الموضوع: الحمد لله ربنا كرمني وانعم عليا وجبت سيفك وعاوز اظبط حاجات محتاج ردكم

المشاركة الأصلية كتبت بواسطة mohandelboshy

السلام عليكم ورحمه الله وبركاته
بعد الحمد و الشكر لله الواحد الاحد اللي سهلها معايا وانعم عليا وجبت سيفك 93 ex
اشكر رجاله الهوندا كلهم بلا اي استسناء
فعلا شرا العربيات ده نصيب
بعد لف ودوران اكتر من سنه واختيارات عدة وعمل مواضيع كتير وتفكير مشتت ما بين شراء ابيزا 2002 او شوما او سيفيا او كرستالة
الحمد لله انهاردة خلصت في هوندا 93 ex كاملة اوتو فابريكا جوة بالكامل ما عدا جزء صغير في الشنب
كل ما تحتاج اليه وارجو من رجالة الهوندا يفيدوني بالمركات والاسعار وايه اللي اعمله فيها

تحتاج بلية سرة في الطنبورة خلفي ( هل اجيب طقم بلي ولا اغير اللي بايظة بس ) واحسن حاجة ايه وبكام
ايه السيور اللي محتاج اغيرها وبكام سعر كل سير ونوع كويس

سعر ماكينة الازاز الخلفي كام لان المكنة بتاع الازاز اللي ورا بتعلق اغيرها ولا اصلحها وفين ؟

سعر البريبيز الامامي كام لانه فيه شرخ ( ممكن امشي بيه ) بس يفضل اني اغيره ..... وايه احسن نوع

الريشه الامامية بتاع التكييف مكسورة اللي جنب السواق بتتباع فرداني ولا لازم مع التابلوه

هل محتاج ارصص واظبط زوايا وبتتكلف كام ؟
هل اغير تيل الفرامل ؟ وايه النضيف وبكام

البوجيهات ايه انضف نوع وبكام
البطارية لازم تكون كام امبير اللي فيها بقالها 6 شهور وهي لونها اخضر 55 امبير

اخر حاجة العداد بتاع السرعة مش شغال ( يبقي عاوز ايه عشان يشتغل )

المكان القريب مني لقطع الغيار المنصورة او طنطا بس معرفش اماكنهم ومين اللي اجيب منه الحاجات دي

والف شكر ليكم والحمد لله رب العالمين الذي اتم نعمته عليا

الف مبروك ياباشا , وربنا يباركلك فيها ويديك خيرها ويكفيك شرها , وان شاء الله نشوفك معانا فى المقابلات القادمة عشان تستفيد وتفهم الامور اكتر واكتر ونتشرف بمعرفتك

بالنسبة للاسئلة انا هجاوبك عليها على حسب الترتيب :

1- هتجيب بليتين يابانى سعر الواحدة 175 جنية وهتفك السرة وتوديها للخراط يفكلك القديمة ويركب دية

2- هتغير سير الكاتنية بماركة sun يابانى سعرة 130 جنية وبيتغير عند 60 الف كيلو

- هتغير 3 سيور ( باور + تكييف + دينامو ) ماركة sun كل واحد فيهم سعرة 45 جنية , بيتم تغيرهم عند 40-50 الف كيلو

وتعمل حسابك ان احتمال تحتاج تغير بلية شداد كاتينة ب 120 جنية + انك تعمل كشف على طلمبة المياة

3- مافيش حاجة اسمها مكنة بتعلق , هية المفروض لو بايظة تكون تقيلة جداااا وبتطلع بالعافية , لكن بتعلق شوية تشتغل وشوية لأ , دية راجع الكهربائى الاول وهو يقولك محتاجة اية وعموما تمنها 100-150 جنية على حسب التاجر استيراد

4- لو الشرخ بسيط عالجة عند دكتور خالد لتصليح شروخ الزجاج وبيديك ضمان مدى الحياة والشرخ مش هيتكلف اكتر من 70 جنية على حسب طولة طبعا

لكن لو شرخ يلزم معاة تغير الزجاج يبقى هتجيبة استيراد مع عند الثلاثى الحرفيين عند موقف السوبر جيت بيعمل 400 جنية بالتركيب

5- الريشة الامامية , اسأل الاول هنا هل حد عندة تابلوة قديم مش عايزة يديهولك منة , او تشتريها ب 100 جنية من عند ابو قصة لقطع الفيار فى الحرفيين

6- طبعا الكشف بتاعك هيكون كالاتى :

1- تربيط عفشة والكشف عليها وتغير مايلزم وفى الاخر تظبط زوايا وسعر تكلفة الزوايا من 30 -55 جنية على حسب المكان

2- تنزل الاربع فرد كاوتش على الارض وتملاهم نيتروجين

3- تكشف على شحن الدينامو والبطارية

4- تغير زيت الماتور وفلتر الزيت بزيت مناسب لحالة المحرك

5- تغير فلتر الهواء + البنزين

6- تغير البوجيهات

7- الكشف على الشكمان

8- تغير زيت الفتيس ( هتحط شيل او موبيل Atf 220 هتحط 3 علب وربع ) سعر الواحدة 30 جنية وتغير الزيت على 15 الف كيلو

9- الكشف على تيل الفرامل وتغيرة وعمل رجلاش للفرامل الخلفية + تغير زيت الباكم وهتجيب تيل الفرامل يابانى ماركة nessen سعرة 275 جنية للامامى فقط , والخلفى هيكون يابانى سعرة 140 جنية

7- البوجيهات : هتجيب بوجيهات بلاتينيوم ngk سعرهم 120 جنية من عند شركة محمد توفيق فى السيدة زينب شارع قدرى امام مستشفى الحوض المرصود

8- بطارية الهوندا بتكون 60 امبير حجم صغير وبتصفى على 45 امبير واكشف عليها لو طلع ( البطارية + الدينامو ) 14 على الامبير يبقى كدة تمام ومش محتاجة تتغير

9- عداد السرعة الاول هتكشف على حساس السرعة اللى متركب على الفتيس لو شغال يبقى المشكلة من العداد نفسة

انت الافضل ليك انك تنزل القاهرة نزلة فى الحرفيين وتخلص كل الحاجات دية