الموضوع: انا والـ 301 والتوكيل وصيانة الـ 2500

المشاركة الأصلية كتبت بواسطة amrelsaqqa

ايه رأيكوا في اللى حصل ده وكنتوا هتعملوا ايه لو كنتوا مكانى ؟

تعرف أسم المهندس دا وتشتكيه في الأدارة,
وتاني يوم اللي هوا بكرة تكلم الهوت لاين وتطلب إن حد من إدارة بيجو مصر يكلمك لأنك عايز تشتكي مهندس في التوكيل,,


العربية تتصلح لك في التوكيل وتاخد فاتورة بالأصلاح ودي مهمة جداً جداً,, وطبعاً التكلفة اللي هتتكب في الفاتورة مش هتدفع منها أي قرش طبعاً لأن دي مسؤليتهم والعامل اللي خبطها عليه مسؤلية تحمل تكلفة الأصلاح, طبعاً اللي بيحاول المهندس يعمله معاك أنو يستعطفك عشان التكلفة دي متجيش علي العامل اللي طلع يجرب,, وهوا في الغالب مهندس زيهم مش عامل من الورشة,,
فا دي مش مشكلتك, أنت مديهم العربية سليمة, تاخدها سليمة,, سواء حصلها مشكلة وهيا بتتصلح جوا الورشة أو برة الوشة,
وسواء التكلفة هيتحملها العامل وتتصلح في التوكيل وتاخد فاتورة من التوكيل بالأصلاح,
أو التوكيل نفسه يتحمل التكلفة بما أن المشكلة حصلت والعربية عندهم وتاخد فاتورة بالأصلاح.

أنا قلت لك تطلب فاتورة بالأصلاح عشان الفاتورة عشان يبقي درس للمهندس المهمل دا,, وعشان ميخيركش تاني أنت ولا أي حد تاني بالكلام اللي قالهولك دا ويتحملو نتيجة الغلط دا والأدارة تعرف بيه وتحسابهم علي الأهمال دا في حق العميل.
وعشان تتأكد أنها أتصلحت في التوكيل ودا المهم,,,,
لأن لو العامل والمهندس اللي كلمك مش ناوين يعرفو الأدارة وكان بيحاول يتهرب من إن الموضوع يوصل للأدراة زي ما كان بيحاول يقنعك ممكن لو طلبو العربيات تبات هيصلحوها برة زي مانت صلحت في ورشة قبل كدا ويدوهالك لما تخلص من التوكيل,

فا الفاتورة مهمة عشان الأدارة تعرف وتحاسب المهندس المسؤل عن اللي حصل, وعشان تضمن حقك إن العربية أتصلحت في التوكيل,
وعشان العربية لو طلعت مش مظبوطة تضمن حقك بأنك تروح لهم تاني يظبطوها. <<<

والباب سواء جه أسود وأترش دا مش يعيبه, كل العربيات كدا,,
ولو أتصلح وأتظبط مفيش مشكلة برضه, أحنا كلنا معرضين إننا نتخبط وأحنا ماشين, بس أحنا مشوفنها هل العامل خبط العربية أهمال, ولا العربية أتخبطت منه,,
بس دي مش مشكلتنا, العربية كانت في مسؤلية التوكيل وقت الخبطة,, ودلوقتي واجب التوكيل أنو يصلحها.
وتغير الباب صعب إلا لو متخرشم أووي, بس طالما أنت بتقول أتفقتو تترد علي البارد ودا الحل العملي عشان نحل الموقف, متاخدهاش إلا أما تكون مظبوطة وأنت مرضي ولو في حتت قشرت تترش عادي.

وعادي أنهم طلبو منك في الأخر أنك تقعد وتستني العربية,, مينفعش حد يستني في الورشة أيا كان, الموضوع مش موضوع trust وإنو يتعمل exceptions لحد.
أي حد غير مصرح ليه بالعمل في الورشة وغير المهندسين والفنين,, ممنوع أنو يدخل ويستني جوا, لسلامته أولاً ودا أساس البروتوكل دا ولسلامة العربيات اللي جوا بتاعت الناس التانين والشغل اللي بيتعمل.


وأنت فعلاً يا عمرو عربيتك واخدة عين وحشة,, حاول تطلع عنها حاجة لله لو مكنتش لسه طلعت, أو زود شوية,
وياريت تشغل قرءان طول مانت ماشي علي السريع أو جوا البلد,, وأنسي الأغاني خالص والموسيقي الفترة دي,, هتفرق معاك.
خلي سورة البقرة شغالة فيها علي طول وكررها كل ما تخلص,, هتفرق معاك أكتر عن تجربة.....

وربنا يعينك ومتقفلش من العربية, قل لن يصيبنا إلا ما كتب الله لنا,
وربنا يستر طريقك وطريقنا كلنا.

دا اللي أنا كنت هعمله لو كنت مكانك,, وعشان يبقي الواحد عارف يعمل أيه في المواقف اللي زي دي,,

أنا كتبت ردي دا وأنا بقرأ موضوعك,, طبعاً أنت خصلت الشغل خلاص وأنا مكنتش قريت الموضوع للأخر لسه,
طالما بتقول//

المشاركة الأصلية كتبت بواسطة amrelsaqqa

المهم بعد ساعة ونص طلعوا بالعربية وقاللى تعالى اتفرج ، المهم ربنا سهل وفعلا ردوها بطريقة كويسة ، استعوضت ربنا وحمدته ورضيت باللى حصل ومشيت "

يبقي كدا قدر الله وما شاء فعل,,
والحمدلله أنها جات علي قد كدا.