استفتاء بخصوص شركات التأمين

**digital_joe** · 23-09-2008 06:40 PM

يا جماعة انا ناوى اشترى عربية و طبعاً لازم تامين لأن احتمالات الخبط و الخدش (لا قدر الله) بتزيد بمعدل 500 مرة فى المحروسة عن اي بلد تانى بسبب وجود حاجات كتيرة منها على سبيل المثال و ليس الحصر:
1.أتوبيسات النقل العام و النقل الخاص و السياحة بالاضافة الى الميكروباصات و المينى باصات و التاكسيات والتوك تك و العجل و الموتوسيكلات وعربيات النص نقل و عربيات النقل و المقطورة و الجرارات مع وجود متميزللمشاة
2.الكبارى و الانفاق و الطرق (المستقيمة والدائرية والبيضاوية) و المحاور(الراسية منها و الافقية) وما تحتوية من جبال المطبات وهضاب البلاعات المغطاة وغير المغطاة.
3.الحاجات اللى بتقع من البلكونات و البلكونات أو العمارات التى بتقع بنفسها و واحتراق مبانى الدولة بفعل ماس كهربائى.
4.بعض عوامل الطقس زى المطر و الرياح الخماسينية و الزلازل و سقوط الصخور من الجبال و فيضان مياة الصرف الصحى.

اعذرونى على التطويل لكن دى مقدمة منطقية و استهلال لابد منه. :laugh2:

المهم بالبحث و الفحص تبين ان سوق التامين فى مصر فيه 3 لاعبين اساسيين:

الجمعية: اقل سعر تامينى( 1.6% من ثمن العربية) مع مستوى خدمة يتميز بالسمعة اللى زى الزفت و تطويل فى الاجراءات و فصال فى المبالغ و ما خفى كان اعظم.
كونتكت كار: خدمة ممتازة و سريعة لكن فى عيبين قاتلين. أولا:السعر غالى جدا (من 3.5% الى 4.5% من تمن العربية حسب بلد العربية اسيوى ولا اوروبي ولا امريكى). ثانياً :هناك شرط ان الشركة هاتتحمل مصاريف تصليح اول خبطة بس. بعد كده العميل يتحمل نسبة 15% من مصاريف تصليح الخبطة الثانية و 25% من كل الخبطات اللى بعد كده و فى رايى ده استهبال لانك مامن و دافع كتير ازاى ترجع تدفع تانى فى التصليح.
اليانز: اختلفت فيها الاراء و بصراحة انا معنديش حد جربها عشان يقول ايه نظامها بس على حسب ما سمعت هى ارخص من كونتكت و الخدمة اقل منها لكن مش كتيربس على الاقل مفيش حكاية اول و تانى خبطة دى. عيبها انك لو هاتصلح فى التوكيل تدفع و بعدين هما يحاسبوك و الطريقة دى اثبتت فشلها فى مصر.

طيعا الكلام الى فوق ده جمعته من نايل موتورز و من بعض التجارب الشخصية لاصدقائى. أنا شايف ان عشان النقييم يبقى موضوعى اكتر محتاجين ناس من الزملاء الاعزاء يكونو جربوا الشركات دى و كل واحد يحكيلنا تجربته بدوت تحيز و بشرط ان ما يكونش يعرف حد هناك لانك لو تعرف حد فى الشركة هتتعامل معاملة غيرالباقيين.

