مساعدتكم فى اتخاذ قرار بشأن تركيب ترموستات كوعة مياه
السلام عليكم ورحمة الله وبركاته
ازيكم يا سيتاوية :beat4:
عايز رأيكم فى موضوع تركيب ترموستات كوعة مياه، عايز ارسى على قرار فى الموضوع ده بشكل علمى وبما يناسب ظروف عربيتى
*السبب*
1 - عند التسخين العربية بتبقى تلاجة واعتقد ان تركيب الترموستات هيحبس المياه وهتخليها تسخن أسرع.
2 - تثبيت درجة حرارة الموتور لأنى لما بجرى بالعربية المؤشر بيجى فى نص الشرطة التخينة اللى قبل الزيرو !! وبحس ان صوت العربية على وبتبقى تقيله فى السحب.
3 - كنت بشترى حاجات من عند محمد لادا، وسألته عن الترموستات قالى طالما عندك تكييف الفروض تركب ترموستات كوعه ... ( معرفش ليه ).
*تساؤلات*
1- ايه هى الشرطة الطبيعية اللى فى العداد اللى المفروض تكون الحرارة عليها وثابته؟
2- هل ضرورى ان الحرارة تبقى ثابته اصلا ولا متغيرة ؟
3- كنت لاقيت كابل فى الحوض مفكوك فبسأل الميكانيكى قالى ده بتاع ازابة الجليد، فهل فى علاقة وهل ده ممكن يسخن العربية اسرع ؟ وازاى بيشغتل ولا انا اللى بشتغل نفسى ؟
*مخاوف*
1- لو الطبيعى ان درجة الحرارة فى ابيزا 94 انها تكون على النص، فده معناه انى هتشوى لأن فى الصيف مع تشغيل التكييف الحرارة بتعلى للنصف، وبيدخل عليا صهد جامد جدا والتكييف ساعتها ولا كانه شغال، وده كمان فى حالة ان الطبيعى بتاعى بيبقى على الشرطة الأولى اللى بعد التخينة من غير تكييف فبيعلى لحد النص مع التكييف وبحس بالحر الشديد، فما بالكم لو الطبيعى هو المنتصف.
2- خايف لو المؤشر اللى فى المنتصف هو الطبيعى، ان الحرارة تزيد بسبب التكييف فتعدى المنتصف فتضرب جوان وش السليندر او تبوظ الماتور.
3- هل ترموستات كوعة المياه ممكن تعلق ولو علقت يبقى انا لله وانا اليه راجعون
العداد عندى زى اللى فى الصورة دى
http://nileup.com/up/watermark.php?s...335201.jpg&p=c