الموضوع: سواااق جديييييييييييييد

اعزائي نايل موتورزوية
كل سنة انتوا طيبين... ورمضان كريم
علي نفس نمط محمد سعد ... جزار نضيف
فيه موضوع محشور في زوري من شهر عايز اكتبهولكم وحطيتله عنوان سواق جديييييييييييد

الموضوع مش جديد ... بس اعتبروه تنفيس عن بركان ممكن ينفجر في اي لحظة و انا مش مسئول

باختصار شديد ... ربنا كرمني "او يمكن ابتلاني مش عارف" بعربية جديدة والحمد لله من تقريبا شهر... ودي أول عربية ليا.

لما استلمت العربية كنت طاير من الفرح ... اترحمت من القرف وذل سواقين الميكروباصات .... بتوع معصرة منتصر اللي مش بيكملوا لأخر خط حلوان"و أي حد من حلوان اكيد فاهم انا اقصد ايه" ... ودول زيهم برضو زي اللي بيقطعوا شارع فيصل 3 حتت وياخدو اجرة 3 مرات

و بعد شهر من السواقة في مصر
باقول .... كفاية كده سواقة ... وبتوع معصرة منتصر والله ولاد حلال
ليه بقي ؟؟؟
1- انا اول ما رخصت حطيت نمر مؤقتة ... عاااادي؟؟؟ ... مش عارف الظاهر ان النمر فيها مغناطيس لرجال المرور البواسل ... من أول العساكر للواءات ... كله عايز يتفرج علي الرخصة... اظاهر انه بيبقي فيها حاجه جديدة او نكت علي ضهرها ... يا اخونا انا مافيش لجنة غير ووقفتني علشان تشوف الرخص... و ماحدش يقولي شكلك فيه حاجه غلط ... والله انا عضو هيئة تدريس .. وبالب معقول كمان ... و مش شبهة خالص"يعني شوفولي عروسة". بس الظاهر ان السبوبة الجديدة بتاعة الحكومة بتاعة النمر المؤقتة دي شغالة الله ينور ... يديلك نمر شهر ويقرفك علشان تكره تروح المرور فتقوم تتأخر في تجديد الشهر يقوموا ساحبين الرخص و مغرمينك يا حلو، والله يا اخونا انا اتعودت لحد ما النهارده وقفت اوتوماتيك في اللجنة من غير ما حد يقولي و فتحت الازاز وطلعت الرخص للأمين و بمنتهي البراءة سألت"هو حضرتك مش عايز تشوفها ؟؟؟"

2- بصراحة كده انا عمري في حياتي ما تخيلت اني اعمل ماساج كل يوم بالشكل الهايل ده ... مطبات بلدنا وحفر ونقر الشوارع بمنتهي الامانة هايلة لكل اللي بيعانوا من آلام الظهر ... يعني ماساج طبيعي، ومش كده بس .. كل يوم تلاقي ابنكار جديد ، ودرجة أعلي من الماساج "زيادة حجم وعمق وعدد النقر في الشوارع و الامعان في الاعتام التام ليها"

3- الجميل كمان ان مصر بلدنا بلد الرومانسية ديما الشوارع أنورها مطفية علشان تحس بجو شاعري وانت ماشي وكمان علشان البلد عارفة ان فيه مشتتات في الطريق ممكن تشد انتباهاك وتضايقك و انت سايق مثلا انك تشوف الرصيف وما تحكش فيه، او انك تعرف الشوارع الجانبية اللي انت عايز تروحها فين

4- الركنات دي بقي لعبتي، بافضل تحت الشغل من 10 دقايق "وليس أقل" الي نص ساعة لحد ما اركن وعادة باركن صف تالت و ممور العربية وأول ما الظهر يدن اجري علشان اصلي و ادعي اني انزل ألاقي العربية في مكانها

