الموضوع: عاوز اسافر الامارات .. أيه المطلوب ؟!

و الله انا من رأيي برده انك مش تسافر من غير عقد عمل بيبقى الموضوع صعب جدا و مكلف و مجهد و كمان من غير امل فى شيء لكن برده انت ليك حق التجربه

على العموم هاقولك تعمل ايه بالظبط باقى التكاليف لانى لسه راجع من دبي اصلا

انت الحل انك تجيب فيزا سياحه بتكون مدتها شهر فى الامارات تقدر تقعد بيها هناك شهر و بتكون على دبي لكن تقدر تدخل بيها من اى مطار مش مهم انا عن نفسي كنت داخل من مطار الشارقه

الفيزا السياحه بتطلع من هناك من الامارات بتكلفه حوالى 450 ل 1000 درهم على حسب الوقت اللى انت بتحجزها فيه بيختلف سعرها و فى مكاتب هنا فى مصر بتطلعها بحوالى 2000 جنيه و من غير تأمين و اياك تدفع تأمين فى اى شركه لانها اصلا بتطلع من غير تأمين من بلدها

بكده عندك فى الفيزا حلين يا اما تشوف حد هناك اصلا صاحب او قريب يطلعهالك من اى شركه سياحه و الموضوع دلوقتى بقى سهل عشان العلاقه بين مصر و الامارات متحسنه

يا اما تشوف مكتب هنا يطلعهالك و تكلفتها حوالى 2000 جنيه او اقل بحاجات بسيطه و ممكن اقولك على كذا شركه تسأل فيهم هنا فى مصر

بعد الفيزا ما توصلك على الميل هتطبعها و هتبقى كده مصرح ليك انك تدخل الامارات لفتره شهر 30 يوم و يبدأوا من ساعه ما تدخل الامارات و بيكون قدامك وقت عشان تدخل الامارات حوالى 60 يوم من تاريخ صدور الفيزا

بعد كده دور على تذكره سفر و خليك على العربيه رخيصه و لذيذه و سهله ممكن تحجزها اونلاين و عشان توفر احجز ذهاب بس مش زهاب و عوده هتلاقيها مش هتكمل ال1000 جنيه لو فى ميعاد كويس و لو بعدت الميعاد شويه هتلاقيها ارخص اكيد و بعد كده لما توصل ابقى احجز من هناك عوده بيكون هناك فى عروض كتيره و اوفرات هتلاقيها ارخص من هنا بكتير

بالنسبه للفنادق فى فنادق كتيره فى دبي بس غالبا هتبقى غاليه ممكن تدور على فندق فى الشارقه و عندك موقع بوكينج هتلاقيه مليان و مليان عروض كمان و فى حل تاني انك تدور على شقه فندقيه

ده بتكون شبه الاستوديو كده بس بخدمات فندقيه و تقدر تحجزها مده مثلا شهر و هتبقى بسعر ظريف ارخص شويه من الفنادق

ده اللى انا عملته بالظبط و انا مسافر و لو فى اى سؤال تاني انا معاك

المشاركة الأصلية كتبت بواسطة secret-man

بس الى اعرفه موضوع تذكره الطياره لازم يكون ذهاب وعوده محجوزين فى تكت واحده علشان هو خارج سياحه وراجع والمطار هيرجعه لو لاقاها ذهاب بس

و الله يا باشا انا مسافر كده يوم 17-10 اللى فات و طالع بتذكره ذهاب فقط على العربيه من مطار برج العرب

المشاركة الأصلية كتبت بواسطة jackson_75

السلام عليكم ورحمة الله وبركاته

أنا للاسف شغال فى مجال السياحة مرشد سياحى ، وللاسف مفيش أى سياحة عدلة شوفنها من يوم الثورة فى 2011 . يوم نشتغل وعشرة لاه . شهر نشتغل و6 شهور لاه . وطبعاً زى ما انتوا عارفين خد من التل يختل ..!!!

أنا عاوز اعرف بكام فيزة الامارات .. وهل ينفع اخد الفيزا مباشر من السفارة ،أيه هى الاوراق المطلوبة لعمل الفيزا ؟

عاوز اعرف أيه أسعار السكن . يعنى ارخص سعر لفندق أو أرخص سعر لحجرة فى سكن عاملين لمدة 10 أيام ؟!

