السلام عليكم ورحمة الله وبركاته ..

في البداية طبعا اشكر الجميع ,اعضاء ومشرفين , على المجهود الرائع المبذول في المنتدى ..
بجد يعني ماشاء الله عليكم ..
طبعا واضح اني عضوة جديدة ودي اول مشاركة ليا ..
انا بصراحة مبفهمش في العربيات ومعنديش اي فكرة عن اي حاجة .. يعني بسيط اوي على ادي كده ..
انا حتى لسه بمتحن للرخصة في الكويت ومش عارفة اخدها وسقط مرتين .. اصل الموضوع هنا صعب اوي .. هبقى احكيلكم بعدين ان شاء الله

المهم انا شغلي هنا مندوبة ادوية واكيد محتاجة العربية جدا جدا في شغلي .. ومحتارة مش عارفة اجيب ايه ..
هل اجيب جديد ولا مستعمل ؟ ولو جديد يبقى ايه العربيات المرشحة .. ولو مستعمل يبقى ايه ..
مبدئيا خلينا في جديد ولا مستعمل ..
اوقات بقول لنفسي مستعمل ,و طبعا عندكم فكرة ان اسعار المستعمل هنا مغرية جدااا .. خصوصا اني عايزاها من 3- 5 سنين مش اكتر وبعدين هبيعها ..
يعني مثلا الكورولا ال used موديل من 2002 ل 2006 سعرها النص بالنسبة للجديد مع فروق بسيطة بين موديل واللي احدث منه تتراوح بالمصري من 2000 ل 10000 جنيه بين الموديل والتاني تقريبا ..
بس المشكلة بقى اني اول مرة هسوق ومعنديش استعداد العربية يكون فيها مشكلة كده ولا كده وتقف بيا في الشارع وانزل افتح الكابوت واقف قدامه مستنية حد ينقذني

ولا وانا بسوق بقى اسمع صوت غريب جاي من هنا ولا من هنا .. هو انا هركز في ايه ولا ايه !! مش كفاية السواقة اصلا ..

وعشان كده ارجع اقول خلينا في الجديد واشتري راحتي .. وتبقى عربيتي على اسمي وتربيتي واكيد ليها احساس تاني برضه.. :p
بس طبعا هتفرق معايا في السعر اوي .. وكمان لما اجي ابيعها بعد ال 5 سنين هخسر فيها جامد ..

معلش انا طولت عليكم .. بس انا فعلا محتاجة مساعدتكم ..
وميرسي مقدما ..