الموضوع: مشكلتين في الفلوينس٢٠١٤ بنزين و تسارع

السلام عليكم أسرة رينو الكرام :)

رخصت العربية إمبارح الحمد لله و هي فعلا ممتعة

بس عندي مشكلتين مضايقني جدا

١- إستلمت العربية كانت عاملة ٤١ كم و مفيش بنزين تقريبا. فولت العربية و أخذت ٥٥ لتر .. بعد كده لقيت الكمبيوتر كاتب إن البنزين المتبقي يسمح بالسير ٣٦٠كم فقط !!!!! و كان مبين إن متوسط الإستهلاك بناء علي المعلومات المتراكمة = ٦كم/لتر. مع الوقت إبتدت تزيد ووصلت ل ٥١٠كم و بعد كده نزلت تاني ل ٣٨٠كم.

النهاردة (تاني يوم إستخدام) بقيت عامله ١٤٠كم (بما فيهم ال ٤٠ الي قبل ما أحط بنزين - يعني صافي ١٠٠كم) ، ببص علي الوقود لقيت إستخدم ٢٠ لتر في ال ١٠٠ كم !!!!

أنا عارفة إن معدل الإستهلاك المفروض جيد جداً و إنه حوالي ٧لتر/١٠٠كم .. بس فيه حاجة أكيد غلط عندي. هل أستني أحكم بعد التفويلة التانية علي أساس تكون كل معدلات العربية إستقرت ولا ماستناش و أروح للتوكيل؟


٢- تاني مشكلة في السحب .. أنا طبعاً قريت كلام MeggieBoy عن الفتيس ال CVT و إن التسارع بطئ لغاية ٥٠كم/س و ده كنوع من الحماية بس أنا حسيت النهاردة إن السحب كان بيموت علي مطلع كبري لما إبتدي الطريق يمشي (يعني تحرك من وضع السكون). السحب عامةً بعد ال٥٠كم/س معقول و أول ما بيوصل لل ٦٠كم/س بيصبح جيد. الموضوع خنيق بجد .. هل ده طبيعي؟ السحب في المطلع كان ميّت فعلاً!!

مستنية إفادتكم :)

شكراً لرد حضرتك .. إن شاء الله هجرب موضوع التسارع ده.
بالنسبة لموضوع متوسط الإستهلاك فال ٦كم/لتر دي المتوسط اللي كان متسجل علي الكمبيوتر و هي في المعرض قبل الاستلام و بما إن السيستم فيه learning لطريقة السواقة زي ما حضرتك بتقول فهو وصل ل ١٠كم/لتر بعد إستلامي ليها. و زي ما حضرتك عارف فيه قراءتين في الكمبيوتر واحدة ال average تراكمي و التانية خاصة بالمشوار الحالي. التراكمي هو اللي كان ٦كم/لتر و طلع ل ١٠كم/لتر و نزل تاني ل ٧كم/لتر. القراءة التانية في الكمبيوتر الخاصة بمشولري الحالي (اللي بيتغير و أنا بسوق) كان بين ١٣كم/لتر إلي ١٥كم/لتر.

المشكلة واضحة جداً لما لقيت إستهلاك البنزين مبيّن إني إستهلكت ٢٠ لتر في ال ١٠٠كم بين إمبارح و النهاردة يعني ٣ أضعاف متوسط الإستهلاك اللي المفروض يكون عليه.

الف مبروك العربيه
اولا متقلقيش لان العربيه بتاخدى افضل داء منها بعد اول 2000 -5000كيلو خصوصا استهلاك البنزين " بحكم خبرات كتير من اعضاء المنتدى "
و متحكميش على استهلاك البنزين من قرايه الكمبيوتر فقط استنى اما تفولى العربيه تانى و شوفى العربيه اخدت كام لتر وانتى مشيتى بيها كام لتر

المشاركة الأصلية كتبت بواسطة ahmedelfeky

بصي يافندم حضرتك اعملي ريست لكمبيوتر الرحلات قلبي ف القائمه واعملي ريست للافريدج والاستهلاك كم/لتر هتضغطي ضغطه طويله علي الزرار اللي عليه سهم لتحت في دراع المساحات لكل منهم هيبدأ يحسب من اول وجديد واعملي ريست طبعا للكيلوات المقطوعه انا معايا العربيه دي يافندم وماظهرتش معايا اي مشكله اعلي استهلاك شفته كان 11.7 كم/لتر واقل استهلاك شوفته كان 15.8 كم /لتر وفعلا العربيه أدائها بيتغير بشكل ملحوظ بعد ال 5000 كيلو مع انهم كاتبين في الكاتلوج بعد 3000 بس وماتنسيش وانتي بتفولي كل مره تكوني مبطله العربيه عشان العوامه ماتهييسش

هجرب ان شاء الله موضوع ال Reset .. أنا متفهمة ان ال average التراكمي أكيد طبعا هيتأثر بال Reset لأنه مبني علي ال History بتاع العربية لكن كل ملاحظاتي متركزة علي الاستهلاك الفعلي في ال 100 كم الأولنيين اللي الكمبيوتر قال انهم 20لتر

انا المرة اللي فاتت فولت من بنزينة موبيل جنب مستشفي الشرطة

تمام .. هصبر ان شاء الله و هجرب خاصة اني مسافرة ان شاء الله بيها يوم السبت فهيبان جامد موضوع السحب و البنزين

المشاركة الأصلية كتبت بواسطة ramymechanics

ما دام مسافرة حاولى تشغلى مثبت السرعة لو الطريق يسمح ... وهاتى شاشة الأستهلاك average وهتشوفى ارقام هتبهرك ان شاء الله ... وزى ما قلت لحضرتك فالطلعة تقلى رجلك شوية ومتخافيش

ده أكيددددد إن شاء الله :) ... هو إحنا هنعرف نستخدم مثبت السرعة غير في السفر

المشاركة الأصلية كتبت بواسطة blazer

الف مبروك العربيه
اولا متقلقيش لان العربيه بتاخدى افضل داء منها بعد اول 2000 -5000كيلو خصوصا استهلاك البنزين " بحكم خبرات كتير من اعضاء المنتدى "
و متحكميش على استهلاك البنزين من قرايه الكمبيوتر فقط استنى اما تفولى العربيه تانى و شوفى العربيه اخدت كام لتر وانتى مشيتى بيها كام لتر

هو ده اللي أنا قصدي عليه .. أنا مشيت 100كم ب 20 لتر