الموضوع: رابطة ملاك اسكودا فابيا

المشاركة الأصلية كتبت بواسطة msr1192

انا جبت الكوبلن ب450 الماني ولسة مركبة امبارح وبعد اما مشيت وانا مروح سمعت طقتين على مسافات متفاوتة حاولت اركز اعرف الطقة حصلة امتى معرفتش
يعني جريت مرة واحدة فرملت مرة واحدة خدت لعبكة في الارض بسرعة عشان اعرف محصلش حاجة واخويا بيقولي ممن الكوبلن كان بيطبع والحمد لله النهاردة رحت الشغل بيها ومسمعتش حاجة
هكلمكم على العربية وقصتي معاها
بسم الله
انا في الاول كان معايا 128 زاستافا وطبعا كانت غير مرضية لغروري (بس والله اصيلة اتفشخت بيا على الدائري وكنت نازل انا صاحبي تحت مقطورة والحمد لله ربنا ستر واتكتبلي عمر جديد
التانية كانت 132 وكانت وحش بمعنى الكلمة شيل وعبي ووسعلي بس كانت وحشة في البنزين شوية ودي للاسف اللى ندمت على بيعها لاني بعتها بخسارة بعد اما كنت مظبتها وده لان واحد كان معشمنى انه هبيع عربيتة الافيو وكنت هاخدها منة ومتفقين على السعر وبعد اما بعت عمل (.....)
دورت بعديها على عربية مناسبة خصوصا اللى كنت هاخدها كانت افيو فعايز حاجة في نفس المستوي ملقتش قدامي بالحالة اللى ترضيني غير اللانوس والفيرنا وطبعا الالماني ابعد عنة زي كل الجهلة
ولما يئست من اني الاقي عربية كويسة بالسعر اللى يرضي ربنا قولت غلاء بغلاء اجيب جديد ما هو مدفعش اقل من تمن الجديد ب7000 -8000 واخد عربية بقالة 5سنين وعمالة اكثر من 80 الف كيلو
المهم بالصدفة البحتة لقيت واحد صاحبي بيبيع عربيتة بولو 2000 وكانت جميلة الشكل مدمرة الدواخل فسالتة علي قطع الغيار والاسعار والاماكن و و و و قيت الدنيا قريبة مش بعيدة ما انا كان معايا ال128 وكنت كل شهر لازم لازم اعمل حاجة في العربية سواء رضيت او لا التاني بيصرف ال1000 مرة واحدة كل 6اشهر كل سنة وانت ونصيبك بس فية فرق
المهم بالصدفة برضة والله لقيت واحد عارضة عربية في سوق العاشر سكودا فابيا وطالب 50 الف وانا من النوع اللى بحب التكنولوجيا والمعرفة فقلت اخد فكرة
العربية كانت موديل 2003 وكان فيها ما يرضي
المهم ركبت العربية القعدة بتاعتها مريحة وقاعدة بشواتي مش قاعدة سواق
الكرسي اللى جنب السواق مريح جدا
الى ورا الكنبة واقفة شوية ولكن برضة مريحة مش متعبة (كمان اللى مش عاجبة ينزل )
قلبت فيها لقيت حاجات كتير مش فاهمها وده اللى بيشدني في اي عربية (بحب الجديد والغريب والغير عادي )
سالت صاحبها وطبعا زي ما اي واحد بيحلي عربية عشان تتباع قعد يشكر ويحلف انو لولا الزنقة و و و و المهم خليتة يشرحلى اغلب المكونات وقلبت فيها لقيتها عربية عالية فعلا مش بالكلام
المهم توكلت على الله وبدات ابحث عنها في النت وعند الاصدقاء والصراحة ملقتش حد بيشتكي منها الهم الا قليل من مصر
وشوفت بعض الفيديوها ليها في التصنيع وفي اختبار العفشة وقوة التحمل وكان فيها فصل الختام قررت اصلي استخارة واتوكل على الله
ولان مؤمن بان المال الحلال ميضيعش ربنا وقعني في واحد ابن حلال وبيغير عشان يدلع واللى طمنى ان العربية من الزيرو لحد اما خدتها لم تبعا الا لاثنين الاول جدة اللى اشتراها الزيرو وهوه خدها لمراتة من جدة يعنى مطلعتش برة العيلة
توكلنا على الله ورحنا كشفنا عليها في بنزينة والصنايعي اللى هناك فلهالي حتة حتة وقالي على كل العيوب اللى فيها
وتوكلت على الله بعد اما اشتريتها قعدت معايا حوالي سنة لغاية ما جة معاد التجديد
(مش عارف اي عربية اجي اجدد الرخصة تروح فاتحالي بقها (كانها بتقولى ما دمت هتصرف على الرخصة يبقى انا اولى )
