الموضوع: فتح باب المناقشة فى موضوع ثبات السيارة وبالاخص اللانسر

السلام عليكم ورحمة الله وبركاته :

يا رب اللى يقرأ الموضوع يكمله للاخر بتركيز .


انا حبيت افتح باب المناقشة فى موضوع ثبات السيارة وخصوصا اللانسر وفى حد عمل الموضوع ده على منتدى تانى وكان ناجح جدا فياريت نتبادل الخبرات لتعريف معنى ثبات السيارة .... فهناك كذا رأى فى مسألة الثبات دى .. أيضا هناك عوامل كثيرة تتحكم فى ثبات السيارة ....

وانا هابتدى بنفسى بتعريف ثبات السيارة والعوامل التى تؤثر على ثبات السيارة حسب وجة نظرى وخبرتى المتواضعة طبعا .

[mark=#f5f0f0]قبل ان اتكلم عن ثبات السيارة بالاخص اللانسر بجميع فئاتها احب ان اظيف ملحوظة ان اللى صنع السيارة عمل انزار بعد سرعة 120 يعنى العربية بعد ال120 اكيد هيبقى فى حاجة غلط واحنا كمصريين عندنا أغلب الشباب عندهم سينس البلاى استيشن والجويستك ودى حقيقة فبيعرفوا يتحكمو فى العربية كويس حتى لو علميا العربية مش ثابتة حتى لو سايق بيد واحدة مع ان ده خطر جدا .. بس عايز اوضح ان ثبات العربية يختلف من شخص لاخر حسب امكانياته فممكن العربية تبقى غير ثابتة اطلاقا واللى سايقها يقولك ثابتة ويجننك هههههههههههه واخرون تبقى العربية ثابتة بس هو غير محترف بالقيادة فيقولك العربية مش ثابتة .
[/mark]
هادخل فى الموضوع علطول :

أولا : تعريف ثبات السيارة من خلال أراء الناس

1- هناك رأى يقول ان ثبات السيارة هو ان العربية على السرعات العالية اللى بعد ال120 تبقى ثابتة ومش بتلعب على الطريق وماشية على خط ثابت وده طبعا لو الطريق كويس بمعنى انك لو سبت طارة الدريكسيون مش هتلعب يمين وشمال وده لو الطريق كويس وطبعا ده مش عندنا فى مصر ما عدا بعض الطرق الجديدة .

2- رأى اخر يقول ان ثبات السيارة هو ان العربية على السرعات العالية ايضا اللى هى بعد 120 مش بتعوم اثناء المناورات يعنى لو جيت يمين او شمال العربية مش تعوم ومعنى انها تعوم يعنى زى مثلا ما مقدمة السيارة تروح فى الاتجاه اللى انت عايزة بس المؤخرة تستجيب بعدها بأجزاء من الثانية وده بيعمل تعويم يعنى عدم القدرة على التحكم بالسيارة .

3- رأى أخر يقول ان ثبات العربية يعنى لو انت بتجرى بالعربية على طريق وعديت جنبك عربية نقل فالهواء مش هيأثر على عربيتك ومش هتحس انها بتلعب .

4- رأى اخر يقول ان ثبات العربية يعنى على السرعات العادية تاخد الغرز بطريقة مثالية وتلم نفسها بسرعة دون تعويم .

5- رأى اخر يقولك الثبات يعنى لما اجرى بالعربية على 140 مثلا وفى هواء على الطريق الهواء مش يلعب فى العربية خالص .

وألخ ألخ ألخ من الاراء حول هذ الموضوع .


ثانيا : تعريف ثبات السيارة علميا :

1- كل ما زاد وزن السيارة زاد طبعا الثبات لان السيارة كل ما زادت سرعتها قل وزنها وهذا بسبب ان الهواء يتخلل أسف العربية من الاتجاه الامامى فيرفع مقدمة العربية عن الارض فيقل وزنها .

2- كل ما اقترب مركز ثفل السيارة الى المنتصف زاد ثباتها ومركز ثقلها يعنى بالبلدى اثقل حته فيها وطبعا هو الماتور اللى اكثر وزنا فى السيارة يعنى كل ما اقترب الماتور من المنتصف وبعد عن مقدمة السيارة زاد ثباتها .

