الموضوع: مقاس ضغط كاوتش ديجتال وشاحنusb-اول منتج من نايل موتورز

تم بحمد الله شراء جهاز قياس الضغط (ابو لمبه و عده خلفيه ) و قبل اى كلام فى حاجتين لازم اقولهم الاول :

1- جزيل الشكر لكريم منير ,كفايه متابعته لك منذ ان تطلب منه الجهاز الى ان يصل الى يدك شخصيا بالاضافه الى السعر التنافسى جدا فى الشحن مع شركه كبيره زى T.N.T

2- لازم تعرفوا خلفيه صغيره عنى قبل تقييم الجهاز :

انا من مرتادى الطرق الطوالى فى اليوم باسوق حوالى 100 كيلو للذهاب و العوده من عملى و تكون معظمها طرق مفتوحه و بها اجزاء مكسره نوعا ما و متوسط سرعتى 100كم/ساعه و احيانا اصل الى 140-150 بس مش كتير و لمسافات متوسطه (الا لو متأخر عن الشغل)

طول عمرى من اول ما اشتريت سيارتى و انا تقييمى للكاوتش اذا كان مريح او كويس انى باضغط عليه بايدى و لو لقيته ناشف يبقى تمام لو غير كده يبقى محتاج يتزود

المهم اشتريت الجهاز و قولت هاجربه خلاص بكره (بقالى حوالى شهر لم ازود العجل و شايفه كويس و رايح جاى به )

المهم اول وضعت الجهاز و قيست اول عجله ورا لقيتها 17.5 (يا مصيبتى - انا اتضحك على فى الجهاز :) قولت فى سرى كده )

التانيه اللى ورا لقيتها 18 قولت بس الجهاز مضروب و كان معى واحد صاحبى شاف الكاوتش قالى استحاله الكاوتش شكله كويس و صعب يكون 17

قولت اشوف الامامى لقيت الفردتين 25 بصراحه قولت يالا عليه العوض :) ما تزعلش منى يا كريم (نيهههههههههه)

دخل على مديرى و انا عارفه بيهتم جدا بعربيته و بيخليها على الشعره , قولتله كاوتشك مظبوط قالى اه , طلعت جرى على عربيه و قيست الاربع فرد بتاعته

لقيت الاماى 31 و الخلفى 30 (تنفست الصعداء و قولت حقك على يا كريم )

بعد ذلك جبت منفاخ بعداد مؤشر و شيكت على الاربع فرد تانى لقيته مدينى نفس القرايات (مع ان منظر العجل مش مريح اوى )

دى كانت مقدمه وجوبيه قبل اى تقييم :)

ثانيا : التقييم
--------------------------------------

1- الشكل الخارجى : شيك و مسكته مريحه و الخامات نضيفه او محترمه بمعنى اخر (9.5/10).

2- شاشه القراءه : واضحه جدا فى الرؤيه - و امكانيه التحويل من اكثر من وحده للضغط (psi- pka -bar....) و احنا الدارج بتاعنا هو psi)

3- مرفقات الجهاز المدمجه معه , مش هاعيدها و اقولها تانى هاقول بس حاجات بسيطه

الكشاف الابيض و الاحمر ممتازين و الاضاءه جميله جدا

العده المدمجه خاماتها نضيفه اوى بس برضه للامانه حاسس انها مش هاتبقى مفيده اوى (الكماشه و المقص ) و شاكوش الزجاج

بس برضه للامانه الحاجات دى لن تحتاجها الا وقت زنقه (ربنا يبعدنا عنها) و ساعتها ممكن تدفع اللى واراك و قدامك علشان تبقى معاك

فممكن نقول عليها عده مدمجه للاستعمال فى الحالات الضروريه

الجهاز فى مجمله حجمه مناسب و سهل الاستخدام و تقييمى له 9/10

الواحد دا راح لانى كنت ارى انه يكون انسب لو كان بالشحن او بطاريات ساعه

انما 5 بطاريات ساعه انا حاسس انها كتير و مش عارف برضه رينج التشغيل الخاص بها

اكيد طبعا هاتبقى حسب الاستعمال بس برضه لها متوسط عمل انا لا اعرفه و مش عارف الحجاره دى هاتكون غاليه و لا عاديه (انا مش عارف بصراحه )

--------------------------------------------------------------------------

جزيل الشكر لكريم منير مره اخرى على ما قدمه من خدمات فى اختيار و شراء و توصيل هذا الجهاز