انا بمجهودى المتواضع كتبت الاسئلة اللى جاية و شايف انها ممكن تستعمل لتقييم اداء الشركات التلاتة دى او اى شركة تانية:

ما هى نسبة التامين و هل يتم السداد باقسط شهرية ام سنوية؟
فى حالة ان القسط شهرى هل يتم تحصيل باقى الاقساط الشهرية لو- لاقدر الله - عملت حادثة وهاتستعمل التامين؟
هل يتم خصم نسية اهلاك يتحملها العميل فى حالة الحوادث لا قدر الله؟ و كيف تحتسب هذه النسبة؟
ما هى الحالات التى لا يشملها التامين؟ (مثلا الكوارث الطبيعية)
فى حالة الحوادث- لا قدر الله- بعد ما العميل يتصل او يروح الشركة هل يتم تسليم العميل مستند يفيد ان الشركة اخطرت(بضم الالف) بالحادثة ؟ (عشان لو حبينا نشتكى الشركة لجهاز الرقابة على التامين ولا اى جهة يبقى معانا حاجة تثبت حقنا)
فى حالة الحوادث- لا قدر الله- هل تقوم الشركة بتوفير ونش لنقل السيارة المامن عليها لو تطلب الامر؟ و هل توفرسيارة بديلة للعميل لو التصليح ها يطول؟ و هل فى مصاريف للخدمات دى(الونش و العربية البديلة) ولا مجانية ؟
فى حالة الحوادث- لا قدر الله- ما هى الاجراءات و المستندات المطلوبة من العميل لمطالبة شركة التامين؟هل يشترط تقديم محضر شرطة بالحادث ؟وهل يشترط تصوير السيارة بعد الحادث؟
هل يتم احتساب مصاريف ادارية لكل حادثة؟ و كم تبلغ؟ (مثلا فى شركات تاخد منك 300 جنيه مصارف فتح ملف كل مرة العربية تعمل حادثة)
هل يتحمل العميل نسبة من مصاريف الاصلاح فى حالة تكرار الحوادث؟ (مثلا كونتكت تتحمل مصاريف تصليح اول خبطة بالكامل بعد كده العميل يتحمل نسبة 15% من مصاريف تصليح الخبطة الثانية و 25% من كل الخبطات اللى بعد كده)
فى حالة الحوادث- لا قدر الله- هل يتم التصليح فى مراكز تخص شركة التامين ام فى التوكيل؟
فى حالة التصليح لدى التوكيل هل يقوم العميل بالدفع و يطالب شركة التامين بموجب ايصالات و فواتير من التوكيل ام تقوم شركة التامين بالدفع للتوكيل مباشرة دون تدخل من العميل؟ و لو العميل دفع ياخد فلوسة من التامين فى خلال اد ايه؟
فى حالة التصليح لدى التوكيل هل مطلوب من العميل تسليم قطع الغيار المستبدلة لشركة التامين؟ ولو هايسلمهم الحاجات اللى اتغيرت هايسلمها ازاى؟
هل يشمل التامين حالات الـ Total Loss(خسارة كلية) و متى تعتبر الحالة خسارة كلية (مثلا لو التصليح يتكلف 50 او 60 فى المية من ثمن الجديدة)؟ و فى هذه الحالة هل يتم خصم نسبة اهلاك؟ و كم تبلغ هذه النسبة؟
هل يشمل التامين حالات الـسرقة؟ وما الاجراءات و المستندات المطلوبة من العميل لمطالبة شركة التامين فى هذه الحالة؟و هل يشترط قيام الشركة بعمل تحقيقات بمعرفتها؟و هل يشترط انتظار فترة معينة قبل دفع التامين للعميل (6 شهور مثلا) وهل يتم خصم نسبة اهلاك؟ و كم تبلغ هذه النسبة؟

احنا محتاجين 3 اعضاء يكونو جربوا الشركات التلاتة و يجاوبوا على الاسئلة دى ساعتها نعرف بجد مين احسن واحدة

اسف مرة تانية على التطويل و شكرا ليكم

**digital_joe** · 26-09-2008 12:34 AM

ابه يا جماعة فين الردود

**dedodode** · 26-09-2008 05:25 AM

بص يامان بالنسبه لكونتاكت الكلام ده بتاع 15 % وكده ده فى الحوادث الكبيره لاقدر الله
مش الخبطات

