الموضوع: تحذير من حفر الدائري .. ومحاولة نصب وقعت فيها

الموضوع مش إختراع ...هو حضرتك بتقول إنه سبلك عنوان ...روح العنوان وشوف ...
لو طلع العنوان حقيقي يبقي أكيد مفيش نصاب بيسيب عنوانه ...
لو العنوان طلع وهمي يبقي نصاب ...

المشاركة الأصلية كتبت بواسطة saddam

صديقي المواطن
طبعا مش حتكلم في نقطة وقفت ليه ما دامت العربية ماشية وكمان إزاي سبته يغيب فترة طويلة تحت العربية وهو بيحل خرطوم الفرامل وحتكلم في نقطة إنسانيه تهمني
أنا بشد على إزرك وبحب أقلك أنا معجب بأخلاقك الوطنية وبعلو إحترامك وسمو إخلاقك وعدم الفجور والمبالغة في المخاصمة وأرجوك أرجوك إوعه تتغير وكلما زاد الناس غيا فزد أنت إحساتا وكلما أساءت إليك الدنيا أو البشر فإصبر وإحتسب ولا تقابل اﻹساءة باﻹساءة وسيبك من كلام قصار النظر ممن هم حولك بتاع إوعه تكون طيب التاس تاكلك والمحترم ملوش عيش في البلد دي
وقولا واحدا إن الله لناصرك ولو بعد حين
وأخيرا أقول
غشيم ومحترم والناس تستغلك وتنصب عليك
فأشرف وأحسن من
شخصية ملزقة وبرم وحندق وصايع وتلعب في التيت والشريط ومحدش يعرف ياخد منك حق ولا باطل
إياك تشكك في نفسك ولا في مبادئك فالعيب مش فيك ولا عليك العيب كل العيب ممن أساء
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

الصديق العزيز صدام .. اشكرك على جميل كلماتك .. الحمد لله ان الواحد لسه محتفظ ببقيه من الاخلاق الطيبة وحب الخير للناس .. لان اللى بيحصل مع الواحد فى البلد دي بيخليه يفقدها تدريجيا .. ادعيلي بالثبات وربنا يكرم ان شاء الله

ملحوظة على كلامك .. مش هتصدق لو قلتلك ان الوقت اللى يادوب لفيت فيه الكاوتش وانا واقف بره العربية .. وقفلت الباب ورحتله .. كان كافي انه يحل خرطوم زيت الفرامل ويطلعلي ايده من ورا الكاوتش فيها زيت

المشاركة الأصلية كتبت بواسطة ahmed_adham

الحمد لله انها عدت على كده بس مهم فعلا نفهم باقي القصه لما الراجل ده رجع ركب الحساس اللي جايبه ده ازاي والعربيه مفيهاش abs أصلا ده غير ان بدون الحساس العربيه بتمشي وتفرمل عادي بس بتفقد خاصيه ال abs مفعولها وبعدين لما رحت التوكيل مشافوش الحاجه اللي ركبها الراجل ده وقالولك عليها؟ الحمد لله مره تانيه وعدت على خير.

1- الراجل مجابش حساس ولا ركب حاجة اصلا .. والتوكيل قالي كل حاجة سليمة ومفيش اي مشاكل خالص فى الفرامل .. ولو كانوا لاحظوا ان في حاجة غلط كانوا قالولي (خصوصا ان القطعة اللى هو ركبها كما يدعي كانت لسه راكبه بقالها يومين .. يعنى هتبان)
2- العربية اصلا مفيهاش حساس .. وغير مجهزة لان يكون فيها حساس كما اخبرني مهندس الصيانة اللى خرج معايا لتجربة الفرامل قبل ما يكشف عليها)

اللى حصل انه لما رجع وانا كنت بكلم واحد صاحبي يجيلي علشان كنت خايف من ان الميكانيكي ده يسرق العربية كلها خصوصا اني على الدائري .. لما رجع طلب مني ادخل جوه العربية وافتحله الكبوت علشان يزود زيت الفرامل .. وعلشان يخرج الهوا من خرطوم الفرامل بيطلب مني ادوس فرامل واسيب بشكل متتابع وبعدها ادوس دوسة جامدة .. علشان كده طول الفترة اللى هو كان بيركب فيها الحساس الوهمي ده .. انا كنت فى العربية ومكنتش واقف على راسه
الحمد لله على كل حال

المشاركة الأصلية كتبت بواسطة hulkyehia

السلام عليكم ورحمة الله وبركاته
يعنى الراجل ده ماشى امام الحفرة 24 ساعة العربية الى تقع ينصب عليها
اكيد الراجل ده حاول يساعدك وممكن يكون الخرطوم فلت فعلاً ولو على سرعة الراجل
ممكن يكون نزل نزلة العمرانية انت تكلمة وتعطية حقة لانك ارتضيت الموضوع ولو نصاب
ربنا يعوض عليك

