بخصوص الالنترا الكوبيه شوية استفسارات

**M.ABDEEN** · 04-01-2014 05:58 AM

السلام عليكم
كنت باسال عن الالنترا الكوبيه حد يعرف عنها اي حاجة ولو يعرف ايه مدى تقييمه ليها وهل هي فعلا عربية حلوة وتستاهل ولا لا ؟

**AhmedNaeem** · 04-01-2014 11:47 AM

اللي اعرفه ان هي نفسها السيدان
الاختلاف بس في الشكل الخارجي

**M.ABDEEN** · 04-01-2014 12:00 PM

شكرا يا باشا بس فعلا هل هي عربية تستاهل وحلوة وهل ليها عيوب ولا لا ؟ معليش انا متقل عليكم انا كياوي من زمان وبفكر اغير وطبعا الظروف اللي حاكمة الواحد لان الاسعار فعلا غالية ومبالغ فيها ..امبارح كنت في القرش وشفتها عجبتني بس قلت ارجع لكم برده تفيدوني ...انا برده مستني السيراتو الكوبيه الجديدةبس صدموني امبارح وقالوللي مش هتقل عن 190 الف وبصراحة كده اوفر جدا ولا ايه رايكم وشكرا

**AhmedNaeem** · 04-01-2014 12:59 PM

لو مش مستعجل اصبر لغاية لما تنزل السيراتو ونشوف سعرها والابشنز اللي جايه فيها
لان السيراتو السيدان نازلة باوبشنز اعلي من الالنترا
وربنا يوفقك للاختيار

**A.Adel** · 04-01-2014 03:09 PM

ممكن أعرف لاقتها بكام في القرش ؟
هل لقتها خليجي ولا وكيل ؟

بصراحة أول فئة اللي بـ 140 دي سعرها كويس

**M.ABDEEN** · 04-01-2014 06:09 PM

اللي عند القرش وكيل هاي لاين موديل 13 مش 14 وقاللي الوكيل عاملها عرض ب 160 الف .
قابلت واحدة النهاردة في الشارع وسالتها وانا محرج كانت لسه معلقيتش نمر قالتللي دي خليجي وجايبها من اسبوعين من محمود جابر ب 170 الف وموديل 13 برده ....واضح كده ان 2014 لسه منزليتش ....سالت في غبور من كام يوم قاللي موديل 14 الهاي لاين ب 160 فكده شكل غبور بيالف واللي عنده دي 13 وهو بيقول 14 وسالته عن اللي ب 140 قاللي مش موجودة وممكن متنزلش تاني بس دي مش جنوط ولا فرش جلد زي الهاي لاين ....بس بصراحة اللي عند القرش حكاية تحس انك هتسوق طيارة مش عربية ....مش عارف والله الدنيا فيها ايه ورغم الغلاء الا ان الناس برده بتشتري .....كمان شوفت عند القرش الريو هاتشباك وسيدان بس فرق طبعا من السيراتو والالنترا والريو