**amir** · 26-09-2008 05:46 AM

انا في مشوار التأمين حاليا و دي ملاحظاتي:
كونتكت اول حادثه عليهم التانيه بتتحمل 15% التالته بتتحمل 25% و كذا الرابعه و هكذا
و الايرباج بتتحمل 25% من قيمه استبداله
و نسبه التأمين 3.75% او 4%
انا شايف انها غاليه جدا لو حطيت في الاعتبار انك هتتحمل 15% من الحادثه التانيه و 25 % من التالته

معرفش كتير عن الليانز بس واحد في المنتدي كان بيشكر في مصر للتأمين و روحتلهم و النسبه كانت 2.1% مع تحملهم الكامل للحوادث باستثناء الاير باج اللي بتتحمل 25% من تكلفته, بس حصلتلي هناك مشكله ان الراجل بتاع المعاينه عايز يخرج فانوس من التأمين لأنه منقور ده غير الاكصدامات عندي متجرحه التجريح العادي بتاع الركن و الارصفه عايز برضو يخرج دهانهم من التأمين
و الحل معاهم اني هروح يوم السبت و احاول اراضيه و لو منفعش هحاول اتفاهم مع حد كبير في الشركه و لو منفعش هشوف حد غيرهم أأمن معاه
العربيه النهارده حيوان كان متخذها كرسي (حد شاف كرسي او كنبه ب 93 الف جنيه؟!!) و بنطلونه الجينز كان الظاهر فيه كباسين و بوظلي دهان نص الشنطه( لما اشوف بتاع التأمين بقي هيقولي ايه علي التجريح ده لأني ممكن اضربه فيها, كان زماني مأمن)

**KiNgMaX** · 26-09-2008 04:36 PM

--انا كنت السنة اللى فاتت مامن مع Aig Egypt والسنة دى مع اليانز
بالنسبة ل Aig انا كنت مامن بنسبة 3 % من تمن العربية (كانت زيرو ) دفعت 2700 جم (كاش طبعا ) (تويوتا ياريس مانوال )
--المهم التحمل عندهم لو سن المؤمن اكتر من 25 سنة بيبقى 100 فى الحادثة
لو سن المؤمن اقل من 25 سنة بيبقى 350 جم فى الحادثة
( خد بالك من كلمة فى الحادثة دى مش فى الإخطار بالكامل )
--الشركة متعاقدة مع عدد كبير من مراكز التصليح المعتمدة اللى ممكن تصلح فيها من غير ماتدفع حاجة غير التحمل اللى عليك
--بالنسبة للتصليح فى التوكيل لازم تدفع الاول وبعدين تروح الشركة تقدم الفاتورة وتاخد فلوسك بعد خصم نسبة التحمل ( خد بالك ان المشكلة هنا عند التوكيل مش من عند شركة التامين بمعنى ان التوكيل اصلا مش متعاقد مع ولا شركة تامين )
--فى حالة حدوث حادث لاقدر الله يشترط عمل محضر فقط اذا تعدت قيمة الإصلاحات مبلغ 5000 جم اقل من كده مش محتاج غير إخطار
--المفروض بيكون فيه نسبة اهلاك للقطع المستبدلة يتحملها العميل
--المفروض برضه القطع المستبدلة يتم تسليمها لشركة التامين
--- كل اللى فات ده كان الشروط بتاعة الشركة نيجى بقى للتجربة الفعلية
العربية كان فيها كام خبطة فى الاكصدام الخلفى والفانوس الخلفى كان مترب من الداخل يعنى تقريبا كان فيه فتحة بسيطة بتدخل تراب وكان فيه خبطة فى الامام بين الرفرف والإكصدام
رحت عملت الإخطار فى الشركة وطلعت على التوكيل عملت المقايسة وجه المندوب عاين ووافق على كل البنود بما فيها تغيير الفانوس والإكصدام ورش اجزاء بتكلفة 3300 جم
المهم صلحت ودفعت واخدت القطع القديمة وطلعت على التامين قدمت الفاتورة قالى الشيك كمان اسبوع فلما سالته بكام قالى اخصم التحمل اللى عليك تلاقى قيمة الشيك (التحمل 350xحادثتين يعنى 700 جم حادثة خلفية وحادثة امامية )
بعد اسبوع رحت سالت على الشيك لقيته جاهز فعلا بمبلغ الفاتورة-ال700 جم بدون اى تحملات اخرى ولا إهلاك ولا تمن القطع اللى خدتها ولا ضرايب ولاغسيل العربية وتشحيمها حتى
خدت الشيك وطلعت على البنك صرفته وشكرا Aig
-- السبب الى خلانى سبتهم فى التجديد لقيت القسط زاد جامد هيوصل ل 3200 جم عشان غرمتهم خلال السنة وبينى وبينك انا كنت متضايق من موضوع ال 350 جم لكل حادثة
--نروح لأليانز اللى مفيش 2 اختلفو على سمعتها الطيبة
امنت معاهم ب 3.5 % من قيمة العربية بعد خصم 10% إستعمال سنة يعنى بقيمة 79000بدل 88000 للزيرو نفس الكلام اللى فوق بس التحمل 300 جم للإخطار بالكامل ايا كان
--بالإضافة الى شوية مميزات زى خدمة الونش لحد 200 جم جوه البلد و350 بره
--تعويض مدنى للغير يصل ل 100000 جم
--تامين على الركاب بحد اقصى 100000جم لكل الركاب
--المهم على مايبدو انهم ناس محترمة جدا وعلى فكرة مفيش محاضر برضه إلا فى الحوادث الكبيرة لاقدر الله
ده المعلومات الاكيدة عندى عن الشركتين عن تجربة
اللى بقى عندى معلومات عنه عن السمع الجمعية الاهلية للتامين التعاونى
كل اللى اعرفه عنها انها أسوا شركة تامين فى مصر انصحك تبعد عنها لان اكيد سمعتها السيئة مش من فراغ
اى استفسار او اى حاجة تحب تسال عنها انا تحت امرك