3- كل ما كان الجزء الخلفى من السيارة عالى وهو الشنطة طبعا زاد ثبات السيارة يعنى المؤخرة اعلى من المقدمة ومن هنا جاءت فكرة الاسبويلر للعربيات اللى مؤخرتها واطيه نوعا ما .

4- كل ما زادت المسافة بين محاور السيارة زاد ثباتها فى المناورات يعنى الغرز بالبلدى وفى المنحنيات أيضا .

5- كل ما زاد قطر الجنط وعرض الكاوتش زاد ثباتها طبعا بالاخص فىالمنحنيات .

6- كل ما قل ارتفاع السيارة عن الارض زاد ثباتها بالاخص فى المنحنيات علشان كده العربيات 4x4 بتبقى مش زى السيدان فى الثبات .. والكريستالة مثلا فى اللانسر مش زى البومة والهوندا مش زى التويوتا .

7- كلما زاد ثقل الباور ستيرننج طبعا يزيد ثبات السيارة لان الباور يقل مع السرعة نظرا لخيفة وزن السيارة على السرعات العالية ويقل اكثر واكثر لو كان الطريق اسفلته مش كويس .

ثالثا : العوامل التى تأثر على ثبات السيارة :

1- الهواء : وطبعا الهواء بيأثر على السيارة كثيرا يعنى لو هناك عواصف مثلا او هواء شديد فممكن ان يلعب بالسيارة بالاخص ان كانت السرعة العالية لان وزنها بيبقى أقل وده بطبعا بيختلف نسبيا من سيارة لاخرى حسب العوامل العلمية اللى اتكلمنا عنها سابقا يعنى لو السيارة تحقق فيها كل عوامل الثبات العلمية فالهواء هيأثر عليها قليلا مش زى اللى عندها بعض عوامل الثبات فالهواء يؤثر عليها كثيرا بس جميع السيارات تتأثر بقوة الهواء ان كان شديد .

2[mark=#e9e4ed]- طبيعة الطرق . وده موضوع كبير جدا وده اللى بيسبب اختلاف فى الاراء كثيرا بين الناس فى تعريف الثبات .. طبعا احنا بنتكلم عن ثبات السيارة بعد سرعة ال120 المقررة من مصنع تصنيع السيارة ....

*وهنا عندما تكون السيارة على طريق أسفلته مش كويس زى الدائرى مثلا وانت بتجرى على سرعة عالية أعلى من ال120 ومرة واحدة سبت الدريكسيون هتلاقية بيلعب سنة يمين وسنة شمال وخفيف نوعا ما وده علشان الطريق مش مستوى وهذا رد فعلى طبيعى للاطارات من الطريق وكل ما زودت السرعة هتلاقى الدريكسيون بيلعب اكتر يعنى بقى سنه يمين وسنه شمال بس بسرعة .. ولذلك بنمسك الدريكسيون بكلتا اليدين ونضغط عليه علشان نحكم السيطرة على السيارة ونخلى الاطارات لا تنجرف مع ميل الطريق يمينا ويسارا بالاضافة كمان انك انت نفسك يتكون بتتهز فبتأثر على الطارة كمان .

* اما لو ماشى على طريق مستوى مثلا زى طريق العين السخنة والهواء مش جامد هتلاقى الدريكسيون مش بيلعب لحد مثلا سرعة 150 وممكن تمسكه بايد واحدة كمان .. علشان كده تلاقى واحد سايق عربيه مثلا نوعها (س) مش فيها عوامل ثبات كثيرة وجرى على طريق السخنة فتلاقيه يقولك العربية ثابته جدا جدا جدا جدا جدا كأنها بى أنم . ومن هنا يأتى الاختلاف فى الاراء .

