الموضوع: خطوات نقل الملكية

اول حاجة تجيب شهادة مخالفات من المرور اللي انت موجود فية دلوقتي
وتعمل شهادة بيانات مؤمنة (في حالة انتهاء تاريخ الرخصة بتاعة السيارة)
لو الرخصة سارية خلاص متعملش شهادة بيانات
وللعلم لو الرخصة انتهت هتعمل 2 شهادة بيانات واحدة للشهر العقاري وواحدة للمرور اللي هتنقل لية مفهوم
وبعدين تروح الشهر العقاري التابع لية وتعمل نقل الملكية (تبيع لنفسك)
التابع لية (حسب بطاقتك الشخصية؟) او اي شهر عقاري بس من تحت التربيزة اللهم اني صايم
هتاخد العقد وشهادة المخالفات تخليهم معاك
وتصبح من الصبح بدري الساعة 8 علي المرور
تجيب ورق الفحص ( البيئةوالسيارةوالطفاية)
تاخد البصمة وتفحص وتشوف البيئة وهيختم علي كل ورق الفحص
وبعدين تروح تقف علي شباك الملاكي تقدم الورق بتاعة انت معاك اية دلوقتي (العقد بتاع العربية مش بقت باسمك*والمخالفات والرخصة*والنمر)
الموظف هيقولك هات اذن صرف نمر*وادفع التامين*ونموذج 351*3
صورة بطاقة *وشوية دمغة وخوزعبلات واللذي منة *وملف العربية *واذن ايصال كومبيوتر )
وبعد كدة تروحلة تاني هياخد منك كل دة وهياخد النمر القديمة وهيقولك ادفع الضربية ويديك وصل تروح الخزنة
ترجعلة بالوصل وهيرجعك تجيب حاجة كمان بس مش عارف اية مش فاكر 5 جنية باين
وبعدين هيقولك خلي ظابط الوحدة يمضيلك علي ورق الفحص وبعدين خلاص هياخد كل حاجة ويقولك اقعد
ملحوظة
1-لو هترخص 3 سنين يبقي هتجيب نموذج 351 (3 نسخ )معاهم طابع شرطة
2-لو هترخص 3 سنين هتدفع تامين 3 سنين وضريبة 3 سنين
3-هياخد منك اصل العقد ابقي صورة خليك معاك
4-يكون معاك اصل البطاقة الشخصية
5-في الفحص ابقي اغسل العربية كويس وفك النمر خليها جوة معاك
6-اغسل الموتور (الحوض ) عشان البصمة
7- اي حاجة في بلدنا الوسخة تروح بدري عشان لو طلع خابور تلحق تفادية
اوكي كدة انا قلت كل حاجة عندي واللي عايز يعرف حاجة يقولي وانا مش هتاخر