الموضوع: تغيير جوان وش السلندر ,,, وحقائق جديدة

طبعا انا كنت بشتكى من نقص فى مياه التبريد حتى بعد ما غيرت شجرة الميه وطلمبة الميه وقربة الميه بغطاها ومفضلش قدامى غير انى اشك فى جوان وش السلندر
المهم اتوكلت على الله وقولت افك واشوف الدنيا فيها ايه فروحت النهاردة علشان اغير الجوان وبعد ما الميكانيكى حل وش المكنة شوفت حاجتين مهمين جدا جدا
اول حاجة لقيت الماسورة اللى واصلة من عند طلمبة الميه لحد شجرة الميه ناشعه ميه حمرا من ناحية الطلمبة تحت زى ما فى الصور كده

وثانى حاجة فى طبة ميه فى وش المكنة من ناحية سير الكاتينة والطبة دى كانت برده ناشعة ميه حمرا زى ما فى الصور

طبعا الحمد لله وش المكنة كان كويس والبلوكة تمام الحمد لله المهم اخدت وش المكنة على الخراط علشان تتنضف وتتصنفر والخراط عملى طبة تانية ولزفها بالجملكة "الخراط اخد 65ج"

وبعد كده اشتريت جوان وش سلندر المانى ب170ج ودى صورته لما حطيته على البلوكة وطبعا باين فى الصورة شكل البساتم والشمايز وانا شايفهم كويسين بس الميكانيكى بيقول مش بالشكل وان حالة المكنة مش حلوة مش عارف بيقول كده على اساس ايه رغم انه الوش سليم والبلوك تمام وعلى كلامه ان اول بستم محتاج طقم شنبر لان فى تعاريج بيحسها بايده لما يمشيها على الشميز ومن المفترض ان هوا بس اللى حاسس بيها وانا ومشيت ايدى على الشمايز كلها من جوة محستش اي حاجة وكلهم زى بعض

وجبت بوجيهات جديدة ب80ج وانبوبة سليكون وجمالكة ب20ج
والميكانيكى اخد مصنعية 250ج انا بصراحة استغليته بس للامانة الموضوع اخد وقت كتير اوى يعنى من 11 الصبح لحد 5 المغرب

ده اللى انا عملته النهاردة وقولت اعملكم بيه تقرير بالصور عسى حد يستفيد منه وخصوصا ان موضوع نقص الميه ده كتر السؤال عنه هنا فى المنتدى ومكنت شبسمع حد بيجيب سيرة الطبة اللى فى وش المكنة من ناحية سير الكاتينة ولا الماسورة اللى واصلة من الشجرة للطلمبة وخصوصا الطرف اللى من ناحية الطلمبة
نسيت اقولكم ان الميكانيكى قاللى ان التاكيهات متاكلة وان ده معناه ان لمبة الزيت اكيد بتنور مع السرعة العالية "مع ان ده مبيحصلش معايا"

مستنى ردودكم ,,,
والله المستعان ...