* وطبعا كل عربية حسب توافر عدد اكبر من عوامل الثبات بها فتختلف عن الاخرى يعنى بالبلدى لو عربية فيها عدد كبير من عوامل الثبات اللى اتكلمنا عنها هتلاقى لو ماشى على طريق غير مستوى الدريكسيون بيلعب مثلا بعد سرعة 150 مثلا مثلا يعنى ... أما عربية تانية فيها عدد أقل من عوامل الثبات السالف ذكرها فهتلاقى الدريسكيون بيلعب بعد ال120 مثلا مثلا . وبيلعب هنا مش بمعنى ان العربية تعوم او بتحدف لا خالص ... بيلعب هنا يعنى لو سايب الدريكسيون خالص وبتتفرج عليه هتلاقية عمال يجيى سنة صغيرة يمينا واخرى يسارا حسب أسفلت الطريق وخفيف نوعا ما لانه باور زيت .
[/mark]

3- الكاوتش نوعيته وضغط الهوا ء بداخله وده طبعا أغلب الناس عارفاه كويس وازاى ياثر على ثبات السيارة بالاخص فى المنحنيات والغرز ولازم يكون الكاوتش زى بعضه فى المقاس بالظبط .

================================================== ======

* من الاخر وده رأى الشخصى اى عربية من العربيات الموجودة حاليا يابانى او كورى او صينى ثابتة نوعا ما لحد سرعة 120 اما بعد ذلك فتختلف حسب وجود عدد اكبر من عوامل الثبات العلمية بها وحسب امكانيات السائق بس اللى عايز اقوله ان ثابته يعنى لما حتى اكون سواق محترف جدا هو انى لما اجرى بالعربية أشعر بالاسترخاء وليس العصبية فى التحكم بالسيارة .

* اى عربية الهواء هيلعب بيها وكمان لو مقطورة ماشية بسرعة كبيرة من جنبه او اوتوبيس هيأثر عليها بس التأثير يختلف من سيارة لاخرى حسب توافر عدد كبير من عوامل الثبات بها .

* اى عربية باردة هتختلف فى المنحنيات والغرز حسب سرعتها وحسب ارتفاعها عن الارض اى حسب توافر ايضا عدد كبير من عوامل الثبات .

* بالنسبة للميتسوبيشى انا من وجهة نظرى ان عوامل الثبات السالف ذكرها تتوافر بعدد اكبر فى موديل الكريستالة يليه الشارك اللى فى رأى مثل الكريستالة تماما مع التعديل للاحدث طبعا يليه بعدد كبير من الدرجات البومة والمكواة .

* انا عربيتى شارك 2012 وكان معايا قبلها بومة زيرو ايضا وقبلها مكواة ورأى الشخصىة ان عوامل الثبات توافرت بعدد اكبر فى الشارك يعنى مثلا البومة على طريق غير مستوى فى الاسفلت كان الدريكيسون بيلعب زى ما شرحنا عند سرعة 130 اما الشارك فعلى 150 مثلا يبتدى هذا الشىء اما الطريق المستوى ومافيش هواء الاتنين كويسين بالاخص الشارك اعلى سنة لتوافر عدد اكبر من عوامل الثبات يعنى مثلا بجرى على طريق السخنة على 170 بأيد واحدة وده خطر طبعا بس كنت بجرب وكنت مسترخى تماما أمام البومة كانت ثابتى ايضا على الطريق الجيد بس مع قلة استرخاء القائد وعصبيو زيادة شوية فى التحكم بالسيارة .



فيا ريت كل واحد يكتب عن الثبات او تجربته مع ثبات سيارته يكتب اى طريق اختبر عليه سيارته واى سرعة ويا ترى كان فى هواء شديد ولا لا ويا ترى لما خد غرزة كان على سرعة كام والكاوتش مظبوط ولا لا والطريق اخباره ايه ...... كمان فى حاجة تانية مهمة مش معنى انه كان متحكم بالسيارة انها ثابتة يعنى لازم يقول هل كان يتحكم بسلاسة وهو مسرخى أم عصبى ومشدود أثناء التحكم بها عشان نعرف نحكم على كل عربية كويس ..


ويا ريت تردو عليا فى النقاط اللى انا مظللها وايه رأيكم فيا بالظبط وجربتوا بالفعل هذا الشيء ام لا .

================================================== =======

انا اسف على الاطالة ويا رب الموضوع يكون مفيد ويا ريت تنبادل الخبرات والاراء حول هذا الموضوع الجدلى عن ثبات السيارة .

طيب ممكن حد من الأعضاء يوضح لينا الفرق بين مساعدين ال 1300 و ال 1600 الخلفيه بالصور