زي ما البعض منكم كان عارف اني كنت محتار مابين طقم الدبرياج أو اني اسقط بمكنة اوتو ، للأسف اختارت الخيار الأولاني !

كان عندي رجة بتظهر دايما في الغيار الأول ، ومع تشغيل التكييف الرجة بتبقى رخمة أوي ، من يومين روحت لـ اخونا الكبير فادي في دمياط وأهو اكون ضربت عصفورين بحجر
أشوف فادي وأسلم عليه ، واعمل طقم الدبرياج عند ميكانيكي هو جربه قبل كدا وواثق فيه
وبعد السفر والتركيب ، اختلاف جذري
الرجة طبعا راحت والمفاجأة ان دواسة الدبرياج بقت مية ، والسحب اتحسن جدا عن الأول

بالنسبة لـ طقم الدبرياج والماستر ، بعد اللف والتدوير والسؤال هنا وهناك
طقم الدبرياج Luk (الديسك والإسطوانة) بـ 1850 جنيه من أمريكان ستار
بلية/ماستر الدبرياج FTE بـ 1350 جنيه من الوطنية ونفس السعر من أمريكان ستار
الأسعار ديه خاصة بـ الفتيس F23

الوطنية عنده طقم دبرياج ساكس ومختوم عليه لوك ! ولما دورت على النت لاقيت فيه ناس لاقوا نفس الموضوع وواحد منهم عرض رد الشركتين وكان الرد "ان الشركتين بقى فيهم بينهم شغل متبادل وان الكلاتش نفسه بيتصنع بواسطة Sachs والـ DMF بواسطة luk وده عشان نوصل لـ متطلبات العملاء"

وبما إن فادي كان مقلقني ومرشح اللوك أكثر ، فرجعت الساكس اللي اشتريته من الوطنية وروحت على امريكان ستار اشتريت اللوك من عندهم

صورت كام صورة كدا أثناء التركيب ، بسبب ان الدنيا مزنوقة ، فمافيش حاجة واضحة من الصور زي قلتها يعني