الموضوع: تقرير .. الفلوينس طريق العين السخنه رايح جاي !

السلام عليكم جميعا
أتمني أنكم تكونوا جميعا بخير ..

طالما دخلت تشوف الموضوع .. يبقي يا أما عندك العربيه و داخل تشوف أيه النظام عشان تبقي عارف العربيه اللي معاك و أنت مسافر هيكون سيستمها أيه , أو هتكون بتفكر في العربيه عشان تشتري و برده عايز تطمن نفسك ..

العربيه مبدأيا في السفر كويسه جدا .. و مريحه
الطريق كان ممهد طبعا و نضيف الصراحه ..
ال cruise control متمثل في مثبت السرعه تحفه في السفر .. و بيوفر في البنزين جدا
الحمد لله الطريق في ساعه فعلا محستش بيه ..
و موضوع أنك بتحدد السرعه من عجله القياده فعلا رائع و محترم جدا .. سواء عايز تعلي السرعه أو عايز تخفضها ..
20 لتر في الطريق من أول البحر الأعظم لحد طريق الزعفرانه ( بعد العين السخنه ب 50 كيلو ) ثم من هناك لحد الدائري و بعدين مونت من هناك ..
الأستهلاك فعلا أنا شايفه كويس جدا
العداد الديجتال مريح جدا في السفر .. خصوصا لو مسافر بالليل ..
الساوند سيستم فعلا رائع ..
الكراسي مريحه جدا و مش متعبه خالص ..
نيجي لأهم نقطه ( الثبات ) :
-مبدأيا الطريق فعلا كان 100 100 العربيه كانت راسيه و مقارنه بالعربيات اللي كانت معديه من جنبي و اللي أنا كمان سوقتها قبل دي .. زي ما أكدت قبل كده العربيه في ثبات الأوكتافيا تقريبا و أعلي من ثبات الكورولا لحد 2013 و أعلي من ثبات الكوري متمثل في العربيه الألنترا 2013 و السيراتو الشكل الجديد ..
دول اللي أقدر أقارنهم لأني سوقتهم و عارفهم كويس ..
-الخلاصه الثبات جيد جدا .. علي أعتبار أن الممتاز الفئات الأعلي زي البي إم و المرسيدس و غيرهم

النعومه .. رائعه فعلا ناعمه جدا مقارنه بالعربيات المذكوره أعلاه
دي النقط اللي أنا شايف أنها هتفيد الناس سواء اللي معاهم العربيه و أعتقد ما شاء الله هما عارفين كل ده
او اللي هيشري

الخلاصه برده نقدر نقول إن العربيه فعلا عربيه سفر محترمه جدا

أتمني الموضوع فعلا يفيد .. و أتمني منكم الدعاء
دمــــــــــتم .. بخــــــــــــــير

صديقي المواطن
تقرير وطني وشبه وافي لفايدة زملائك من أعضاء المنتدى الكرام وأدام الله سيارتك خيمة فوق رأسك وحفظها وحفظك من كل سوء ومتحرمناش من كل جديد
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال