شكراااااااااااااااااااااا اااااا
شكراااااااااااااااااااااا اااااا
استاذي العزيز، انا خلصت الواجب ده ومتأكد منه بتاريخ 10 اكتوبر 2013 يعني آخر تحديث lمن يومين. بنتكلم عن الفلوانس CVT
وعلى فكرة واحد من الزملاء اكد لنا ان سير الكاتينة جنزير في الفلوانس يعني مافيش صيانة كبرى على عكس الكورولا.
الخلاصة انه لا داعي للتشكيك في موضوع تكلفة قطع الغيار ده لأني عملته بنفسي وانا ناوي اشتري فعلا، وخصوصا ان اي حد ممكن يتأكد بنفسه بالإتصال بالتوكيلين.
اما موضوع عمر قطع الغيار فدي مستهلاكات متغيرة طبقا لنوع السواقة والمسافات المقطوعة (كم).
يعني....
الزيوت والفلاتر السيور التكييف... تتغير وتتصين حسب المسافات المقطوعة اللي ممكن تستهلكها في شهر او 6 شهور او سنة!!! سليم؟
التيل والكاوتش والعفشة... تتغير برده بالمسافات ولكن فيها عنصر تاني وهو طريقة السواقة والطرق اللي الواحد بيمشيها
الباقي زي الصاج والزجاج والفوانيس دي بقى ربنا يستر طريقنا بتغيير ساعة الحوادث
انا راكب الماني وكنت راكب ياباني وكوري كله اوتوماتيك...
اكاد اجزم اني كنت بغير تيل (الأصلي من التوكيل) كل 25000كم في كل العربيات (مرسيدس، اوبل، سويفت، لانسر، نوبيرا)!!!!!! غريبة دي!!!! لأ مش غريبة ولا حاجة علشان اكتر من كده باسمع تصفيير الحديد في الطنابير
أكاد اجزم اني بغير زيت وفلتر كل 10000كم في كل العربيات (موبيل 1)
أكاد اجزم ان العربية الزيرو معايا بشحن فريون في السنة الخامسة (في كل العربيات) اللي امتلكتها
أكاد اجزم اني كل 60 او 70 الف بعمل الصيانة الكبيرة في كل العربيات
ولكن بصراحة في المرسيدس عمري ما غيرت حاجة في العفشة
واخيرا بصراحة، الفرق الوحيد اللي كنت بأحس فيه ان قطع الغيار الاوروبي معمرة قوي هي كل مستلزمات العفشة (المساعدين، القواعد، التيش، البطاحات، الخ، الخ).
لما اغير عفشة الياباني والكوري احس انها 10000 كم بتكون زي الفل، وبعدين اكن الواحد ما غيرش حاجة.
ارجو ان تعم الفائدة
سؤال : هو الفلونس موجود فيها esp أو أي نظام مماثل له ؟ لاني لم أجده في المواصفات الموجودة في أول الموضوع أو في موقع الوكيل علي النت؟
اللي أنا فاهمه إن الكورولا فيها نظام ال vsc و اللي هو مماثل لل esp و ذلك في جميع فئاتها حتي المانيوال.
معلش أنا باسأل كتير لأني في مرحلة الشراء و حاجز الكورولا هاي لاين و عاوز أعرف هل أكمل أم ألغي الحجز و أشوف الفلونس.
شكرا لسعة صدركم ......
تسلم يا باشا على المداخلات الكريمه :verygood: لكن نقطه الفرامل الفجائيه بيشتغل ba)brake assist ) و لو احتاج abs هيشتغل مع الفلاشر زى الفيديو ده فى بس دى بيجو 301 http://www.youtube.com/watch?v=cgz6Qb58YvA فى الدقيقه 1.14
مستحيل كل الناس تتفق على حاجه واحده حضرتك روح اقعد فى الكورولا و شوف الكماليات الى تناسبك و اى فئه و اى مبلغ هتختار و نفس الكلام فى الفلوانس لكن انا رايى value for money اكيد الفلوانس تكسب بفارق كويس و ثبات الرينو معروف طبعا مع اوبشنز جامده و اكثر من الكورولا و اعتماديه زى الكورولا بموتور و فتيس من نيسان يبقى المقارنه منتهيه من وجهت نظرى لصالح الرينو فلوانس
أولا حابب أوضح أن الهدف من النقاش هو كشف خصائص كل عربية و ذلك للأمانة و علشان تكون الأمور واضحة للناس قبل الشراء
الكورولا كسيارة لا غبار عليها و هذه المقارانات ليس الهدف منها صرف الناس عنها و لكن الهدف هو تبصير كل الحاجزين للسيارات الجديدة سواء تويوتا أو الفلوانس بعيوب و مزايا كل سيارة.....
