الموضوع: ثلاثة شهور مع البوما الزيرو وثلاثة الاف كيلو وعذاااااااااااااااااااب

تصحيح المالتى لينك انعم مايمكن وبعديه التورشن بيم

المشاركة الأصلية كتبت بواسطة Ahmed TRAVCO

أنا شايف ان الناس محملة اللانسر بومة اكتر من طاقتها وعمالين يقارنوها بعربيات نزلت بعدها بعشر سنين في حين ان المفروض نقارنها بالحاجات اللي كانت بتنزل معاها زي الكورولا القديمة والنوبيرا والحاجات دي... وهي افضل من كل دول على الطريق عن تجارب... اه الكورولا القديمة كانت عفشتها مية بمعنى الكلمة وتجميعها اسرع وموفرة اكتر في البنزين... انما عدي بيها الـ120 كده واتفرج على المراجيح بقى واظن اغلب الناس اللي ساقتها هتتفق معايا...

بس لي كام استفسار بصراحة -وانا هنا مش بدافع عن العربية لأني مش من ملاكها:

1. هو الأخ الفاضل صاحب الموضوع اشترى البومة ليه طالما هية بالسوء ده؟؟ معقولة مجربهاش ولا مرة واحدة وراح على طول اشتراها؟؟ ده العربية مغرقة البلد من 2003 وتقريبا كل اللي بيسوق جربها بنفسه او ركبها مع قريبه او صاحبه الخ يعني عنصر المفاجأة ده مش موجود...

2. الناس عمالة تشتم في العربية لمجرد انها من 2003 في السوق وكأن ده ذنبها هي سبحان الله... على فكرة انا من اكتر الناس اللي مخنوقة من استمرارها لأنها وقفت سوق الشارك بسبب فرق السعر الكبير وتعود الناس والتجار والصنايعية عليها وغيره من الأسباب... بس يعني نفسي اشوف حد زعلان قوي كدة من استمرار اللانوس ولا الفيرنا مثلا وشغال هجوم زي ما بيعملوا مع البومة... والاوبترا كمان ما هي من 2006 يعني السنة دي تامن موديل ليها ومفيهاش اي نوع من انواع الأمان ولا الرفاهية ولا اي حاجة ورغم ذلك متلاقيش حد بيشتم فيها ولا في وكيلها اللي كان لسة بينزلها لحد سنتين فاتوا بكاسيت شرايط!!! وفيه امثلة كتير زي الجين2 برضه اللي من 2006 وغيرها...

3. انا ركبت الماتريكس مع زميل لي قبل كده ومشفتش فيها حاجة مميزة يعني... هي ناعمة وجراية جدا جدا بصراحة بس عادي يعني عربية عادية جدا وخاماتها وتقفيلها اقل من العادي... بصراحة ما اتوقعش اني ممكن أكره البومة بالشكل ده بعد ما اكون راكب ماتريكس!!!

4. عفشة البومة مالتي لينك وناشفة -كعادة المالتي لينك- بس مش للدرجة الرهيبة دي إلا لو الواحد فعلا كان راكب عربية مية زي ما تفضل أحد الزملاء... فمش عارف بصراحة ازاي برضه صاحب الموضوع اتفاجيء قوي كده من كل الحاجات دي رغم وجود العربية من 10 سنين في السوق؟؟؟ ومش قادر افهم برضه موضوع انها بتعوم بالطريقة دي!!! طيب ما بركبها مع زميلي مرتين تلاتة اسبوعيا والراجل بيجيب الـ170 عادي يعني مفيش الكلام ده... الـ1300 منها ثباتها مش قد كده فعلا في الملفات بس الـ1600 كويسة مش وحشة... انما اللي عايز يعرف يعني ايه تعويم يركب عربية زي الالنترا القديمة (الشكل قبل الاخير) ويبقى يقولنا عاملة ازاي في الملفات ومطبات الهوا وحتى في الطرق المستقيمة فوق الـ130 أو الـ140 ويا سلام لو نقل تقيل معدي من جنبه!!!

