بياناتى مع بلطجى !!!!!!

**khaled_sabry** · 16-11-2013 02:07 AM

السلام عليكم
من اسبوع (يوم الاحد الماضى) كنت بنقل ملكية عربيتي فى مرور السلام "اللعين"
كان المرور زحمه جداا و الموظفين بيتعاملو مع المواطنين فى منتهى التعالى و قله الادب
المهم كنت مطر انى اتعامل مع واحد مخلصاتى من اللى كانو ماليين المرور
و طبعا اديتله الرخص و "البطاقه اللى مكتوب فيها عنوانى"
فى اثناء ما احنا مستنيين انتهاء الرخصه قعدت معاهه و مع شويه البلطجيه اصحابه على القهوه
بصراحه فى قعدتهم استعدت اجواء فيلم حين ميسره
فمن خلال قصصهم اللى كانو بيقلوها اثناء شربهم لسجارتين حشيش اكتشفت
ان شويه البلطجيه دول ليهم علاقات قويه بالموظفين اللى جوه لدرجه ان فيه احدى الموظفات متجوزه واحد منهم و الاخ المخلصاتى اللى بتعامل معاه طلع دخل السجن كام مره قبل كده و هربان اصلا من الجيش و الشله اللى انا قاعد فيها دى منهم البلطجيه اللى بيتأجرو فى الاحداث السياسيه اللى بنشوفها و قبل الثوره كانو هما اللى بيطلعو يلمو بطاقات الناس فى بيوتهم لصالح ميمي العمده مرشح الحزب الوطنى فى الانتخابات ... الخ
فى المقابل هما اكتشفو مقدار سذاجتى و انى ابن ناس و ماليش فى الكلام ده خالص - يعنى من الاخر زبون لقطه
المهم خلص الموضوع و نقلت الملكيه و اخدت تصريح ب 6 اشهر لغايه لما يجي ملفى من مرور اسيوط - طبعا هما قالولى بعد كام شهر هات لنا التصريح و نطلعلك الرخص لكن انا مش ناوى اعمل كده و ناوى اخلصها بنفسى

اللى خلانى اكتب الموضوع ده انى لاقيت عم حاتم (المخلصاتى) بيتصل بيا الناهرده (بعد اسبوع تقريبا) بيسلم عليا !!!!!!!!!!!!
اللى خلانى اخاف انه لسه مسجل نمرتى لغايه دلوقتى ؟؟؟ لأن غير الطبيعي اصلا انه يسجل نمرتى و ليه محتفظ بيها لغايه دلوقتى

فهل هو ممكن يأذيني من خلال البيانات اللى جمعها من خلالى ؟؟ (بيانات رخصه العربيه - بيانات البطاقه و العنوان - نمرة الموبيل)

**eng.m7md.ali** · 16-11-2013 02:45 AM

مش هقولك اكتر من انك غلطان غلط كبير اوي

**meero_boy2000** · 16-11-2013 03:06 AM

مش محتاجه سؤال طبعا غلطان انت بتدي مفتاح عربيتك للحرامي ده الواحد لما بييجي يعمل مفتاح لفصل البنزين بيروح لكهربائي ميعرفش بيته فمبالك عموما اللي حصل حصل وربنا يسترها علينا وعليك وان شاء الله خير بس خلي بالك المره الجايه

**mr_safwt** · 16-11-2013 03:18 AM

انت اكيد كنت فى مرور السلام لان دة وكر البلطجية
انا عارف انه مرور ابن ستين فى سبعين بس معظم الللى هناك شكلها اصلا لا يصلحوا للحياة الادمية

**khaled_sabry** · 16-11-2013 03:23 AM

طيب يعنى كنت حعمل ايه ؟؟؟
ماكنشى ينفع اتعامل بنفسى لأن المرور زحمه و الموظفين فى منتهى قلة الادب اصلا و منتهى الهرجله
انا تبع مرور السلام ده بقالى 5 سنين و لاول مره اتعامل مع مخلصاتى لأن المره دى كانت اصعب مره اروح فيها فعلا - و بصراحه لو رجعت بالزمن كنت كررت نفس الفعل
و ماكنتش انا لوحدى اللى بتعامل معاهه على فكره
المهم سؤالى هو اخره ممكن يعمل ايه ؟؟؟

**khaled_sabry** · 16-11-2013 03:51 AM

علشان تبقو معايا فى الصوره
http://www.nilemotors.net/Nile/31096...post3874550065
من ردود احد الاعضاء فى الموضوع السابق بيقول انه لما بيروح هناك بيروح من الساعه 9 و على الساعه 2 بيبقى مخلص مصلحته و مروح
انا كنت بعمل كده طول ال 5 سنين اللى فاتو
انا بقى المره اللى بتكلم عليها كنت هناك من الساعه 8 (من قبل حضور الموظفين ) و كان يوم الاحد (كنت واخد اجازه مخصوص) و كان زحمه و قلة ادب من الموظفين غير طبيعيه ماشفتهاش عمرى قبل كده

**khaled_sabry** · 16-11-2013 04:33 AM

انا خطر فى ذهنى خاطره
هل ممكن التصريح اللى استلمته (تصريح كمبيوتر) و اللوحات الجديده (اللى استلمتها من الشباك بنفسى) يكونو مزورين و الاخ اللى اتصل بيا ده بيتصل علشان يطمن هل اكتشفت الخدعه و لا لاء ؟؟

**saddam** · 16-11-2013 05:14 AM

صديقي المواطن
قولا واحدا لا تقلق ومفيش حاجة وأنا خبرة في مرور السلام وده تلاقيه الدنيا كانت ناشفه عنده فبيحاول يقلب عيشه بأنه يفكرك إنك لو عزت حاجة إوعه تروح لمتعهد غيري وأحب أفهمك بطاقتك محدش يعرف يعمل بيها حاجة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**khaled_sabry** · 16-11-2013 06:09 AM

المشاركة الأصلية كتبت بواسطة saddam

صديقي المواطن
قولا واحدا لا تقلق ومفيش حاجة وأنا خبرة في مرور السلام وده تلاقيه الدنيا كانت ناشفه عنده فبيحاول يقلب عيشه بأنه يفكرك إنك لو عزت حاجة إوعه تروح لمتعهد غيري وأحب أفهمك بطاقتك محدش يعرف يعمل بيها حاجة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

انا دلوقتى مش مقلق من البطاقه - لأن صور البطاقه مترميه فى خمسين حته من زمان :)
لكن دلوقتى فكرت - هل ممكن انى اكون اتعرضت لعمليه نصب كبيره و تكون العربيه انتقلت ملكيتها ليه هو مش انا - هو اخد منى الرخص القديمه و خلانى اسلم بنفسى النمر القديمه على الشباك (ملاكى اسيوط)
و بعد كده هو جابلى تصريح (كمبيوتر- شبه الرخصه بالظبط بس مافيهوش ختم ) ب 6 اشهر و اللوحات الجديده انا اللى استلمتها برضه بنفس الارقام اللى فى التصريح طبعا
فهل فيه احتمال ان التصريح اللى معايا ده يكون تصريح مزور و الحقيقى يكون فيه اسم المالك اسم واحد منهم فى تصريح تانى يكون معاهم ؟؟