شاكر جداً لحضراتكم

شوف يا زعيم انا هتكلم بصوره عامه على الشباب المصرى اللىبيخوض التجربه دى يعنى انا مليش دعوه لو انت مئرش شويه انا هتكلم على اسوأ الاوضاع
انا كنت شغال فى ابو ظبى مدير علاقات عامه كان مكتوبلى كده فى بطاقة العمل مش مندوب و كنت مسؤل عن حاجات كتير من ضمنها طبعا التعامل مع وزارة العمل والعمال و ادارة الجنسيه الجوازات يعنى و قابلت مصريين قد عدد شعر راسى منهم المئرش و منهم اللى بياكل فى اليوم وجبه واحده و بيلبس بنطلون واحد فى السنه
و انا راجع بمزاجى و معنديش ختم كنسله على الجواز بالنسبالى كانت حاجه نفسيه لان دول خنازير و عنصريين بطريقه قذره و انا مقدرش اقعد مع ناس بالنوعيه دى
هحاول افيدك على قد ما اقدر بغض النظر عن ايه اللى انت عايزه بالظبط من السفر و انت تنتقى اللى يفيدك
طيب بداية نمسك المعطيات اللى عندك بكاروليوس تربيه اجادة لغه انجليزيه و روسيه رخصه قياده مصريه خبره كبيره فى العمل السياحى
طيب اعتقد ان انت عندك اكثر من 35 سنه يعنى اكيد ليك حياه هنا و اسلوب حياه اتعودت عليه
طيب بالنسبه للامارات هل عند قرايب او اصدقاء يخدموك بجد
كون ان انت تطلع بعقد عمل من مصر ده شىء صعب كتير و محتاج خدمه جامده من حد شغال هناك زى ما قولنا
طيب لو نحينا الموضوع ده يبقى لك فيزة زياره و فيزة سياحه
انا كان مجال شغلى فى ابو ظبى و العين و ما بينهم مروحتش دبى و الشارقه الا مرات قليله
لو عندك قرايب درجه اولى بيعملولك فيزة زياره بكل سهوله بس كان على ايامى لازم يكون الراتب 5 الاف درهم طيب لو مفيش ممكن لو حد قريبك بيشتغل فى مكان خاص و علاقته جيده مع المواطن صاحب مكان العمل يجيبك فيزة زياره على مكان العمل طيب مفيش يبقى اى حد من صحابك بيعملك فيزة سياحه من شركة سياحه و بيكتبوه شيك على نفسه ب 5 الاف درهم حق الغرامه اللى هتعملها الجوازات على مكتب السياحه لو انت هربت هناك و قعدت مخالف فيه فى ابو ظبى شركه سياحه مشهوره بالموضوع ده اسمها شركة (كيش) و دى مكانها خلف مجمع ابو ظبى للذهب و هيئة البريد اما فيزة السياحه فى حد زاتها تكلفتها اعتقد لانى الصراحه معتش فاكر 200 درهم و هى مصاريف طباعة ورقة طلب فيزة السياحه من الجوازات ما هو اكثر من ذلك تعرف ان صاحبك بيشتغلك
ارخص طيران هو طيران العربيه لو مش موسم ممكن تلاقى التذكره رايح جاى 600 جنيه مصرى او رايح ب 300 جنيه و محدش له حاجه عندك ولا هيقولك انت قاطع تذكره واحده ليه و السفر تبع الشركه دى بيكون من مطار برج العرب
بتدخل هناك المطار بياخدو بصمة العين و يبقى معاك 30 يوم قانونى داخل البلد
عملت الكلام ده متاخدش معاك شنطه كبيره محمله هدوم لا بكل بساطه هتخش اقرب فرع كارفور
هتجيب منه كل اللى انت عايزه و باسعار ذهيده للغايه علىقد ال 30 يوم
و بتاخد معاك الرخصه المصريه علشان لو اتوفقت فى شغل بتقدم على رخصه اماراتيه و بتنزل اختبار شارع على طول بعد 4 حصص نظرى ملهمش اى لازمه غير ان انت بتدفعلهم الف درهم
طيب انت دلوقتى دخلت البلد عند كزا طريق تمشى فيه
و لكن قبل الطرق لازم توفر لنفسك مكان للسكن
الفنادق انا معرفش عنها حاجه غير انى مره كنت فى دبى و انا سكنى فى ابو ظبى دخلت سألت على الليله فى الشيراتون لقيتها ب 700 درهم لف و ارجع تانى فى ثانيه الا ثانيه
