الموضوع: احترس من النصابين

الاخوه الافاضل
الحقيقه انا ما كنتش عارف اكتب الموضوع فى انهى قسم لكن قررت اكتبه هنا لانه متعلق بالكاوتش
الموضوع و ما فيه انى من حوالى شهر كنت راكب عربيتى و معايا مراتى و عيالى و مسافرين اسكندريه و اخدت طريق البحر الاعظم من شارع مراد فى الجيزه علشان اركب محور المنيب
المهم قبل ما احصل مطلع الدايرى فيه مطب صناعى كل العربيات بتهدى عنده و الى حصل انى و انا فوق المطب كان فيه واحد بيعدى الطريق من اليمين للشمال على رجليه من فوق المطب و اول ما جه جنب العربيه شاور على فرده الكاوتش القدام ناحيه الشمال و قال لى الحق يا استاذ الفرده بتنام خالص
فى اللحظه دى انا استغربت لاءنى ماحستش ان فيه اى مشكله فى الكاوتش و لكن

الحقيقه الراجل كان شكله نضيف و بعدين انا معايا الاسره و طالع على سفر فقلقت جدا و اذ فجاءه و بمجرد ما عديت المطب لقيت اعلان على ايدى اليمين بتاع كاوتش قمت محضن و لقيت محل صغير بعد الاعلان بكام متر
المهم و ركزوا فى الى حصل بعد كده
بمجرد ما حضنت جنب الرصيف قدام المحل لقيت واحد من المحل بيجرى على العجله الشمال قدام و فى ايده خرطوم الهواء و مفتاح صليبه
انا نزلت من العربيه و لفيت حوالين الكبوت لقيت العجله تمام و الراجل حيبتدى يفك العجله
قلت له هو فيه ايه؟
قال لى العجله اكيد فيها خرم و حاصلها لك
قلت له ما هى حلوه و زى الفل قدامك
قال لى ما انا لسه مزودها دلوقت
فى اللحظه دى الفار لعب فى عبى لان مستحيل يكون زود هواء فى الثانيه الى نزلت منها من العربيه
قلت له لا متشكر مش عاوز اكشف على العجله و خد ٢جنيه بتوع الهواء بتاعك
الراجل وشه اتغير و لهجته قلبت و مش عاجبه انى مش عاوز اكشف على الفرده لكن انا تنحت معاه و مشيت
اهم حاجه بقى الى جاى
بعد الموضوع ده بحوالى اسبوعين تلاته مراتى كانت سايقه قى نفس المكان و لقت برضه شاب بيعدى الشارع من فوق المطب و بيقولها يا مدام العجله نايمه
انما على مين
و لذا لزم التنبيه