الموضوع: التقرير الشامل للستروين C-Elysee بالصور

المشاركة الأصلية كتبت بواسطة ahmed vito

السلام عليكم

اولا احب اشكرك بشدة على تقريرك اللى كان سبب فى انه ادانى ثقة ازيد فى انى اختار انى اركز اكتر مع العربية دى
الشكر لله يا باشا

انا مقبل ان شاء الله على شراء عربية وكنت راكب ميجان ومش متخيل ايه اللى ممكن اركبه من بعدها لان اللى كنت بلاقيه في الميجان كان مخليني مش حاسس انى هعرف اركب حاجة من بعدها لحد ماوقعت عيني على الستروين اليزيه وتقريبا فيها كل اللى انا عايزه من العربية بس ليا كام سؤال هيحسمو ليا موضوع الشراء فياريت سرعة الرد من حضرتك عشان الوقت لانى عندى التزامات وسفر برة مصر

1- عايز اطمن من حضرتك على اداء فرامل العربية والثبات في السرعات العالية مع العلم انى كنت بجيب فى الميجان 200 وماكنتش بقلق بالمرة ثبات وقوة فرامل كانت مطمناني ودة كله طبعا بعد ستر ربنا

الفرامل كويسة جدا تقدر تقول ممتازة على حجم العربية و اداؤها كويس كعادة فرامل الفرنساوى بس , العربية بقت بتنزل بكاوتش جوود يير eco بدلا من ميشيلان energy saver وانا مش عارف الـrating بتاع الكاوتش ده فى الفرامل ايه لكن انا مش شايف انه وحش اطلاقا هو بس صوته عالى حبتين .
بالنسبة للثبات لا هنا هتحس بفرق طبعا لصالح الميجان الميجان اثبت فى فرق فى العفشة الخلفية و كمان الميجان اتقل وزنا , الاليزيه اصلا وزنها خفيف و ده اللى مخلى اداؤها كويس و بتجرى و بتسحب , نرجu للثبات هى اكثر فئتها ثباتا ( ريو - اكسنت - صنى - ياريس - افيو )
لكن هى ثباتها مش سئ اطلاقا و مرضى جدا على امكانيات العربية تقدر تقول جيد فى الملفات مقبول فى مطبات الهواء
بالنسبة للعفشة فعلا جميلة تديك احساس بالتماسك و انها قوية و فى نفس الوقت مش ناشفة

2- التكييف اخباره ايه لانى من التقرير بصراحة ماقرتش افهم اوى هل التكييف كويس ولا لأ لانى الصراحة كنت بعاني من تكييف الميجان فهل ياترى تكييف الاليزيه برضو نفس الكلام ولا ادائه احسن واللى قاعد ورا فى الكنبة هل هيحس بيه وبالتبريد ولا لأ .... وهل التكييف بيأثر على سحب العربية والفرامل ولا لأ
التكييف ما شاء الله كويس جدا معايا من وقت الاستلام و حتى الان طبعا لا يضاهى التويوتا و الميتسوبيشى مثلا لكن تبريده كويس و مش ضعيف و بيسقع فى الحر الشديد ممكن ياخد وقت اكتر حبة من العادى لو الحرارة اكتر من 42 ( جربته فى يوم كانت حرارته 45 اخد وقته بس سقع كويس)
لكن بعض الناس اشتكت ان التكييف ضعيف رجعت للتوكيل و اتضح ان كان شحن الفريون مش مظبوط و اتحلت فى التوكيل ..
اللى قاعد ورا هيحس بيه طبعا لكن اعتقد لازم المروحة تكون على سرعة 4 فما فوق ( المروحة 8 سرعات ) المشكلة ان المروحة بيبقى صونها عالى شوية و مسموع من سرعة 6 فما فوق

التكييف مش بياثر على الفرامل - لكن بياثر على السحب الى حد ما و خصوصا تحت 2.5 rpm العربية هتحتاج كبس بنزين اكبر من العادى و هتديلك نفس الاداء و هى من غير تكييف لكن طبعا على حساب الاستهلاك

3- هل العربية فيها مثبت سرعة ولا لأ
لا العربية مفيهاش مثبت سرعة لكنه معمول حسابه فى الضفيرة بتاعة العربية و جاهز انه يتركب و الدراع بتاعه ليه مكانه , بس اعتقد التوكيل مش هيجيبه الا لو اكتر من عميل سال عليه , ( توكيل بيجو بيركبه فى الـ 301 بـ 800 جنيه )

اتمنا سرعة الرد من حضرتك عشان عايز اخلص فيها بنهاية الاسبوع ان شاء الله ومرة تانية بشكر حضرتك واسف على الازعاج وبعيدا عن رفاهية الفرنساوى الىل انا من عشاقها ال 3 اسئلة دول اهم حاجة انا محتاجها فى العربية وهيفرقو معايا فى انى اخد قراراى وشكرا

الشكر لله يا افندم , بشكرك لقراءة التقرير
اتمنى انى اكون افدتك
و بالتوفيق فى الاختيار ان شاء الله
تحياتى

المشاركة الأصلية كتبت بواسطة ahmed vito

انا بشكر حضرتك جدا على ردك بس تعرف كل حاجة طمنتني بس مش عارف ليه موضوع ثبات العربية دة اللى قالقني حبتين انا عليى فكرة دفعت 2000 جنيه للمعرض عشان احجزها لانى مقتنع بيها لكن بصراحة خايف من موضوع الثبات دة لان سواقتي فيها جري كتير وسرعة زايدة فقصة الثبات دى فارقة اوى معايا وبعدين انت فى وسط كلامك قلت ثباتها عموما جيد لكن فى مطبات الهوا مقبول ودى كلمة تقلق اوى بصراحة بس مش عارف بقى اعمل ايه لانى انا اصلا كنت فى مقارنة رهيبة مع العربية دى ومع السيات ابيزا بس كماليات الستروين ووسع الكنبة والشنطة فرقو معايا في اختيارها رغم ان الابيزا بتتميز بالتكييف والثبات على الطريق والفرامل
انا لسة فى حيرة برغم انى خلاص علي وشك انى اشترى العربية

انا مجربتش الابيزا بس معتقدش نهائى ان الاليزيه تكون اقل من الابيزا فى الفرامل و التكييف على الاقل هتكون زيها ان مكانتش احسن , تقدر حضرتك تجرب التكييف فى المعرض

بالنسبة لموضوع الثبات لا الابيزا ولا الاليزيه ثباتهم زى الميجان انا قولت لحضرتك ان ثباتها مش هيبقى اد كدا عشان بتقارنها بالميجان . الاليزيه اينعم وزنها مش تقيل لكن قاعدة عجلات طويلة على الفئة و اطول من عربيات فى الفئة الاعلى كمان ( 2652 مم)
موضوع مطبات الهواء انا ممكن يكون احساسى بيه عالى شوية عشان معظم الوقت لوحدى فى العربية ومفيش اى احمال او شنط او خلافه ده ممكن يخليها خفيفى فى مطبات الهواء . لكن قولت لحضرتك هلى اللى بحس بيه وانا سايق

عليك و على صلاة الاستخارة
و بالتوفيق فى الاختيار ان شاء الله
تحياتى

المشاركة الأصلية كتبت بواسطة d.muhamed

لو سمحت يا افندم ممكن اعرف الالوان المتاحة؟

ابيض - اسود - فضى - رمادى - شامبين - بترولى