5- الناس علي الطريق فعلا فعلا غريبة
خبراتي الضئيلة علمتني في التعامل معاهم كذا حاجه
أوعي تدي للي وراك اشارة انت رايح يمين از شمال، لأنهم عادة اول ما بتدي الاشارة بعد ما كانوا هاديين وماشيين علي سرعتهم . فوووووووووو تلاقيه كبس عليك ونور النور العالي وشتم كمان علشان ما يديلكش فرصة تأخد اليوتيرن بتاعك او تطلع من مصيبة قدامك..خش يمين او شمال علي طول "الله يمسيك بالخير يا بشمهندس سبعاوي فعلا اختراع الدراع احسن 10000 مرة من الاشارات"

6- لما علموني السواقة يعني قالولي ان الشمال ده للي ماشي علي سرعة عالية... وعلي أرض الواقع .. إكتشفت ان الشمال للنقل التقيل و السرعات البطيئة "يعني تلاقي جدو مكلبش في الشمال كأنه أنبوبة الاكسجين اللي عايش بيها " واليمين بقي كله حفر و مطبات وعربيات بتقف كل 10 متر

7- اليو تيرن .... يا لهووووووووووووووووي اسخف اختراعات خلق الله
الناس في اليو تيرن مش فاهمة هي بتعمل ايه انا تقريبا 10 مرات لحد النهاردة كنت هاعمل حدثة بسبب نفس اليو تيرن اللي علي كورنيش المعادي بعد نادي المعادي ده ببتاع 150 متر... أخرهم اول امبارح وانا ماشي علي 80 الساعة 2 بالليل "ولأني عارف ان اليوتيرن ده غبي أخدت يميني شوية علشان اللي بيلف يلف علي راحته"وتاكسي جميل 125 موديل 1932 بيعدي علي اقل اقل من مهله وبياخد الكورنيش وراح مصدر العربية بعرض الطريق عايز ياخد اقصي اليمين والمشكلة انه الظاهر والله اعلم انه حس انه مالمش العربية كويس وانه هايخش في الرصيف فراح مفرمل ومصدر العربية وانا جاي وراه وكدت أن أفعلها ... إلا ستر ربنا نجاني ...

8- كمان الناس اللي بتعدي الطريق ... فعلا عسل ... شعب قلبه ميت يا اخونا ... عادي دي عربيات ... مش بتموت ... مسافر انا علي الزراعي الاسبوع اللي فات... وعند مصانع العربي... الله يكرمهم عاملين مائدة رحمن...و اتنين بيعدوا الطريق قبل الفطار بدقيقتين وانا ماشي علي 110 و ماشين يضحكوا ... واحد ظريف قوووي منهم الضحك اثاره لدرجت انه وقف يضحك ويخبط علي رجله في وسط الزراعي وانا عمال اقلب نور ومعلق ايدي علي الكلاكس المهم واحد منهم جري والتاني كنت هاحبطه يعني هاخبطه... لولا ستر ربنا فديته في أخر لحظة في المسافة اللي بينه وبين الرصيف

9- اخيرا وليس أخرا... لما تبقي عربيتك جديدة ماكملتش اسبوعين
وواقف في اشارة ... ويجي ميكروباص عايز يعديك من حتة ما تعديش توك توك، ويروح خابطلك الباب والرفرف والاكصدام الوراني "وانت واقف في اشارة"
هايبقي ايه شعورك

ده بقي غير الموتوسيكلات اللي تطلع من طريق فرعي علشان تعمل خمسة في قلب الطريق قدامك .. وغير الاوتوبيسات الي بترمي عليك بسبب و من غير...

من الاخر
- السواقة ... قلة ادب.... قلة ذوق .... قلة أخلاق
- السواقة في مصر ستر بس ....
- لما كل سواقين مصر كده مهارتهم عاليا في القيادة والغرز ليه ما بنشوفش بطل مصري في الفورميلا ولا الراليات العالمية ....

تحياتي
و أأسف للأطالة
و رمضان كريم عليكم جميعا