تقييم الهوندا السيتي ، والاسبرنزا من واقع مقابلة 6/7/2007

**إسلام شاهين** · 08-07-2007 11:39 AM

أولا أحب أوضح حاجة مهمة جدا إن أنا مش خبير ولا حاجة وده رأي الشخصي البحت وأنا المسئول عنه تماما :-
الهوندا السيتي :- الشكل بالنسبة ليا معقول لكن ما هواش حلو قوي يعني تحس العربية من بره مش متناسقة مع بعضها وتحس إنها تقليد للسيفك بس تقليد وحش .
من جوه العربية وسعها حلو مع إني أنا كنت قاعد قدام مزنوق قوي ( بس يمكن عشان أنا حجمي ضخم ) بس من ورا بسم الله ما شاء الله واسعه ، صوت الموتور حلو يكاد يكون مش مسموع خالص ، أول لما جيت أطلع أنا شخصيا حسيت إنالعربية خشنة مش عارف ليه بس محمود الحفناوي قالي إن ممكن يكون كاوتش وجلب عايزه تتغير ، السحب أكثر من ممتاز العربية اوتوماتنيك ، بالنسبة للستبتوترونيك أنا عن نفسي شايف إنه مالهوش لازمة هو مجرد دلع من هوندا لزبائنها ورفاهيه زياده غير مجديه ( برضه رأي شخصي ) ثبات العربية لا جدال عليه مع إني مزودتش السرعه قوي ، في النهاية بشكر المهاتما على اتاحة الفرصة الرائعة ديه لتجربة العربية .

ثانيا : الاسبرانزا بتاعه الأستاذ جمال أبو شنب
طبعا بعيد عن إنها عربية جمال بكرر ده رأي شخصي بحت
الشكل من بره أنا مش مقتنع بيه تماما ( أذواق طبعا )
من جوه العربية الحاجه الوحيد اللي عجبتني فيها التكييف بسم الله ما شاء الله قوي جدا وموضوع الفتحات للركاب اللي ورا ده جميل ، الفتيس لما مسكته حسيت إنه بلاستيك وممكن يطلع في إيدي ، تجميع العربية مع التكييف جميل لكن صوت الموتور عالي عالي جدا ، السحب كويس وإن كان موضوع الدريكسيون ده أنا أعتقد إنه مالهوش حل العربية كانت بتدب معايا ، الخامات من الداخل رديئه ، التقفيل مقبول ، العفشه ناشفة حبتين ثلاثة .
برضه بشكر الأستاذ جمال على التجربة الرائعه ديه .
تحياتي لكم جميعا وشكرا .

**memo_hefnawy** · 08-07-2007 11:48 AM

حاج إسلام أنا كنت قولتلك مش جلب و كاوتش :) أنا كنت بقولك الكاوتش جايز منفوخ زيادة الضغط بتاعه مش مظبوط حبه + عشان الثبات تحس إنها ناشفه سنه

**إسلام شاهين** · 08-07-2007 11:53 AM

والله يا محمود يمكن من الحر أنا مسمعتش كويس بس كويس إنك وضحت ، وفيه حاجه كمان إن المهاتما كان حاطط نيتروجين في الكاوتش يمكن هو ده اللي كان مسبب النشوفية .

**memo_hefnawy** · 08-07-2007 12:08 PM

بالعكس يا زعيم النيتروجين بيطرى مش بينشف :) و أنا كمان مالى العجل عندى نيتروجين :)

أما عن الحر فالمرة القادمة إن شاء الله نقعد فى مكان ظل عن كده :)

**إسلام شاهين** · 08-07-2007 12:16 PM

أولا لو انت بتقول إن النيتروجين بيطري أمال النشفان ده كان من إيه ؟
ثانيا أنا متأكد من موضوع النشفان ده العربية فعلا كانت ناشفة بس السبب إيه الله أعلم وما اعتقدش إنه كاوتش .

**memo_hefnawy** · 08-07-2007 12:46 PM

و الله يا حاج أنا مجربتش سيتى قبل كده غير بتاعت هانى يعنى مش عارف هى فعلا كده ولا هو بس؟

النشوفيه بتيجى ممكن لو العجل ضغطه زايد فى أى عربية تحس بده و ممكن أى حاجة فى العفشة و ده مستبعد لأن العربية لسه 20 ألف و هوندا مش أى كلام ربنا يباركله فيها :)

بس دايما النشوفيه إربطها مع الثبات و النعومية مع العومان :) ده كتصميم مش تغيير

**3mr Farrag** · 08-07-2007 01:10 PM

بس دايما النشوفيه إربطها مع الثبات و النعومية مع العومان :) ده كتصميم مش تغيير[/quote]

بس مش اساسي يا محمود...يعني شوف الاكسنت اللي معايا عفشه ناشفه و الثبات ضايع

**jimmy** · 08-07-2007 02:32 PM

الأستاذ اسلام شاهين انا متفق معاه فى الكلام اللى قاله عن الإسبيرانزا بتاعتى

وبتمنى ربنا يباركله فى عربيته وكان ليه الشرف انى اقود لانسر 2007 لأول مره على يد مستر اسلام

وحقيقى حسيت بالفرق رغم انها 1300 مش زى الإسبيرانزا 1600

واضح ان اليابانى يابانى والله اكبر ما شاء الله

**fahd_628** · 08-07-2007 03:25 PM

شكرا يا استاذ اسلام على التقييمات دية

**محمد المرسي** · 08-07-2007 04:00 PM

شكراً أ.أسلام على أرائك وتقيمك .. لكن لى ملاحظة صغيرة حبيت أوضحها بالنسبة للسيارة أسبرانزا أنا معاك فى حكاية الخامات والفتيس وصوت الموتور لكن ليس بالشكل الذى تصوره .. لكن أنا عندى التكييف ضعيف والسحب مقبول والعفشة جيدة والدريكسيون ممتاز ..

أنا لا أمدح فى السيارة أو أدافع عنها لأنها معى .. لكن توضيح أن كل السيارات ليست مثل بعضها ..

وتقبل تحياتى ..