مناقشة عن افضلية البيجو 301 عن منافسيها في السوق

**Batman372** · 08-01-2014 06:01 PM

تعليقى على موضوعك :

ال ٣٠١ بقالها فقط ٥/٦ شهور ...
من الظلم لها كسياره المبالغه فى كثره التعظيم من شأنها و كل الضجه المعموله دى ...
للحكم العقلانى عليها اجمالا ... يجب الانتظار ٣/٤ سنوات ... و فى حينه كل حاجه حتبان ... سواء بالسلب او الايجاب ...

المنافس لها مباشره هى الستروين ... لكن اسم البيجو فى مصر يخلى التحيز لل ٣٠١ ... و تطليع القطط الفطسانه للستروين !!!
مع ان الستروين نسخه طبق الاصل و من نفس المصنع و ارخص و متوافره فورى .... و معظم الى جابها حتى اليوم بيشكر فيها مثل ال ٣٠١ ...

ايضا لا يصح مقارنتها بالصنى ... لان الفئه السعريه و قطع الغيار و الصيانه و امتياز التوكيل و غير ده كله وجودها من ٢٠٠٧ ... يعطيعا الافضليه و الاعتماديه .. و اكيد كل الى بيشترو الصنى الجديده حتى اليوم شايفين و عارفين ال ٣٠١ و مع ذلك بيفضلوا الصنى و لهم كل الاحترام فى اختيارهم ... و على فكره الصنى القديمه بها abs فى ال ex من ٢٠٠٩ ... و علبه الدركسيون ب ٤ الاف فقط ...

بالتوفيق ... تحياتى

**mahmed0100** · 08-01-2014 06:48 PM

احمد امين باشا .. حنعمل حسابك البنك مليان فلوس ههههه و بعدين 3008 دي لو نزل ليها شاشه بس حتكمل احساسي باني راكب طياره مش قاعد قدام تابلو عربيه :)

اما الاستاذ عمر اللي محتار في اختيار العربيه
بص يا باشا انا سبقتك في الحيره دي
اولا انت راصد مبلغ من 110 الي 140 تشتري بيهم عربيه
فكر في احتياجاتك .. عايز ايه من العربيه

حكلمك عن البيجو .. انت واخد عربيه فعلا قبل كل حاجه ( حتحس بفرق كبير عن الدايو ) و كمان واخد صاج قوي و عوامل امان ممتازه و شكل راقي من الخارج و شيك من جوه و واسعه لاستعمال عائلي او شغل و عربيه ثابته لحد سرعه 160 من كلام ملاكها علي المنتدي و غير المنتدي
و اسمك راكب عربيه اوربي بمواصفات جوده محترمه و مكونات خامتها ممتازه و انت اكيد شفتها

قطع غيار استهلاكيه سعرها منافس و ممكن رخيص بالنسبه لغيرها اما لاقدر الله في الحوادث فاكيد اي حادثه في اي عربيه جديده مكلفه جدا و مع ذلك قطع غيار 307 و غيرها من عربيات بيجو متشابهه مع بعض قطع غيار 301 و ده سبب ساعد عمرو السقا معانا هنا في المنتدي في تخفيض تكلفه اصلاح حادثه حصلت ليه و ربنا يكفينا كلنا شر الطريق.
و لو تقدر تأمن حتريح بالك كتيير

توكيل بيجو مهما كانت سمعته بس اسال علي توكيل ستروين و تعامله مع العربيات اللي تعتبر رخيصه عنده زي ستروين اليزيه و جين 2 و غيرها ( توكيل مش كويس ) و مع محاوله اداره بيجو التحسين فاكيد حتاخد خدمه افضل .

