أنا شايف ان الناس محملة اللانسر بومة اكتر من طاقتها وعمالين يقارنوها بعربيات نزلت بعدها بعشر سنين في حين ان المفروض نقارنها بالحاجات اللي كانت بتنزل معاها زي الكورولا القديمة والنوبيرا والحاجات دي... وهي افضل من كل دول على الطريق عن تجارب... اه الكورولا القديمة كانت عفشتها مية بمعنى الكلمة وتجميعها اسرع وموفرة اكتر في البنزين... انما عدي بيها الـ120 كده واتفرج على المراجيح بقى واظن اغلب الناس اللي ساقتها هتتفق معايا...

بس لي كام استفسار بصراحة -وانا هنا مش بدافع عن العربية لأني مش من ملاكها:

1. هو الأخ الفاضل صاحب الموضوع اشترى البومة ليه طالما هية بالسوء ده؟؟ معقولة مجربهاش ولا مرة واحدة وراح على طول اشتراها؟؟ ده العربية مغرقة البلد من 2003 وتقريبا كل اللي بيسوق جربها بنفسه او ركبها مع قريبه او صاحبه الخ يعني عنصر المفاجأة ده مش موجود...

2. الناس عمالة تشتم في العربية لمجرد انها من 2003 في السوق وكأن ده ذنبها هي سبحان الله... على فكرة انا من اكتر الناس اللي مخنوقة من استمرارها لأنها وقفت سوق الشارك بسبب فرق السعر الكبير وتعود الناس والتجار والصنايعية عليها وغيره من الأسباب... بس يعني نفسي اشوف حد زعلان قوي كدة من استمرار اللانوس ولا الفيرنا مثلا وشغال هجوم زي ما بيعملوا مع البومة... والاوبترا كمان ما هي من 2006 يعني السنة دي تامن موديل ليها ومفيهاش اي نوع من انواع الأمان ولا الرفاهية ولا اي حاجة ورغم ذلك متلاقيش حد بيشتم فيها ولا في وكيلها اللي كان لسة بينزلها لحد سنتين فاتوا بكاسيت شرايط!!! وفيه امثلة كتير زي الجين2 برضه اللي من 2006 وغيرها...

3. انا ركبت الماتريكس مع زميل لي قبل كده ومشفتش فيها حاجة مميزة يعني... هي ناعمة وجراية جدا جدا بصراحة بس عادي يعني عربية عادية جدا وخاماتها وتقفيلها اقل من العادي... بصراحة ما اتوقعش اني ممكن أكره البومة بالشكل ده بعد ما اكون راكب ماتريكس!!!

4. عفشة البومة مالتي لينك وناشفة -كعادة المالتي لينك- بس مش للدرجة الرهيبة دي إلا لو الواحد فعلا كان راكب عربية مية زي ما تفضل أحد الزملاء... فمش عارف بصراحة ازاي برضه صاحب الموضوع اتفاجيء قوي كده من كل الحاجات دي رغم وجود العربية من 10 سنين في السوق؟؟؟ ومش قادر افهم برضه موضوع انها بتعوم بالطريقة دي!!! طيب ما بركبها مع زميلي مرتين تلاتة اسبوعيا والراجل بيجيب الـ170 عادي يعني مفيش الكلام ده... الـ1300 منها ثباتها مش قد كده فعلا في الملفات بس الـ1600 كويسة مش وحشة... انما اللي عايز يعرف يعني ايه تعويم يركب عربية زي الالنترا القديمة (الشكل قبل الاخير) ويبقى يقولنا عاملة ازاي في الملفات ومطبات الهوا وحتى في الطرق المستقيمة فوق الـ130 أو الـ140 ويا سلام لو نقل تقيل معدي من جنبه!!!

في النهاية: البومة عربية ياباني قدمت جدا ولكنها تظل جيدة مقارنة بالموجود حاليا وكانت ممتازة مقارنة باللي كان بينزل معاها في نفس الوقت... فبلاش نحقر منها للدرجة دي ولا نديها اكتر من حقها... هي عربية معقولة جدا بأسعار اليومين دول ومن منطلق انها ياباني واعتماديتها عالية، واللي بيشتري بيبقى عارف كده كويس... وللعلم بس... اعرف واحد معاه بومة 2007 شغال بيها مشاوير مخصوص من القصير للقاهرة اقسم بالله العربية عاملة فوق الـ700 ألف كم لحد دلوقتي ولسة ما شاء الله فيها خير كتير... وما اعتقدش اي حاجة كوري تقدر على الرقم ده...