الموضوع: احترس من النصابين في السوق

السلام عليكم و رحمه الله و بركاته
الصراحه يا جماعه انا اترددت كتير اني اكتب الموضوع ده لأنه طويل و فيه تفاصيل كتير و مكانش عندي وقت بس في الأخر و بعد اللي شوفتوا من مجهود الأعضاء هنا في انهم يفيدوا بعض باي معلومه فقررت اني اكتبه لعل و عسي حد يستفاد منه و اكون ساعدته انه ميقعش في المشكله دي
المهم انا لنفسي اكتب الموضوع علي كذا مره علشان الوقت مش سامح و االه
مش هطول و هخش في الموضوع
اولا انا مش عايش في مصر و كنت لما بنزل اجازه بلأجر عربيه من ايفيس علشان اقضي بيها اجازتي و لكن مع زن مراتي انها عايزه عربيه علشان تبقي موجوده في مصر لي اي حد فينا ينزل يستعملها في اي وقت
فقررت اني انتهز فرصه اني نازل مصر لمده اسبوع علشان اخلص ورق و اجيب عربيه
و بما اني جبت لأختي عربيه ماتريكس من سوق العاشر قبل كده و كانت ممتازه فقررت اني انزل السوق و اجيب من هناك
المهم نزلت السوق يوم الجمعه و قعدت الف فيه من قبل الصلاه لحد الساعه 4 العصر ملقتش حاجه كويسه فعرفت انه بيشتغل يوم الأحد كمان فنزلت و كان السوق مش زحمه اوي
المهم لقيت عربيه هيونداي i30 موديل 2009 و ماشيه 12000 كم بس و لونها رمادي و العربيه شكلها نضيف اوي
و لقيت صاحبها شاب نضيف و ابن ناس مش زي العالم التجار و صبيانهم اللي مليين السوق و تعرفهم اول ما تبص علي رجليهم و تشوف الشبشب ابو صباع( لزوم الرحرحه) . اول اول ما تبص في وشهم و تسمع كلامهم
و سألتوا علي العربيه و كان طالب فيها 90 الف فقولتلوا 85 و مرديش و قعدنا نتفاوض لحد ما وصلنا 86.5 الف و سألتوا في الأول علي ورق العربيه قالي مفيهاش توكيلات . قولتلوا الرخصه باسمك قالي لأ لأن العربيه بتاعت عمه و بيبعهاله و قولتلوا عمك اللي هينقلي الرخصه فقالي اه قولتوا انا هعمل عقد و هسجل هرخص العربيه علطول علشان معنديش وقت مع ان العربيه كان فيها رخصه سنتين فقالي اوك
قولتلوا نطلع نرفع العربيه فلقيتوا راح لواحد تاني واقف جنب العربيه الماتريكس اللي جانبنا و كلمه و لقيت الراجل جالي و الواد عرفني بيه انه عمه التاني و بيبيع عربيتوا هو كمان . المهم لقيت الراجل بيقولي لو طلعتوا من السوق هدخلوا تاني قلتله مش مشكله بس المهم العربيه تتطلع نضيفه
و ركبنا العربيه و اصريت اني اسوقها و قعدت اجرب فيها و اجري و اقف و الف علشان اشوف حالتها فلقيتها كويسه جدا . رحنا طالعين علي بنزينه كالتكس اللي في عباس العقاد
نسيت اقولكوا انه قالي ان العربيه رشه الأكصدام اللي وره بس و الباقي فبريقه
رحنا البنزينه و كشف عليها الراجل هناك قالي ان اساسيتها سليمه بس رشه بره كلها تقريبا ما عدا السقف و القوايم و لما سألت الواد قالي لأ مفيش كلام من ده العربيه دي اي حاجه بتتعمل فيها بعملها انا و ابن عمي و مفيهاش اي حاجه غير الأكصدام اللي وره . اراجل خده ووراه علامات الرش اللي في العربيه فالواد سكت فالصراحه الفار بدأ يلعب في عبي
سألت بتاع البنزينه ايه رأيك قالي العربيه نضيفه و قالي خدها بس اقرص معاه في السعر كمان علشان موضوع الرش ده . قولت ان تلات ارباع العربيات في مصر رشه بره فتوكلت علي الله و قولت علي البركه المهم نزلت معاه الف جنيه كمان
و توكلت علي الله و رجعنا السوق علشان نجيب عقد ابتدائي و قولتلوا يجيب ورق العربيه بكره و المخالفات علشان نخلص . وكان عمه ده جه و حصلنا و قالي معلش لأن في ظروف عند صاحب العربيه و بنته اللي هيا بتركب العربيه في المستشفي بتولد و توفت امبارح و الراجل بيبيع العربيه لظروف خاصه فمعلش استني علينا يومين الراجل يمسك نفسه و يجيلك علشان نخلص
قولت لنفسي الناس في ظروف و لازم الواحد يقدرها علشان ربنا يكرمه و يطرح البركه في العربيه
و رحت اديتوا 500 جنيه عربون و كتبنا العقود و مضينا و الراجل حط شرط جزائي في العقد 2000 جنيه فقولت انا مش فارقه معايا لأني شاري و اخدت نسخه و صوره من بطاقه (محمد) و هو خد صوره من بطاقتي و اتفقنا نتقابل بعد يومين
كلمتوا تاني يوم علشان اشوف محمد ده جاب المخالفات ولا لسه قالي لسه و هيجبها تاني يوم الصبح
في نفس اليوم ده بلليل كلمني و قالي انا جبت المخالفات و بكره الصبح هنقابلك علشان نجي نخلص
و اتفقنا هنتقابل قدام البنك علشان نخلص الورق و اديلوا الفلوس جوه البنك علشان مش عايز امشي بيهم خاصه اني مش هيكون معايا عربيه
لحد هنا و الموضوع ماشي تمام و مفيهوش حاجه
الشغل التقيل بأه بدأ تاني يوم
وده اللي هكملوا المره الجايه لأني مش قادر افتح عيني و مش شايف الكيبورد اساسا