**digital_joe** · 26-09-2008 06:04 PM

استاذ KiNgMaX شكرا على ردك الوافى. انا كان عندى شوية اسئلة بخصوص اليانز:
1.القسط سنوى ولا شهرى؟
2.يعنى ايه خدمة الونش لحد 200 جم جوه البلد و350 بره؟ يعنى لو الونش عايز 300 جوة البلد هما يدفعوا 200 و انت 100 ولا ايه؟ طب ومين اللى يجيب الونش؟ تكلمهم و هما يبعتهولك ؟ ولا تجيبوا و تحاسبو انت و بعدين تروح لاليانز تاخد فلوسك؟
3.ممكن نوضح ازاى مفيش محاضر إلا فى الحوادث الكبيرة ؟ يعنى مثلا مبلغ كام يعتبر حادتة كبيرة (5 الاف ولا اكتر ولا اقل؟)
4.بيحسبوا نسبة اهلاك؟ و لو بيحسبوا النسبة قد ايه؟ يعنى انا لو لا قدر الله عملت حادثة و هاغير رفرف بالف جنية مثلا يدفعوا الالف و لا يحسبوا 10% اهلاك و يدونى 900 (طبعا غير انى هادفع ال300 جم بتاعت التحمل)؟
5.لو دفت انت للتوكيل بتاخد منهم الشيك فى وقت اد يه؟
6.ماعندهمش نظام كونتكت (مصاريف تصليح اول خبطة عليهم بالكامل بعد كده العميل يتحمل نسبة 15% من مصاريف تصليح الخبطة الثانية و 25% من كل الخبطات اللى بعد كده)؟
7.بالنسبة للقطع المستبدلة هل يشترط تسليمها لشركة التامين؟
8.هل يشمل التامين حالات الـ خسارة كلية و متى تعتبر الحالة خسارة كلية (مثلا لو التصليح يتكلف 50 او 60 فى المية من ثمن الجديدة)؟ و فى هذه الحالة هل يتم خصم نسبة اهلاك؟ و كم تبلغ هذه النسبة؟
9.هل يشمل التامين حالات الـسرقة؟ وما الاجراءات و المستندات المطلوبة من العميل لمطالبة شركة التامين فى هذه الحالة؟و هل يشترط قيام الشركة بعمل تحقيقات بمعرفتها؟و هل يشترط انتظار فترة معينة قبل دفع التامين للعميل (6 شهور مثلا) وهل يتم خصم نسبة اهلاك؟ و كم تبلغ هذه النسبة؟
ياريت حضرتك تقولنا لو اجابتك على الاسئلة دى بناء عل كلام مكتوب فى البوليصة بتاعت التامين ولا هما قالولك الكلام ده شفوى فى الشركة.