اما الصني القديمه كانت افضل بكتير لكن الجديده دي شكلا و موضوع مش عجباني كرأي شخصي

اليارس. لطيفه بس حتدفع 139 الف في عربيه فاضيه ؟
و كمان 1300 .. اكيد بعد. 5 سنين حتتعب لو ناوي تحتفظ بيها

و ربنا يوفقك في اختيار افضل عربيه ليك

**ahmedz310** · 08-01-2014 07:43 PM

متاااااااابع

**mohamed hussei** · 08-01-2014 09:40 PM

هو في حد بيشتكي من عز عرب ستروين غير غلوا قطع الغيار علشان كل المشاكل الي بسمعها عن عز العرب في قسم بروتون حد يفيدنا

**islam.3bada** · 08-01-2014 09:53 PM

المشاركة الأصلية كتبت بواسطة mohamed hussei

هو في حد بيشتكي من عز عرب ستروين غير غلوا قطع الغيار علشان كل المشاكل الي بسمعها عن عز العرب في قسم بروتون حد يفيدنا

اللى اعرفه انه محدش اشتكى , حضرتك تقدر تتاكد من ده فى قسم ستروين
سوء ادارة قسم بروتون مأثر على سمعة التوكيل عموما و ده عامل خلط عن بعض الناس

ليا تجربة مع العز العرب فى سيارة احد اصدقائى الـ c4 بيتعامل مع التوكيل فى الصيانات الدورية العادية و شايف ان التعامل هادى كويس لا هو ممتاز ولا هو سئ اللى بيحتاجه بيلاقيه .

**amr_shaaban** · 08-01-2014 11:26 PM

المشاركة الأصلية كتبت بواسطة ebrahim mayalo

يا استاذ ده انت في بورسعيد اومال احنا اللي في دمياط انا واكرم وماشاء الله دمياط بقي فيها اكتر من 10 عربيات شوفتهم
يعني باختصار متشيلش هم احنا جنبك

ربنا يخليك يا باشا ..... بس للعلم ... بورسعيد كلها ما فيهاش غير عربيتين 301 فقط !!!! و اكيد بما ان احنا جيران اكيد عارف ان بورسعيد ميالة للياباني و الكوري و بعدهم الالماني .... و اغلب العربيات ياباني و كوري

فحد بيشتغل في فرنساوي صعب ... انا اعرف واحد داخ عشان يلاقي حد يغيرلة سير كاتية لوجان و بخد وقت كبير جدا

**Hema_Basha** · 08-01-2014 11:40 PM

المشاركة الأصلية كتبت بواسطة amr_shaaban

ربنا يخليك يا باشا ..... بس للعلم ... بورسعيد كلها ما فيهاش غير عربيتين 301 فقط !!!! و اكيد بما ان احنا جيران اكيد عارف ان بورسعيد ميالة للياباني و الكوري و بعدهم الالماني .... و اغلب العربيات ياباني و كوري

فحد بيشتغل في فرنساوي صعب ... انا اعرف واحد داخ عشان يلاقي حد يغيرلة سير كاتية لوجان و بخد وقت كبير جدا

انا عارف ان دي مشكلة بس انت هتجيب عربية جديدة فمش هتحتاج تعمل حاجة اكتر من تغيير الزيت وصيانة العربية اكيد في التوكيل ومش عتفكر في اي حاجة تانية غير بعد ان شاء الله 5 سنين يعني متشيلش هم وبعدين باذن الله العربية دي هتنتشر جامد ياعم ده انا شوفت منها في الاسماعيلية كتير وفي السويس كل ما امشي في شارع الاقي واحدة وده هيساعد اكيد الناس تشتغل فيها

**Akram.Gamal** · 09-01-2014 01:05 AM

انا عايز ارد و افيدك بحاجه بصراحه بس مش عارف ارد اقول ايه
كل ال اقدر اقولهولك بعد المشاركات المحترمه من الساده الزملاء
اعمل صلاة استخاره و ربنا هيهديك للاحسن
وانزل انزل انزل اتفرج على ال 301 وانا متأكد انك هتعشقهاااااااا و مش هتطيق تركب غيرها

اقسم بالله انا سوقت عربيه نيو صنى لمدة 60 ثانيه نزلت منها بجرى (اجري يا مجـــــــــدى) دخلت عربيتى و اقعدت احمد ربنا