السلام عليكم

أنا عايز أخد رأيكوا فى حاجه لانى فعلا تعبت من التفكير.

أنا حاجز بيجو هاى 301 لابن من يوم 12 أكتوبر ولغاية دلوقتى ماستلمتش زى كتير غيرى موجودين هنا.

المهم كلمت التوكيل و قالى التالى

- شبه مؤكد إن التسليم هايتأخر لبعد 15 يناير (أمتى بالظبط الله أعلم).
- فى إحتمال إن العربية سعرها يزيد (مجرد إحتمال مش هايعرف الزيادة إلا فى أول يناير).

مع الاخذ فى الإعتبار إن الدولار بيزيد دلوقتى

المشكلة بقى أن قدامى ستروين سى إليزى هاى لاين تسليم فورى يعنى وقتى يعنى فى اللتو واللحظة يعنى أدفع و أركب.

وللعلم لما قلت للمندوب إن قدامى عربية ستروين قللى روح خدها

ودماغى خلاص هاتاكلنى من كتر التفكير - أنا لسه شارى طلبات البيت إنهاردة وكنت عامل زى الحمار الوحشى من كتر الشيل

خايف أشترى الستروين مايحصلش حاجه و أفضل ندمان كل ما اشوف العربية.
و خايف أستنى البيجو تغلى و معرفش أجيبها او تبقى حمل عليا.

أنا عارف أنهم نفس العربية بس انا كنت نويت على بيجو خلاص وده مسببلى حته نفسية شوية

فى النهاية أنا أستصيعت و كلمت توكيل ستروين وسألتهم على زيادة الاسعار
قالتلى إن فعلا إحتمال يبقى فى زيادة بس مش عارفة هايطبق فى النص الاول من يناير ولا فى النص التانى.

كل الكلام ده ممكن يطلع فى الكلتش ويبقى حوارات من بتوع المبيعات

فى الاخر بقى أنا أعمل أيه أشترى الستروين ولا أستنى البيجو ؟