟

المبلغ بتاعي يجيب عربية حالتها كويسة جدا ولا لأ واخد بالي من ايه فيها و اكشفها عند مين وقت الشراء

شكرا جدا وجزاكم الله خيرا ..

**shawkylotfy** · 10-11-2013 03:58 PM

نصيحة بلاش الاتوماتيك فى الفرنساوى ونصيحة خليكى فى عربية قطع غيارها رخيصة ومدوخكيش لو حصل حاجة ادام هتحطى كل الى معاكى فيها خليكى فى لانوس ولو مصممة على الرينو يبقى خليكى فى المانيوال

**amr011111** · 10-11-2013 04:03 PM

طالما مستعمله يبقى هاتى عربيه محفوظه ومنتشره جدا ( قدامك فيرنا ولانوس )
لان مشاكلها اتحفظت وقطع غيارها موجوده بكثره وبالتالى هتكون رخيصه

لو عاوزه الاحسن لو تقدرى تدفعى مقدمه وتجيبى عربيه زيرو يبقى افضل

**abasabnfernas** · 10-11-2013 04:16 PM

أنا عندى رينو كليو 2002 و بصراحة عربية جميلة و قطع غيارها متوفرة و مش غالية قوى و فى منها الأصلى و المستعمل و الصينى و أيضا ميكانيكة الرينو بقو كتير و فاهمين شغلهم,عيبها الوحيد بالنسبة لى هو صاجها الضعيف غير كدة كلو تمام و اشجع الرينو

**benmatar** · 10-11-2013 05:08 PM

رينو كليو عربية رائعة كان معايا موديلين منها، ومن سنتين اشتريت لأخويا واحدة 2007 لما اتخرج وكان متخوف منها... العربية دي محترمة بس بلاش الأوتوماتيك منها!!
كان معايا 2001 موتور 1400 كاملة (الفرنساوي) ودي كانت جبارة، واشتراها مقاول وفضلت على اتصال بيه عاشت معاه 4 سنين بيقولي كان بيعمل بيها مغامرات ولما باعها اشترى ميجان، والتانية كانت 2004 موتور 1200 وبرضه عربية محترمة وموفرة.
بصفة عامة لو رينو كليو حالة كويسة وسليمة تبقى احسن من ماركات تانية كتير (المهم انتقاء حالة وكشف وفحص دقيق).
بالنسبة لقطع الغيار الغالية فدي إشاعة، لأن مفيش فيها حاجة غالية وحاجتها متوافرة وبتعمر (سواء القطع التركي او الفرنساوي او الاسباني او غيره)
العربية دي ثابتة في الجري والمنحنيات والأمان فيها عالي وموتورها قوي واستهلاكه من البنزين رائع وتكيفها كويس (مش وحش ومش تلاجة بس كويس في الصيف والحر لو الموتور مظبوط والحرارة سليمة)
شنطتها كبيرة، كنبتها مش كبيرة، عالية على المطبات، موتورها ناعم، عفشتها مش ناعمة ومش ناشفة بس تستحمل، معدل التسارع كويس، والأحسن مداومة الصيانات عند فني متخصص رينو حتى لو هنغير سيور وفلاتر وبكده هتبقى جديدة علطول وعن تجربة، بالنسبة لوجهة نظري المتواضعة الموتور 1200- 16 صباب احسن من 1400 كقطع غيار وأداء حسب خبرتي المتواضعة.
اكسسوارها سعره معقول وقطع الغيار الجوهرية مش غالية والاستيراد متوفر، الموتور كله على بعضه استيراد 3500-3800 كامل حسب آخر معلوماتي، اما ميكانيكية الرينو ومراكز الصيانة فبقت منتشرة في اماكن كتير.
سعرها من اواخر الثلاثينات حتى منتصف الخمسينات حسب الموديل والحالة والموتور والتجهيزات لأنها من موديل 2001 وحتى 2008
وبالتوفيق
وتقبل مروري

**saddam** · 10-11-2013 06:38 PM

صديقتنا المواطنة
الكليو ال 1200 لو نظيفة فعربية شديدة اﻹحترام وقطعا أحسن من لانوس وعشان أريحك فيه أخت زميلة مواطنة محترمة عندنا في المنتدى عندها العربية دي ومرت بشوية مشاكل وهي بتحب تجتهد وبتسأل ولما حد بيضحك عليها تتعلم من أغلاطها وترجع توقف على رجليها من تاني أنا عندي نمرتها بس لا يجوز شرعا أديهالك من غير إذنها بس ده رابط الملف بتاعها هنا كلميها وإنتو بنات مع بعض وهي حتوقف جنبك وتحكيلك كل حاجة

نايل موتورز - NileMotors.net

وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**مهند-النجار** · 10-11-2013 08:30 PM

الزيرو احسن من الاستعمال ولو كان الاستعمال مرسيدس

هاتي حاجة زيرو ماروتي - التو

عربيات كويسة جدا و صيانهتا سهلة

**mooonlight** · 10-11-2013 08:51 PM

طب دلوقتي كذا حد من اللي اتفضلوا وردوا قالوا بلاش اوتو وانا لازم ان شاء الله اجيب اوتو
اعمل ايه بقى
هل في اراء تاني ؟

**mooonlight** · 10-11-2013 08:53 PM

المشاركة الأصلية كتبت بواسطة saddam

صديقتنا المواطنة
الكليو ال 1200 لو نظيفة فعربية شديدة اﻹحترام وقطعا أحسن من لانوس وعشان أريحك فيه أخت زميلة مواطنة محترمة عندنا في المنتدى عندها العربية دي ومرت بشوية مشاكل وهي بتحب تجتهد وبتسأل ولما حد بيضحك عليها تتعلم من أغلاطها وترجع توقف على رجليها من تاني أنا عندي نمرتها بس لا يجوز شرعا أديهالك من غير إذنها بس ده رابط الملف بتاعها هنا كلميها وإنتو بنات مع بعض وهي حتوقف جنبك وتحكيلك كل حاجة

نايل موتورز - nilemotors.net

وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

شكرا جدا لحضرتك وانا اكيد هكلمها على الملف الشخصي دا علشان استفيد منها ويارب ترد عليا وتفيدني بخبرتها
اشكرك مرة تانية بجددد

**tameramin77** · 10-11-2013 08:59 PM

توكلى على الله الرينو عربيه محترمة وقطع الغيار متوفر واسعارها كويسه وعن تجربه ولو في اي سوال انا تحت امرك

الموضوع: بفكر في كليو وخايفة جدا

LinkBack

أدوات الموضوع

عرض

-

-

المواضيع المتشابهه

اقتراح للناس اللي نفسها تركب موتو او سكوتر وخايفة تقع او مابتعرفش تسوق

محتارة وخايفة

بفكر اجيب رينو كليو

بفكر أجيب كليو مستعملة فى حدود 40 - 42 ألف .. ما هو أفضل موديل ؟؟

عايزة اجيب كيا شوما وخايفة ايه رايكم؟؟؟؟؟؟؟

الكلمات الدلالية لهذا الموضوع

المفضلات

المفضلات

ضوابط المشاركة