المهم هي فعلا كانت غلطتي ان فية اخ زميل ليا في الشغل ما يحطش رجلة في عربية الا واقسم بالله على ذلك ياما متدورش ياما متمشي ش ياما العجل يضرب المهم انك مش هتروح بيتك النهاردة بيها
واتادبت طبعا سخونة بسبب تسريب مياة من الجزء العلوي للماتور (كويس انها منفجرتش بيا ) المهم رحت بيها لمحمد سمير اللى في ظهر حديقة بدر وقالي ما اعرفش فيها وواحد جنبة برضة المفروض انة متخصص لاسكودا لاكن عرفت بعد كده انة متخصص سكودا a4 او a5
المهم رحت بيها لمركز معتمد اللى هوه الشرقية في جوزيف تيتو بالنزهة وحسبي الله ونعم الوكيل فيهم مش مسامح في حقي ليوم الدين دخلت بالعربية فيها تسريب مياه خرجت بيها جوان وش سلندر (ولهذا قصة ابقى احكيها في مناسبة اخرى )
المهم اتصلت بالخ صاحبها اللي اشتريتها منة قالي انا كنت بروح عن فلان اللى في السابع وهو اللى حافظها وعارفها
بالفعل رحت والحمد لله الراجل تعاون وعمل الواجب بعد اما بهدلنى للخراط واتعملت العربية
ومن بعديها رحت غيرت طرمبة المياة من حوالي شهرين ودلوقتى كوبلن والحمد لله
الحق لله العربية ماكانشش يظهر حاجة فيها الا بسبب يعنى العربية مسافر بيها الشرقية زي الفل ومحمل فيها رجت الكونتاكت مش عايز يدور
واحد في الشغل قالي الازاز عندك كهربا ومش بيتعبك في الطلوع والنزول والله ما روحت بية وكنت عند بتاع الالبواب
المهم هقولكم مميزات العربية وعيوبها للى ميعرفهاش او اللى عايز يشتري
العيوب اولا
نسبة البخر بتاعت المياة اعلي من باقي العربيات ايه سببة معرفش وده عند اكثر من واحد (ومليش دعوة بالاوكتافيا )
الكلاكس بتاعها هيربيلك عضلات ولو حاولت تشتم حد بالكلاكس علبال ما تخلص هيكون روح بيته (عربية مؤدبة )
العربية تكنولوجيا عالية ودي سلاح ذو حدين
مينفعش تتبهدل يعنى غصبن عنك لازم تراعيها ولو طنشنها تزعل وزعلها وحشششششششششششششششش
اي صنايعى وهو شغال فيها لازم تدلعا عشان فعلا بيبقى شغال وهو قرفان لكن كل قطعة معمولة على قد المساحة ومتعرفش تتحرك بحرية وعلى فكرة موديلات الكوري والياباني السنة دي بقت بنفس الاسلوب ده ماتعرفش تمد ايدك جوه الحوض
المميزات
العربية زي كل االماني ثابتة على السرعات ودي اهم ميزه واحيانا برضة عيب خطير (لاني للاسف الاول ما كونتش ببص على العداد لغاية ما في مرة لقيت نفسي ماشي 140 وانا ماشي براحتى ومن ساعتها كل شوية ابص على السرعة )
الخامات بتاعة العربي جيدة جدا وده انا بحبة وبفرقة عن بقية العربيات
السرعة والتسارع جيدة جدا (ومحدش يقولى طلعتها بطيئة-ماهو يا فرحتي نجري بيا وتبقى سريعة لغاية ال80او ال100 وبعد كده تبقى تقيلة خنيق انما تبقى تسارعها اقل من الاخرى ولكن ثابت لغاية ما اجيب اخرها هوه ده المطلوب )
كماليات العربية حلوة ومفيده مش كماليات وخلاص وعد لا كماليات تستفيد بيها
التابلوه فية درج سري مش باين وتلاجة تسقع الكانز فيها (مش فاضل الا البوتجاز يبقى في الشنطة )
الحجم مدمج يعنى صغيرة من برة وكبيرة من جوه
الصاج الحمد لله قوي ويتحمل وربنا يستر
العدادات في وضعية جيدة جدا للقراءة
الدركسيون متحرك وتلسكوبي
التكييف قوي ولو شغلتة على 3 مش هتقدر تستحملة اكثر من ربع ساعة
اماكن تخزين متعددة
شنطة محترمة مش صغيرة ومش كبيرة لكنها بتلم كل اللى ات عايزة مش زي البيكانتو ولا الاي 10
الامان بمجرد ما تشيل المفتاح من الكونتاكت كل كهرباء العربية تفصل والبنزين يتقطع ولو في نور ناسية يشتغل انزار للتذكير
ممتعة في القيادة يعنى متزقش منها مهما طال المشوار
وفي النهاية اعتذر لو كنت طولت عليكم ولو في اي استفسار انا تحت امركو
والسلام عليكم

شكرا ليك علي الشرح الجميل