الموضوع: اميجراند ولا بريليانس fsv >> ايه رأيكم

بصوا يا جماعة .. أنا تعبت من السؤال عن العربية الامجراند فعلاً

أنا مش هحلف بس أقسم بالله :) أنا مليش في موضوع الدعاية والدعاية المضادة واللجان الالكترونية والكلام دا .. أنا بجد عايز أشتري عربية وعشان كده بسأل عن العيوب قبل المميزات عشان متفاجأش بعد م أشتري
لكن ناس كتير من اللي كلمتهم على النت وعلى أرض الواقع وناس والله أعرفهم شخصياً معاهم العربية قالوا ان العيوب دي فيها ودا خلاني أتردد أكتر وأكتر ومش عارف آخد قرار بينها وبين البريليانس .. دي العيوب واللي معاه العربية هيعرف اني مش بفتي الحمد لله ^_^ :-

- بسمع ان فيه مشكلة في الفتيس .. بيبدأ ناعم في النقلات لكن بعد كده بيبقى فيه عضة في التاني والتالت .. دا غير ان زيت الفتيس اللي جاي بيكون محروق أو مش كويس
- انخفاض العربية خصوصاً من الخلف .. وبتهبط لما يكون فيها أربع أشخاص .. وبالتالي بتحك في المطبات - دي في اجماع عليها تقريبا -
- التابلوه الخامة بتاعته مش كويسه واللون بيتغير مع الغسيل – مش كل الناس لاحظت الموضوع دا الحقيقة -
-الكاسيت ناس بتستلمه بايظ والأغلبية بيبوظ بعد شهر ولا حاجة كدا
- لمبة التشيك انجن بتنور من غير سبب في أي وقت يعني ممكن تنور بعد ال10000 كيلو متفهمش ازاي !!
- العربية أحياناً كهربتها بتفصل وتضطر تشيل كابل البطارية وتوصله تاني
- الدهان اللي بره العربية خامته وحشه وبيتخدش بسهولة جدا
- ترشيح زيت على وش الموتور .. وترشيح من ماستر الدبرياج السفلي
- كمبريسور التكييف .. الناس بتقول انه ضعيف
- وان التكييف أحيانا بيخرف .. شوية يحيب سخن وشوية يجيب ساقع وكدا –للأمانة برده أنا سمعت ان السبب في السوفت المصري ويُقال إن موديل 2014 جابوا السوفت الصيني و حاليا موجود في أبورواش للي عايز يغيره -
- عزم العربية ضعيف في المطالع !! " دي نقطة مهمة الصراحة "
- فبرة التنك بلاستيك وبتتكسر بسهولة .. أنا سمعت واحد بيقول اتغير في موديل 2014
- فيه رجفة أو رعشة في العربية لما تدور ولما تاخد غيار
- آخر حاجة اني سمعت ان المساعدين بتوع العربية أي كلام والعفشة رديئة


على فكرة أنا بجمع حالياً عيوب البريليانس من الناس اللي أعرفهم معاهم العربية وهكتبها في القريب العاجل