الكلام لصاحب الموضوع:
أول حاجة: أذكار الخروج من المنزل،
خد بقى عنك يا سيدى:
1- لا تهتم بالشكل الخارجى لسيارتك (على رأى أحد الأعضاء: هتتخبط هتتخبط)
2- افترض فى السائقين الآخرين منتهى الجهل بقواعد القيادة، وانعدام القدرة على التفكير السليم
3- سوق صح: إدى إشارات قبل ما تحود، وانتظار عند المطبات والمواقف الطارئة
4- ماتجريش نهائى(السيارة الخاصة وسيلة مواصلات مريحة وليست وسيلة مواصلات سريعة) ولا تغرنك السرعات اللى الناس بتتكلم عليها، مصر زحمة جدا حتى طرقها السريعة (وانت بنفسك جربت الطريق الزراعى بتاع مائدة الرحمن، وطبعا الكورنيش)
5- ماتمشيش ورا أو جنب (الميكروباصات والأوتوبيسات أيا كان حجمها، النقل بأنواعه)
6- المشاة ماعندهمش فكرة عن إمكانيات العربيات، تعامل معهم بمنتهى الحرص.
7- ولع نورك بالليل عشان تشوف كويس، حتى لو اللى جاى قصادك عمل قرد عشان تطفى النور
8- عند أى يوتيرن هدى جدا جدا (حتى لو فى شارع جانبى) سواء كنت بتعدى من اليوتيرن أو مكمل فى طريقك (راجع رقم 2: معظم المشاكل بتحصل عند اليوتيرنات ومشكلة مين اللى يعدى الأول ومين اللى مفروض يهدى)
9- الركن مشكلة لا حل لها، إحمد ربنا إن أصلا عربيتك صغيرة
10- ماتستفزش حد، وماتسمحش لحد يستفزك لا بكلاكس ولا بنور ولا بحركة غباء عملها فيك (المسامح كريم)، وعلى فكرة الناس اللى بتكاسر وتكبس وتجرى ما بيوصلوش بسرعة ولا حاجة، هما بس بيكونوا أقنعوا نفسهم إنهم أحسن من غيرهم (بتوع الملاكى اللى مبيعرفوش يسوقوا دول).
11- من خرج من داره اتقل مقداره، حكمة سبعاوى الشهيرة والصحيحة، مش معنى إن معاك عربية يبقى تخرج بيها فى أى وقت وتروح بيها أى مكان.
12- مش فاكر حاجة تانى بصراحة، هو حضرتك عضو هيئة تدريس فييين؟