ردا على سؤال حضرتك....لا يوجد esp فى جميع فئات الفلوانس فى مصر....فى الفلوانس اللى بتنزل بره و لكن مفيش فى مصر بجميع فئتها....
أنظمة الأمان فى الفلوانس وكيل كالتالى:
-6 أيرباج متعددة درجات الفتح حسب شدة التصادم بالنسبة لفئة ال188 ألف
-أنظمة فرامل abs-ebd-ba متوافرة فى جميع الفئات
-5 أحزمة أمان ثلاثية التثبيت مع ضبط الأرتفاع فى الأمامية
-نظام isofix لتثبيت كراسى الأطفال حسب مواصفات الأتحاد الأوروبى
-مخادع رأس من الجيل الحديث رباعية الضبط
خد عندك دي علشان نسيت اقولها في تقرير الزيارة
أروش ما في الموضوع اني لما كنت في تويوتا من يومين أكدت لمندوب المبيعات اني مقتنع 100% بالكورولا وعايز أشتري وكاش،
للأسف كان الرد...
اني لازم أدفع 50000 جنيه مقدم حجز والإستلام مش اقل من 60 يوم ومش اكتر من 90 يوم
ووقت الإستلام احتمال يكون السعر زاد عن السعر المتفق عليه
أقسم بالله ده الكلام اللي أ/ ياسر مندوب المبيعات قاله لي
سألته اني جاهز أشتري من أي موزع وأدفع زيادة، رد وقال "للأسف ما فيش ولا موزع عنده حتة"
مبروك للحاجزين... :)
نقطة توضيح للجميع اللى بيقارنوا الكورولا مع الفلوانس فئة 185 ألف كورولا مع 188 ألف فلوانس...نفس السعر تقريباً
أنا هفكر معاكم بصوت عالى و أشوف أنا عايز أيه من العربية:
1-أحسن عربية مواصفات و كماليات ب 185 (188) ألف اللى أنا محددهم كميزانية للعريية
الفلوانس فيها فرش جلد كامل+bi xenon+فتحة سقف+نظام كارت ذكى Keyless Entry مع Start/Stop مع 6 أيرباج و مكن رفع زجاج....شوية الكماليات دول اللى فى رأى فى سنة 2014 أساسيات يعدوا ال30 ألف جنيه بالمستريح.....يبقى أنا بنفس الفلوس أخدت كماليات بأكتر من 30 ألف جنيه......الكورولا غالية علشان الين سعره عالى و عملهم أزمة فى اليابان مش علشان هو ده سعر العربية الحقيقى....و أنا كمستهلك مش لازم أدفع هذا الفرق لليابان من جيبى.....لاحظ كمان أن الكورولا سعرها عالى علشان يعوض تمن الR&D البحث و التطويرو الشكل الجديد اللى بيعملوا depreciation و يقسم تمنه على السيارات المباعة علشان يعوض المصروفات...على عكس الفلوانس اللى هى عباره عن facelift
2- عايز عربية إعتمادية جدا و قليلة الأعطال و كمان بأه شيك جداً
طول عمر الفرنساوى مشهور بالرفاهية و الشياكة و العفشة الجميلة و الثبات و لكن مشكلته الأساسية فى الأعتمادية بتاعته و أن أعطاله كتير....
طيب نشوف الفلوانس القديم نلاقى من 2010 العربية موجودة فى مصر و فى العالم و لا يوجد أى عطل مؤثر (موتور أو فتيس أو عفشة) و قد تكرر فى أكثر من عربية....العربية ثابتة وجودها جدا و سعر المستعمل منها شادد جدا و الناس بتعمل حاليا صيانة ال120 ألف و مفيش أى مشاكل غير قطع غيار مستهلكة موجودة فى أى عربية و سعر الأصلى زى أو أقل من العربيات المثيلة
قوم أيه بأه مش نسكت لأ.....نروح كمان نجيب موتور و فتيس و تكييف من نيسان لأن اليابانى معروف عنه أنه معمر و أعتماديته عاليه.....و نحطه فى الفلوانس الفيس ليفت علشان نعمل الصح.....