بكرر شكرى ليك يا استاذ KiNgMaX انت و كل اللى اهتم و رد و لو حد تانى عنده حاجة يحب يضفها يبقى كتر خيره

**KiNgMaX** · 27-09-2008 04:11 AM

إن شاء الله عشان اطمنك بكره هحاول اعمل scan للبوليصة وبنود الشركة وهى مكتوبة بالتفصيل
بس بالنسبة للحاجات الى فاكرها دلوقتى
1-الدفع كاش طبعا سنويا
2- الونش هو المكتوب لحد 200 جوه البلد و350 بره بس مش موضحين تفاصيل
3- حكاية المحاضر دى متقلقش منها الا فى حالة التوتال لوس لاقدر الله غير كده مش هتفرق (النقطه دى انا سالت عليها شفهيا وده كان الرد )
4- نسبة الإهلاك برضه ماتقلقش لو حسبو اصلا بتبقى حاجات بسيطة جدا انا قلت لحضرتك ان AIG كانو كاتبين برضه النقطه دى بس ساعة التنفيذ مخدوش حاجة
5-الشيك فى AIG طلع بعد اسبوع وإن شاء الله اليانز زيهم إن مكنش احسن
6- لا مفيش النظام ده ولا اى حاجة ولاشرط كده خالص كله زى بعضه اولى او تانية او تالته
7-برضه مكتوب انك المفروض تسلم القطع و AIG يرضه كانو كاتبين كده و ساعة التنفيذ محدش سالنى على حاجة وخدت القطع
8-طبعا بيشمل التوتال لوس و تقريبا فى الحالة دى الشركة هى الى بتتحد مين الافضل تصليح العربية ولا حسابها توتال لوس والإهلاك مش هيكون كبير لانك بتامن بالقيمة السوقية للسيارة وقت التامين يعنى الياريس 2007 حسبينها ب 79000 جم يعنى بيحسبو استهلاك 10% سنويا قسمها على عدد الشهو من إصدار البوليصة وحدوث الإخطار
9- برضه طبعا التامين شامل السرقة وبيحتاج محضر وعموما نت بتكون ماضى انك مفوض الشركة فى كافة الإجراءات القانونية لمعاقبة الجانى يعنى هما بيعوضوك ويجرو هما ورا حقهم بعد كده
عموما اطمن جدا الناس دى بتبقى متساهلة جدا ومش بيدققو على تنفيذ الشروط دى بالملى واطمن عمرك ماهتلاقى شرط ولا ثغرة يغلسو عليك بيها دى شركة اجنبية وبتدفع عاى

**digital_joe** · 27-09-2008 01:09 PM

متشكر جدا يا باشا على ردودك و ذوقك. و ياريت لو عملت Scan للبوليصة بتاعت اليانز علشان الواحد يقرى البنود و يشوف ايه النظام. عموماً انا ميال لاليانز اكتر من كونتكت و شفت صورة من البوليصة بتاعت كونتكت على نايل موتورز و لما اشوف بنود اليانز هاتبقى المقارنة اسهل

عموما ربنا يجازيك خير و يباركلك فى عربيتك و ماتحتاجش تامين و لا غيره