الموضوع: تغيير حساس التبريد/الكولانت

حساس التبريد أو المعروف بـ حساس الكولانت
وظيفته: قراءة درجة حرارة المياه اللي في البلوك ويبلغ الكنترول بيها
الغرض منه: سرعة تسخين الموتور لما يكون بارد وده من خلال الكنترول واللي بيقوم بتقليل وقت الشرارة وزيادة جرعة البنزين
أعراض تلفه: تأخير الدوارة ، برجلة على السلانسيه ، دخنة سوداء ، لمبة Check Engine تنور
كود الخطأ: 00015 Coolant Temperature Voltage High
وقت ظهور الأعراض: والعربية سخنة أو دافية ، ليه ؟ لأنه بيدي قراية غلط ويقول للكنترول ان الموتور بارد (وفي الحقيقة ان الموتور سخن أو دافي) فالكنترول يقوم بوظيفته اللي قولنا عليها لسرعة تسخين الموتور ، فايحصل البرجلة والدخنة السوداء
القراءة الطبيعية على Op-Com: الرقم العشري فولت والصحيح درجة حرارة C
3.37/53 ، 3.18/58 ، 2,92/65 ، 2,81/68 ، 2,75/69 ، 2,69/71 ، 2.12/86 ، 2.10/87 ، 2.01/90 ، 1.93/92 ، 1.75/98 ، 1.72/99 ، 1.68/101 ، 1.60/103


دا صورة حساس الكولانت ، نوع بوش ألماني بـ 100 جنيه



العدة المستخدمة: مفتاح بلدي 19

بداية هاتنقص شوية مية من القربة عشان لما تفك الحساس ميفضيش مية التبريد كلها



دا مكان الحساس




هاتفك غطاء فلتر الهواء وتفك الخرطوم الواصل بين الفلتر وبين العمة عشان توسع لـ نفسك مش اكتر
فك فيشة الحساس عن طريق انك تشيل السلك/المشبك الحديد ، بس خد بالك ! حط تحته حتة قماشة عشا السلكة الحديد ماتقعش منك



صورة مقربة أثناء الفك ، طلع عيني الصراحة في فكه



وده الحساس الجديد بعد الربط ، وماتنساش تركب السلك الحديد اللي بتمسك فيشة الحساس في المشبك بتاعه عشان ماتفلتش منه
وممكن ترش الفيشة بـ wd-40 بالمرة عشان لو فيها تراب او صدا



- بمنديل أبيض امسح تحت الحساس ونضف أي مية تحتيه
- رجع حبة المية اللي نقصتهم من القربة الاول والعربية دايرة طبعا ، وماتنساش تاخد هواء

المشاركة الأصلية كتبت بواسطة MaaM

والهواء تاخده من العربية عن طريقتين ، خده بنفسك وماتعتمدش على الصنايعي
الطريقة الأولى
تفك خرطوم الراجع الواصل على قربة المية واللي هو جنب قربة المساحات ، وتدور العربية وتزود مية من القربة (بطريقة صب شاي الخمسينة) وخرطوم الراجع تدلدله لـ برا عشان المية تنزل بسهولة
هاتلاقي المية نازلة بتقطع ، لغاية اما تلاقيها نازلة بصورة منتظمة
توقف صب المية فوق علامة الحد الأقصى بحوالي 2 سم
وتشيل الخرطوم تركبه مكانه وتقفل الغطاء بإحكام

الطريقة التانية
دور العربية لغاية اما المراوح تشتغل ، تفتح غطاء القربة براحة ، هاتلاقي المية بتحاول تخرج ، تقفل عالطول
وتكرر العملية ديه مرتين أو تلاتة لغاية اما تلاقي في اخر مرة إن المية مستقرة ومابتحاولش تخرج

- نور بأي كشاف على الحساس وتحته وشوف فيه مية بتنزل ولا لأ
- بعد يوم أو يومين امسح بمنديل أبيض تحت الحساس عشان تتأكد ان مافيش مية بتنزل منه

ملحوظة:
لو فيه أي غلط في المعلومات المذكورة أعلاه ، يرجى التصحيح