وعليكم السلام ورحمة الله وبركاته
1- في فرق انه يكون واقف قدامها وانه كان ماشي معايا ولما حصل اني وقعت فى الحفرة ووقفت راح واقفلي .. وبين انه ينصب عليا في فرصة لقاها قدامه واستغلها
2- لو الخرطوم فلت فعلا .. ايه لازمة اختلاق قصة الحساس دي؟؟!!
3- جرب حضرتك كده في اي يوم .. الساعة 5 ونص من نزلة البحر الاعظم .. كمل لحد نزلة الطالبية وانزل منها .. اركن وانزل اشتري اي كيس شيبسي حتى .. ولف من تحت الدائري وارجع تانى لحد مخرج البحر الاعظم بس من الناحية التانية .. وشوف هتاخد منك وقت قد ايه (لا يمكن باي حال من الاحوال انها تكون اقل من 20 دقيقة).. فما بالك بانه نزل دور على محل يشتري منه قطع غيار للكيا واشترى الحساس ورجعلي كمان .. مع الاخذ فى الاعتبار ان عربيته 128

المشاركة الأصلية كتبت بواسطة anxs111

الموضوع مش إختراع ...هو حضرتك بتقول إنه سبلك عنوان ...روح العنوان وشوف ...
لو طلع العنوان حقيقي يبقي أكيد مفيش نصاب بيسيب عنوانه ...
لو العنوان طلع وهمي يبقي نصاب ...

اكيد كلامك صحيح .. وانا فعلا بفكر في كده .. لكن مش هتصدق لو قلتلك انه في كلامه قالي على حاجات متناقضة .. في الاول قالي انه كان فاتح ورشة فى اكتوبر وبعدين قفلها لما عمل حادثة وفتح ورشة فى فيصل بيشتغل فيها بليل بعد ما يخلص شغله الصباحي فى مقار (الكلام ده كان اثناء تركيب الحساس) .. بعد ما خلص واثناء ما بحاسبه لما لقيت الفلوس مش هتكفي سألته انت ورشتك فين وانا هجيلك بالفلوس .. تخيل قالي ايه؟؟ قالي انا ورشتي في الحرفيين ... بس ممكن تعدي على ورشة الحاج والده فى الرمايه .. قلتله فين فى الرماية؟؟ قالي عارف جاد؟ الشارع اللى بعديه على طول يمين هو والده فاتح ورشه هناك اسمه ابراهيم مرجان (ياريت حد يفيدنا هل فعلا في حد بالاسم ده هناك ولا لأ)
يعنى من اكتوبر لفيصل لمقار للحرفيين للرماية .. اروحله فين بقه؟

المشاركة الأصلية كتبت بواسطة qkash.com

هو مش جابلك حساس فعلاً و زيت....مش ممكن يكون هو صادق وانت مش واخد بالك

انا علي فكرة مش بكذبك بس بافترض حسن النية...واكيد هو اشترالك حاجة فعلاً والله اعلم تمنها كام طبعاً بس هو اشتري حاجة

المفروض انك انت اللي تعرف وتوضحلنا هو اشتري ايه بظبط وركبه

عموماً انا بحاول افهم تفاصيل اكتر ومش عايزك تفترض سوء النية ويرجع عليك الأمر بذنب ويكون هو مظلوم

وانت مدين له بباقي المبلغ

والله ده خوف عليك من ذنب قد تقع فيه "هو مش قريبي ولا انا بدافع عنه ولا اعرفه اصلاً ولو نصاب ربنا ينتقم منه ويعوضك بالخير"

ولكن خوفي عليك انت من انك تظلمه وتتحمل ذنب بدون قصد

اتمنى ان الردود والتوضيحات السابقة كافية لتوضيح اللبس اللى حاصل .. ثانيا انا والله العظيم مش هتفرق معايا الـ 100 جنيه الباقية علشان ادخل فيها النار .. لكن والله العظيم لو انا عندي شك انه مكانش في نصب ولا حاجة والله كنت رحت اديتله الفلوس

بس انت قولت ان الدواسه كانت واطيه فعﻻ وامت بتوقغ العربيه ... وبعدين عمر الشيطان ما كان كﻻمه صح

حصل معايا موقف مشابه وفي نفس المكان ،،من سنه تقريباً بس كانو 2 مش ميكانيكي واحد كمان ،، وشغل النصب على الدائري كتير اوي ،، ربنا يسترها معانا مبقاش فيه ضمير ولا اخلاق المهم يطلع منك باي مصلحه .

شفت حاجات في ايده .. لكن عمري ما هفهم ايه بالضبط اللى معاه ده

كان معاه علبة زيت فرامل .. وحاجات تانية في ايده انا مش فاهمها

صحيح انى غلطت وموقفتش على راسه وهو بيركب الحساس اللى بيقول عليه .. واني سمعت كلامه ودخلت العربية علشان اكارك الفرامل .. بس يلا الحمد لله

على العموم .. ربنا ما يجعل حد فى موقف زي ده .. وانا كاتب الكلام ده علشان ناخد بالنا