شكل و فخامة و وسع و خامات و تقفيل و ثبات الأوروبى مع أعتمادية اليابانى....
يعنى نحط الصح من هنا على الصح من هنا و نعمل أحلى فخفخينا.... :C_laugh[1]::verygood::plusone1:
سيارة تجمع أفضل الخصائص من المدرستين الأوروبى و الأسيوى مليانة كماليات و كلها فخامة.....
متشكر جداً لرد حضرتك ..... و أتفق معك تماما أن الهدف من النقاش هو تبادل المعلومات و النصيحة لكل منا
و كل واحد يقول رأيه من واقع خبرته و تجربته و نفيد بعضنا البعض....
الموضوع مش كل واحد يتحيز لرأيه و سيارته و تبقي العملية أهلي و زمالك أو نغيظ بعض.... و الكلام ده الحمد لله لم أجده في هذا الموضوع من الإخوة الأفاضل
كلنا داخلين الموقع ده علشان ندور علي معلومة أو رأي يساعدنا في عملية شراء سيارة أو تعديلها أو صيانتها علشان نوصل لأفضل قرار في ظل الظروف الصعبة اللي كلنا فيها في قطاع السيارات و إرتفاع أسعارها و إنخفاض القيمة الشرائية للعملة المحلية.....يعني لو كل واحد معاه فلوس كويسة و أسعار العربيات عندنا زي بقية الدول و خلق الله ...مش حتفرق معاه يجيب عربية و يجربها و يبيعها و يجيب التانية و يجربها....عادي
إنما إحنا في ظل ظروفنا فقرار شراء أو تغيير سيارة يعتبر معضلة كبري يستلزم التوفير لسنوات أو علي الأقل الإقتراض و تسديد القرض لسنوات برضه....
أشكر كل من رد و من سيرد في هذا الموضوع علي الحرفية في النقاش و محاولة الحوار بالمعلومة و الدلائل الصحيحة التي أفادت الكثيرين بالتأكيد
تحياتي
أنا كان ليا ملحوظة على موضوع قطع الغيار .. الفلوانس في مصر بقالها كام سنة .. وانتشرت أد أيه مقارنة بالكرولا اللي لسه ممشيش منها كتير .
وبالتالي قطع الغيار ومستلزمات التشغيل والصيانة أسعارها بتقل لما السيارة تنتشر أكتر .. مش عارف أنا صح في تخميني ده ولا مخطئ فيه .
ارجو افادتى على نقطة استهلاك البنزين فى الفلوانس
موضوع مميز جدا
لكن عن نفسي اميل للكورولا طبعا
المقصود أن أي موديل جديد لأي ماركة سيارة بتكون أسعار قطع غياره غاليه في البداية .. وبعد كدة بيقل مع أنتشار العربية في السوق .
بمعنى أخر : أنا كوكيل لسيارة ما .. ونزلت عربية جديدة في السوق .. أكيد مش حجيب ليها قطع غيار كتير في المخازن بتاعتي غير لما أشوف انتشار العربية حيكون أيه .. وبالتالي لما اشتري عدد قليل من قطعة غيار معينة (زي الفانوس أو التيل مثلاً) حيقف عليا سعره أغلى عن لو اشتريت 100 قطعة .
اولا الفلونس لايوجد بها سير تقسيمه ...... تم تطويره ليكون سير جنزير ويتم تغييره كل 120 الف كم !!
