باركولي ياجماعه جيبت فيكترا ٩٩ ودا بعد ماقريت تقريباً كل المواضيع اللي مكتوبه عنها هنا
هوا انا جايبها غاليه شويه بس مش مشكله كانت مع واحد صاحبي وضامنها واعارف فيها ايه العربيه فابريكه جوا ورشه برا نضافه ودا كان اتفاقنا انه هيروشهالي قبل ماخدها وعادي انا كدا كدا مش جايبها تجاره انا جايبها ركوبه ومن زمان وانا نفسي اركب الماني ، فعلاً لما تركب عربيه الماني احساس مختلف عن اي عربيه تاني و خصوصاً الاوبل حاسسها شبابي كدا مع شوية تعديل في الشكل هتبقي سبوور والموتور ماشاء الله في الجري.
بس انا عندي كام حاجه مضايقاني في العربيه بس انشاء الله الاقيلهم حل
١-الفرش .... فرش الابواب متبهدل وبفكر اغيره واللي اداللي العربيه قاللي شده الفرش كله جلد ماتشتريش الفرش استيراد دي عاوز رأيكوا فيها اشتري فرش ولا اشد اللي عندي وهيتكلف كام في الحالتين وفرش السقف برده ساقط من النص كدا ومحتاج يتلزق.

٢-التكييف ... شغال بس لما بشغله بسمع صوت زنه كدا حاسسها مروحه بتخبط في حاجه صوت خفيف جداً مش باين بس بسمعه لما بشغل التكييف مع الكومبروسور انما المروحه في العادي مالهاش صوت غالباً الصوت دا من الكومبروسور بس مش عارف دا ايه.

٣-كرسي السواق فيه طقه كدا وانا ماشي بتبتان جداً مع مطبات الهوا فكرت اغيره بكرسي كهرباء بس مش عارف سعره كام واجيبه منين.

٤-اضاءة العداد ... هوا انا ممكن الزق حاجه علي العداد تغيير اللون دا عاوز حاجه سبوور كدا

٥- شاشة الاعطال .. مش شغاله اول سطرين بس اللي شغالين ومافيش حاجه تانيه عاوز اغيرها اجيبها منين وبكام وكنت قريت ان في منها شاشه اكبر يعني اكتر من ٣ سطور لو ينفع تركب عندي اجيبها تبقي احسن

ولو جيبت الحاجات دي اروح لمين صنايعي كويس يعملهالي

طولت عليكوا معلش بقي استحملوني لسه جديد وبتعلم منكوا
ولو في حاجه محتاج اجيبها انا احياناً بروح بور سعيد شغل ممكن اجيبها من هناك
شكرا لردودكم مقدماً