بالنسبه للسكن عامة فى الامارات فهو اصعب شىء فى البلد يعنى انت ممكن لو طرقعت صوابعك تشترى عربيه لكن السكن ده معضله كبيره و ناس كتير بتعمل الاتى لو شغلها فى دبى فبتروح تسكن فى الشارقه بتبعد عن دبى 50 كم و لكن الحياه فيها ارخص كتير و السكن لو انت فى ابو ظبى فعندك
قرى كتير جنبها منها المصفح و بنى ياس و المفرق لو انت فى العين فكل حجه هناك ارخص كتير من ابو ظبى و دبى
طيب الشاب المصرى اللى لسه رايح و فلوسه على قده بيعمل ايه بيضطر يسكن فى غرفه عليها اربع سراير مجوز يعنى بينام فيها 8 انفار مش شرط مصريين كلهم بقى
طيب لو هو مش حابب الحياه دى ممكن ياخد غرفه بصاله صغيره ما يدعى استوديو هو واحد كمان فقط لكن لو كان هيدفع 400 دهم او 500 درهم فى الغرفه المليئه بالناس فالاستوديو هيدفع لواحده ما بين 1500 الى 2000 درهم و مثلهم من شريكه فى السكن
طيب انت اتوفقت فى السكن و عايز تشتغل او بمعنى اصح انت لسه خام فى البلد فعايز تدق اقامه باى طريقه لانك محكوم ب 30 يوم
لو انت فى دبى هتنزل هناك طبعا المجال واسع لان دبى نسبة المواطنين فيها 4% فقط يعنى كل 12 ساعه ولا حاجه لو اتكعبلت فى مواطن و ده هيكون ملعبك لان انت بطبيعة الحال شغال فى مجال السياحه بقالك كتير هناك بقى عندك الفنادق و القرى السياحه عالم و مولد كبير اوى فى ناك قريه الجميريه دى كبيره اوى اللى عند برج العرب طبعا بتكون عامل سى فى تمام اوى احترافى بتطبع منه الف نسخه و طول ما انت ماشى بتشوف اى مكان تدخل تسأل على الادمنستريشن و ترميلك سى فى و هكذا بلا كلل او ملل طبعا اول حاجه بتعملها لما تخش الامارات انك بتشترى خط موبايل عشان ده هيكون وسيلة الاتصال الرئيسيه بينك و بين الشركات اللى هتتصل بيك تعمل انترفيو
و طبعا هتمشى فى طريق تانى اللى هو التعليم سواء عام او خاص طول منتا ماشى تدخل مدارس خاصه ترمى فيها السى فى بتاعتك و تطلع طبعا على وزارة التربيه و التعليم فى دبى او ابو ظبى المهم يعنى المكان اللى انت فيه و ترمى فيه السى فى بتاعك و دى طبعا لو جاتلك هتكون فاتحة خير لان الوظائف الحكوميه هناك بتعطى ما لا يقل عن 20 الف درهم راتب شهرى ده غير 100 الف درهم بدل سكن سنوى
طيب لو اتوفقت فى مدرسه خاصه يبقى هيكون شغلك من 7 صباحا الى الواحده ظهرا براتب شهرى اعتقد لن يزيد عن 3500 درهم بعد كده بتروح تدى دروس
و لازم تفهم ان كل يوم و كل ساعه بتقضيها فى البلد بتزيدك خبره و الخبره بتزيد فرصك فى العثور على عمل افضل
اخر حاجه انا عايز اقولها ان فيه كمان طريقه تخليك تقعد فى البلد اعتقد انك مش هتحتاجها بحكم سنك و خبراتك لكن لعلها تفيد احدا
ممكن تشتغل حاجه اسمها مشرف باص مدرسى و دى بتخليك قاعد فى البلد بشكل قانونى لكن بدون عقد عمل يلزمك امام وزارة العمل يعنى بتكون اقامتك على الجوازات فقط و بتشترك معاها مهنة المزارع
بمعنى انت لو اشتغلت مشرف باص مدرسى يبقى انت هتصحى الساعه 7 صباحا تنظم التلاميذ و قاعدتهم فى الباص و نفس الحكايه فى المرواح يعنى بتشتغل بتاع ساعه واحده فى اليوم و باقى اليوم ليك تدور على شغل زى منتا عايز و معاك اقامه 3 سنين لكن مرتبك هيكون حوالى 1200 درهم فقط لا غير
طبعا ممكن تقعد فى البلد لو انت كمان حاجه اسمها مستثمر و ده بيشترط وجود ما لا يقل عن 80 الف درهم ليك فى بنك هناك و لها شروط اخرى