اسعار قطع الغيار للكورلا مقابل الفلونس :
1- تيل الفرامل الكورولا >> 965 ج ......... الفلونس >> 499ج
2-الفانوس الامامي (كورولا/فلونس) : 5225ج/ 1490 ج
3-بربريز امامي(كورولا/فلونس) : 3500/ 1690الوان و1055سادة
4-طقم بوجيهات(كورولا/فلونس) : 625/ 154ج
مع احترامي للكورولا ولكنها اصبح سعرها مبالغ فيه مقارنة بالكماليات
أعتقد الموضوع بيبقى مختلف شوية.....العربية فى الأول لما بتكون جديدة و بيتعملها طلبية قطع غيار، مش ممكن طلبية قطع الغيار تغطى أقل مساحة متاحة للشحن البحرى و هو كونتينر 20 قدم (حوالى 34 متر مكعب).....بتبقى زى ما حضرتك تفضلت و أشرت قطع بسيطة التوكيل بيغطى بيها نفسه لحد ما يشوف أيه القطع المطلوبة و حجم الطلب عليها و حجم العربيات المباعة....الحل فى الأول أنه يطلب قطع الغيار بالشحن الجوى و ده بيخلى سعرها مضاعف على العميل.....يعنى التيل من 550 جنيه بيوصل 950 بالشحن الجوى و هكذا.....
الوكيل مبياخدش خصم أكبر على الكمية زى ما حضرتك تفضلت و أشرت......السعر ثابت مهما كانت الكمية 1 أو 100 لأنها خدمة يؤديها التوكيل للشركة الأم كما ينص العقد بينهما و هو ملتزم بها، ربحه من التسعير و ليس من الكمية.....ليس لها إشتراط من الشركة الأم على الكميات التى يجب أن يطلبها فى السنة مثلما الحال فى السيارات (المبيعات).... أهم حاجة يخدم السيارات المباعة جيداً و تحديد كمية قطع الغيار راجعة لمسؤول قطع الغيار فى التوكيل أولا و أخيرا طبعا بالتنسيق مع المبيعات لمعرفة حجم السيارات المباعة......
بعد فترة من البيع (سنة مثلا) و بعد بيع كمية جيده من السيارات سوف يبدأ جميع اللى أشتروا من سنة يعملوا صيانة ال20 ألف مثلا و كلهم تقريبا عايزيين فلتر زيت و تيل فرامل و فلتر هواء و كل هذه المستهلكات....بكده نقدر نكون طلبية كويسة شحن بحرى و نزود فيها توقعات بحاجات مهمة أكيد هتكسر زى: مرايات شمال و يمين و فوانيس ورا و قدام و زجاج أمامى و خلفى و أكصدامات و هكذا.....
مع دخول هذه الطلبية و نتيجة قلة ثمن الشحن البحرى مقارنة بالجوى سوف يقل سعر قطع الغيار و تكون فى المستوى المعتاد لها بالنسبة لباقى السيارات من نفس الفئة......
أعتقد من الحاجات المهمة اللى يجب ناخدها فى الحسبان كمان و إحنا بنقارن هى ساعة الأيدى العاملة فى التوكيل كام، حضرتك ممكن القطعة يكون تمنها معقول و لكن بالتركيب و نتيجة سعر المصنعيات بيبقى سعرها مبالغ فيه جدا
على سبيل المثال سعر مصنعية الساعة فى توكيل رينو هو 100 جنيه مصرى/ساعة....تغيير الزيت يصنف كنصف ساعة شغل يعنى حوالى 50 جنيه مصنعيات....تغيير فلتر الزيت كمان نصف ساعة مصنعيات....يعنى غيار زيت و فلتر ب 100 جنيه مصنعيات.....
الرجاله جاوت كل حاجه بوضوح و مفيش حتى سوال الوحد يرد عليه :S_thum1[1]:
حد عنده فكرة اذا فلوانس حتنزل فيس ليفت مع موتور توربو؟
ويا ترى لو صحيح قالو امتى؟
والبنزين يا ترى حيكون 92 زي الأسترا التربو ولا 95 زي الغير؟
ارجو اففادة علشان انا ممكن انتظر كم شهر لو التربو النازل :ask:
انا طرحت السؤال ده في مشاركة حائزي الفلوانس
يا باشا اى تربو سواء كبير او صغير لازم بنزين 95 و ال 92 هيشتغل عادى لكن الاداء هيقل و تصقيف مع القرص الجامد و الله اعلم هل العمر الافتراضى للموتور هيقل ولا لا و بالنسبه لموتور الفلوانس التربو مش عارف عنه حاجه خالص لو لقيت اى معلومات قدامى هضيفها ان شاء الله
تقرير ممتاز تسلم ايدك