في النهاية: البومة عربية ياباني قدمت جدا ولكنها تظل جيدة مقارنة بالموجود حاليا وكانت ممتازة مقارنة باللي كان بينزل معاها في نفس الوقت... فبلاش نحقر منها للدرجة دي ولا نديها اكتر من حقها... هي عربية معقولة جدا بأسعار اليومين دول ومن منطلق انها ياباني واعتماديتها عالية، واللي بيشتري بيبقى عارف كده كويس... وللعلم بس... اعرف واحد معاه بومة 2007 شغال بيها مشاوير مخصوص من القصير للقاهرة اقسم بالله العربية عاملة فوق الـ700 ألف كم لحد دلوقتي ولسة ما شاء الله فيها خير كتير... وما اعتقدش اي حاجة كوري تقدر على الرقم ده...

مين اللي قالك بس اني عفشة البومه مالتي لينك ده في شرع مين ده انت عشان شايفها مش جايه عمود واحد تبقى مش تورشن تبقه. اكيد بقه مالتي لينك لا طبعا ده عفشة البومه نوع عفشه قذر لا يرتقي انه يكون تورشن بيم حتى مش مالتي لينك عارف يعني ايه مالتي لينك يعني كل فرده ليها 4 support تلاته بالعرض وواحده بالطول وكل واحده بت absorb قوه معينه وكل واحده بتشتغل independent عشان يدوك maximum ثبات وتديك performance خيالي ده غير ال antiroll bar وكل ده خلي بالك على فرده واحده فقط ده نظام مصروف عليه ومتكلف ومش بينزل في عربيات كتير اوي عشان مكلف جدا جي تقولي البومه مالتي لينك!!!!!!! البومه مالتي فلتان مالتي تعويم مالتي زحاليق ومراجيح وعادي على فكره انك تجيب بيها 170 ايه المشكله اومال هيا اسمها عربيه ليه معشان تمشي بيها وتسافر والعربيه مش رخيصه اوي يعني بس الفكره ثباتها ضايع ولا يعتمد عليها على السرعات دي بتاتا......

المشاركة الأصلية كتبت بواسطة hossam_elwani

تصحيح المالتى لينك انعم مايمكن وبعديه التورشن بيم

لا الكلام ده مش بيتحسب بالطريقه دي في شركات بتعمل كده وكده وعلى حسب ال coil spring وعلى حسب وعلى حسب لسته طويله حجات كتير ممكن مثلا تلاقي عربيتين تورشن واحده ناعمه جدا والتانيه. ناشفه حجر كل الشركه ليها طريقتها ومبادئها

بالنسبة لسؤال انا اشتريتها ليه رغم وجودها في السوق بقالها اكتر من عشر سنين هقولك بسبب اني سمعت كلام المبالغين على المنتديات في وصف العربية وللاسف اتعلمت درس اني ماخدش معلومة من النت ابدا مدى الحياة والحمد لله

المشاركة الأصلية كتبت بواسطة saddam

صديقي المواطن
من سنوات طويلة وأنا أنادي وبقول يا إخواننا الميتسوبيشي لانسر إحنه نافخينها بما لا بستحق وهي مش عربية عليها العين يعني وشكلها مش حلو يمكن الطبلوه بس حلو غير كده لا أمان ولا إتزان ولا أي حاجة غير إنها بتتباع بسرعة وفشلت في كل الدول اللي راحتها كل الدول العربية
أما عن مشاكلك فبسيطة وممكن حلها
العزل ب 1000 جنيه تحل الصالون والبيبان وتعزلها بالكامل
التكييف يا إما عندك فيه نقصان يا فيه زيادة الفريون فكل شوية بيفصل
نشوفية العفشة تنزل ظغط الهواء ل 30 وتحط نتروجين ولو لزمت تجيب كاوتش طري زي لاسسا أو يوكوهاما ولو مرتحتش غير نظام المساعدين لنوع زيت فقط
كل مشاكلك بسيطة ولكن الغلط من عندك وحرام وإزاي طاوعك قلبك تجيب عربية بقالها 10 سنين بنفس الشكل وتدفع فيها فلوس عشان كده مش مطاوعني قلبي أقلك إصرف عليها ولكن مشاكلك بسيطة فحلها
ومن غير زعل من ملاك لانسر لكن العربية دي إنتشرت في مصر بسبب مثل عربي قديم بيقول
من قلة الخيل ركبوا للكلاب سروج
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

اخي انا معايا لانسر شارك وعزلها برضه قمه في السوء وعايز اعمل موضوع العزل ده ياريت لو توصفلي حد كويس لان العربيه علي الطريق وخصوصا لو علي سرعه عامله زي التريللا فعلا
وشكرا