الموضوع: تقرير زيارة مركز ماستر لصيانة السيارات الخاص بطناني باشا

في الاول بس انا حابب اوضح حاجه حاجه انا اول عربيه ليا الاوبل ولسه جايب فيكترا ٩٩ من كام يوم المهم ندخل في الموضوع علي طوول
طبعاً جبت رقم طناني من هنا من المنتدي وقومت مكلمه (هندسه انا بس كنت عاوز اعدي اعمل شوية حاجات ... تشرف في اي وقت من ١٠.٣٠ كلمني انا هناك(
طبعاً خدت اجازه وروحت علي المركز الظهر وكان المشوار اسهل منه مفيش ال gps نزلني قدام الورشه وفي شارع رئيسي
كلمت طناني قاللي المهندس احمد جوا وانا جاي كمان شويه
قابلت المهندس احمد وهوا راجل قمه في الادب والاحترام والجدعنه شباب زينا كدا وتعرف تتعامل معاه جاب الجهاز وكنا بنشوف ليه ال aps مش شغال المهم جربنا وطلع الحساسات كانت عاوز تتنضف بس وبالفعل جربنا شغاله كويس بس اللمبه كانت منوره وفصلت بعدها
دخلت جوا الورشه (وقت الشغل بقي ) طناني جه شاف الموتور كان فيه قاعدة الموتور مكسوره ودي اتكسرت من غير اي مقدمات ودي سمعت في ترس كدا راكب في الموتور لاقيناه معووج واتفقنا ان دوول هيتغيروا بقي
تاني حاجه كان عندي صوت في المساعدين وطلع في مساعد ضارب وبصينا علي التيش لاقيناه بايش وهيتغيير بردوا
**********
المهمه الصعبه هنجيب المساعدين جداد ولا استيراد وهنجيب بقايت الحاجات دي بقي طبعاً انا مش فاهم حاجه في الكلام دا بس انا كنت شايف ان اءمن واحد يشتغلي في العربيه هوا طناني او تحت عينه عشان مايضحكش عليا او اجيب حاجه اي كلام
المهم طناني خد عربيته ونزل يجيبلي الحاجه بنفسه جاب كل حاجه وجابلي الجنبين قدام كامليين استيراد والترس جابه وقاللي القاعده جبنا نوع كدا تركي تقريباً اصل الاستيراد اللي هناك كله مشررخ (طبعاً انا لو كنت نزلت كنت جيبت الاستيراد تحت مسمي اجيب انضف حاجه وانساها
----------
نكمل التقرير بكره انشاء الله عشان تعبان جداً وهنام

معلش ياجماعه بقي اكملكوا الموضوع اصل امبارح شغل طول اليوم الواحد كان مرووح مش شايف قدامه
طبعاً نسيت اقولكوا ميدو الصنايعي اللي عند طناني عيل زي الفل مبيبطلش هزار بس شغله زيه زي اي صنايعي كبير وخبره هوا طبعاً شغال بتوجيهات طناني واحمد بس برده لازم نديله حقه شويه هوا وعم اسماعيل بتاع العجل .
طبعاً ركبنا القاعده وركبنا الجانبين وطلعنا نجرب كل حاجه كانت مظبوطه هوا بس المساعد اليمين حركته مش عاجباني اصل انا محسوك حبتين بس لما روحت لاحمد وجربنا قاللي حركته مظبوطه ومافيش في مشكله كنت عاوز اركب علايات عشان الجنط بيحك في الكارتيره مع مطبات الهوا (جنط ١٧) بس خدت قرار هاجيب جنط ١٥ احسن واهوا بدل ما العفشه تدغدغ
*** لو حد عاوز الجنط دا يقوللي انا ببيعه بس نصيحه بلاش يركبه علي فيكترا الا لو كان فاصي يقف كل شويه يشد العفشه
وبالمره قولت اعمل سيرفيس كامل للعربيه غيرت فلاتر وسيور وزيت
وميدو نظف التيل وشال الرايش وخلصنا كل حاجه
جيه وقت الحساب اهم وقت بصراحه طناني حاسبني علي الحاجه اللي جابها ونظراً لأمانته المعهوده ماينفعش اتكلم نعاه في اي حاجه خاصة ان الاسعار كويسه
تعالوا بقي المصنعيه كان كاتب رقم قولتلوا ليه كدا دا المرتب مش هايكفي قاللي اكتب اللي انتا عاتدفعوا وانا هطبع فاتوره بيه ومش هاتكلم مهاك في حاجه وطبعاً كان عامل خصم نايل موتورز
والعفشه بصراحه فاقت حاسس العربيه اتظبطت عقبال ماغير جلب ورا انشاء الله
بس انا حاسس العربيه مكتومه كدا معايا دا من قبل السيريس والصيانه بس كان طناني قاللي عدي وانا اشوفهالك بس كمان لاحظت حاجه استهلاك العربيه في البنزين جبااااار في اليومين اللي فاتوا
فولت التانك من وطنيه اللي علي الاوتوستراد وروحت المعادي كورنيش النيل ورجعت عل م.نصر دا كله دائري من غير حرق والمؤشر نزل شرطتين دا طبيعي ولا كدا في حاجه وياتري كتمة الموتور دي ممكن تكون ايه !!!!