الموضوع: محتاج مساعدة فى تعديل beetle 1977

اسطوانة مقاس 21 سم؟ و الضبط يعنى اروح لميكانيكى يظبطلى كل دا و بلنسباه للبوجيهات احسن نوع اجيبة اية؟ و شكرا جدا للافادة

صعب تجيب بيها السرعه ده لو عربيتك بحاله جيده .. عشان تجيب السرعه ده بي بيتلز لازم تطكون حاله شاذه بجد و ماتور و فتيس و عفشه و كوتش و شاسيه زي المسطره .. و طبعآ عشان تعمل ده كلها هتتكلف كتير .. و لازم يكون اللي شاغل فيها حد علي مستوي .. نصيحة اخ تخلي بالك و انت بتجرلاي بيها لانها في النهايه عربيه قديمه

انا قولت كدا بردو وربنا يكرمك على النصيحة و المعلومات بس انت عارف دماغ الشباب بقى و بذات انى كنت بشوف ناس كتير كتبة انها وصلت للسرعة دى بشوية تعديلات ف قولت اجرب :)

بص ياحاج احمد انا هسالك شوية اسئلة تجاوب عليها وهديك بعض النصائح لزيادة عزم المحرك بس برضة ماتجبش سرعة عالية قوى غير وانت مطمن من كل حاجة او بتثق فى العربية ثقة بلا حدود زى حلاتى
الاسئلة
1- حالة المحرك العامة (لسة متعمر قريب - بقاله سنين - اتعملة طقم شنبر قريب)
2- الكربراتير راكب عبله عمة نوعها ايه ( فلتر زيت - فلتر شبك)
3- الكربراتير بيعرق بنزين ؟
4- سلوك البوجيهات لسة طرية مش ناشفة ومشققة ؟
5 - الاسبراتير بتعملة صيانة كل اد ايه ؟
النصائح
1- اى كان نوع العمة اللى راكبة عندك غيرها وركب فلتر اسبور (سيموتا - او كيه اند ان)
بتفرق كتير فى السحب ومابتخليش العربية مكتومة
غير الاسبراتير والبوبينة وهات اسبراتير اشعال الكترونى (مشط) ---- ممكن تجيب اسبراتير كامل بـ 375 جنيه او تجيب المشط بس بـ 175 جنيه ---- وهتحتاج معاه بوبينة اشعال الكترونى
وظيفتها هتخلى الشرارة منتظمة وهطول عمر البوجيهات وعتفك دماغك من كل شوية بلاتين وكوندنسر

حاجة كمان الفديوهات اللى انت بتشوفها بره وعلى اليوتيوب ده مش الماتور الاصلى بتاعها ده بيبقى ماتور معدل 2200 سى سى قدره 190 حصان
انت ماتورك 1600 سى سى قدره 50 حصان بس

ومعاك فى اى استفسار

بص يا باشا العربية دى شاريها بقالى شهر العربية حلتها ممتازة المتور مبيعطلش منى الحمدلله
بلنسبة للأسألة
١- المتور حالتة جيدة جداً و مهتم بالزيت كل الف كيلو و مفيش اى اعطال و شغال و معرفش معلومات عنة لانى لسة شاريها من دكتور صيدلى كبير ف السن
٢- العمة اللى راكبة فلتر هوا اعتقد مش زيت
٣- الكربراتير مش بعرق بنزين خالص
٤- مبصتش لسلوك البوجيهات لانى معنديش خبرة و دى اول عرببة ليا
٥-لسة معملتش صيانة لأى حاجة
و اسف لعدم وضوح اجباتى و دا لانى لسة مبتدى و معنديش اى خبرة فا لجأت ليكوا عشان انتوا اهل الخبرة :)
و سؤال هل يكون فى خلل فى الموتور و ممكن يتعدل عند ميكانيكى او زى مابتقول اجيب فلتر سبور و ثمنة كام و اجيبة منين بضبط و الاسبراتير اشعال الكترونى بردوا اجيبة منين و هل دا يغنى عن القطع الاصلية اللى فيها اللى لو ظبطها تدينى اللى انا عايزة؟ اسف جداً للأطالة

طيب انت من سكان شرق القاهرة ولا غربها
لو انت من سكان شرق القاهرة فيه ميكانيكى اسمة الاسطى مديح فى اول شارع سنان من ناحية جسر السويس والراجل ده برده عنده مخزن قطع غيار استعمال الخارج
قطع الغيار الجديدة فى شارع صلاح الدين فى مصر الجديدة اسمة سامى وصلاح شاكر
والراجل ده هتلاقى عنده كل قطع الغيار الاصلية والمعدلة الاصلية برده
بالنسبة للفلتر انا جبته شهر مايو اللى فات من شارع دمشق مش فاكر اسم المحل جبت السيموتا التيوانى بـ 150 جنيه
الصراحة بعد ماركبتة (لان كان عندى عمة زيت قديمة ) حسيت بفرق جامد فى السحب والتجميع بعد الـ 100 كم
قبل ماركبة بعد الـ 100 كم ممكن تجمع لحد 130كم بس نام جنبها
بعد التركيب صوت المحرك بقى افضل وفيه صوت رياضى والتجميع عموما افضل بكتير من 0 كم إلى 120 كم فى 25 ثانية وده رقم مذهل بالنسبة للفولكس مع انى مركب الكربراتير التعبان بتعها + الاستبراتير الاصلى مش الاشعال الالكترونى
ناوى اركب الحاجات دى بس مستنى اغير الكاوتش علشان مافتريش زيادة
السرعة القصوى اللى وصلتلها كانت 135 كم
والمحرك بتاعى 1300 سى سى متعمر من 10/2009 عامل حوالى 28 الف كيلو من ساعة العمرة
لو انت من سكان غرب القاهرة عليك وعلى الميكانيكية اللى فى اول فيصل
اتمنى اكون قدمتلك افادة

انا ساكن ف الدقى-الجيزة و عايز اقولك انك افاتنى جدا والله و متشكر جدا ليك و انا قررت انى هاروح الميكانيكى اظبط التكهات و الذى منة و هاجيب فلتر سبور و الحمدللة على كدا بس عايز اعرف الفلتر دا لكل العربيات مش نوع معين و انا ممكن اركبة ولا لازم ميكانيكى؟