طلب من مستلمى بيجو 301

**M.Emam** · 21-11-2013 04:04 PM

سلام عليكم
السادة ملاك بيجو 301 الف مبروك لحضراتكم اللى استلم واللى لسه هيستلم إن شاء الله
انا حجزت العربية بس لسة مخترتش اللون والمشكلة إن الألوان اللى فى الكتالوج غير اللى على الطبيعة خالص يعنى كان عاجبنى فى الكتالوج لون الكافيه الغامق بس لما شوفته حسيته مش محصل بنى ولا بتنجانى والصور على موقع بيجو معمولها اديت فبرده مش واقعية كفاية كدة كلام وخلينا فى المهم
السادة اللى استلموا العربية لو ممكن يصوروا العربية من بره ويحملوا صورها يبقى الف شكر ليهم والف شكر للى مش هيصوروها برده :) ولو حد خايف يصورها من الحسد ممكن يحط لوجو خرزه زرقا على الصورة :)

**Ahmed Amin** · 21-11-2013 04:15 PM

هوا علي فكرة الأحسن أنك تنزل تشوف العربية في المعارض والتوكيل بنفسك حتي لو اللي معروض محجوز ومش هتعرف تشتريه,
عشان تاخد فكرة عن اللون بنفسك وتشوفه علي الطبيعية,,

لأن حتي الصور هنا هتكون غير الحقيقة دي حاجة,
والحاجة التانية والأهم أنك ممكن تعجب بلون وتبقي نفسك فيه وعايز تشتريها بيه ومتلاقيش اللون دا أما تيجي تخلص في العربية ويبقي لازم تستني 3 أو 4 شهر وتضطر ساعتها تاخد لون تاني زي ما حصل مع ناس كتير هنا.

فأنزل بنفسك شوف الالوان في المعارض والتوكيل لأنها زي مانت قلت هتكون مختلفة عن صور الكتالوج وعن صور عربيات الأعضاء برضه ودا رأيي الشخصي عشان تعرف تحكم بنفسك من واقع مش من صور.

**Akram.Gamal** · 21-11-2013 04:21 PM

انا هقولك حاجه انا بقا مش مصور العربيه
ليــــــــــــه لان انا رأيى ان لازم تشوف العربيه بلونها و تركب فيها لان لونها ليه تاثير نفسى عليك يعنى لو انت مش حابب اللون هتكره العربيه

انزل فرع صلاح سالم انا كنت هناك يوم الاثنين كان عندهم الاسود و السلفر و الشمبانيا و البترولى
ولو عايز تشوف باقى الالوان بس بقا من غير ماتتفرج عليهم هتخرج بره و تروح ورشة التصليح الباب الجانبى يعنى هتتمسى 5 متر هتلاقى ماشاء الله بدون مبالغه 5 عربيات مثلا 301
اتفرج ع الطبيعه بقا براحتك و سيبك من الاراء

**mohamedyounis** · 21-11-2013 04:21 PM

لو حضرتك رحت التوكيل اللي في صلاح سالم هتلاقي الالوان وايضا يوجد موزعين معتمدين عندهم الالوان ...

**Akram.Gamal** · 21-11-2013 04:34 PM

المشاركة الأصلية كتبت بواسطة m.emam

الف شكر لردك يا باشا
الفكرة انا انا نزلت بس ملقيتش غير السيلفر والكافيه الغامق والاسود مش لاقى خالص الازرق والرمادى والشامبين

طب حاول تنزل فرع صلاح سالم
والله انا لما كنت هناك كان عنده كل الالوان ماعدا الموكا

**Akram.Gamal** · 21-11-2013 04:40 PM

المشاركة الأصلية كتبت بواسطة m.emam

انا روحت فرع صلاح سالم امبارح واول امبارح ويوم الاثنين وهى دى الالوان اللى كانت موجوده سواء فى المعرض او الصيانة كانت سيلفر واسود وكافيه

باشا انا كنت هناك يوم الاثنين
كان عنده فى وش المعرض اسود و شمبانيا و بترولى
و جوه المعرض كان فيه سيلفر
و فى الخلف فى جراج المعرض كان فيه كذ عربيه رمادى

و كان واقف فى الصيانه ابيض و شمبانيا مش فاكر ايه كمان

وهما كانوا خايفين اوى من احداث يوم الثلاثاء و اعتقد انهم رجعوا العربيات تانى لابو رواش