تجربة سيئة مع كارفور المعادي

**miceg** · 13-01-2014 03:08 AM

السلام عليكم ورحمه الله
حبيت انقل تجربة فاشلة من تعاملي مع كارفور المعادي
تم التوجه يوم 5/1/2014 لشراء أجهزة منزلية وهي
ثلاجة -بوتاجاز -غسالة -سخان - تلفزيون
وتم الدفع وكان فرد المبيعات بيقولي التسليم أقصى معاد هو 7 أيام
طبعا الكلام الجميل اللي بيتقالك وقت مانت بتشتري ويافندم ده 7 ايام بالكثير وهتستلم قبل كده
وانت فمدينة نصر جمبنا
المهم كلمتهم امبارح قسم الشكاوي
كل اللي بيتقالك فالتليفون مهدئات طيب يافندم اديني رقم الشكوى عشان حد يتابع شكوتي
للأسف يافندم مافيش رقم شكوى
طيب انتو لزمتكو إيه وإيه لزمة قسم الشكاوي طالما هو مش بيهندل المشكلة مع العميل
اصل يافندم عيد ميلاد كارفور وبتاع والناس مضغوطين
طيب يافندم كل سنة وهو طيب
المهم كلمني حد الساعة 9 صباحا يافندم السواق هيكلمك تستلم النهاردة
قعدت النهاردة اليوم كله مستني ورابط نفسي جمب عنواني ومرضتش اطلع شغل اوت دور قولت ربما حد يكلمني في أي وقت
كلمت الشكاوي تاني :- يافندم طالما حد كلمك النهارده يبقا هتستلم النهاردة
المهم الاقي تليفون جالي الساعة 11 مساء ألو احنا كارفور ومعانا الحاجة بتاعتك
نزلت من مكرم عبيد الى الزهراء للإستلام
واستنى ألاقيهم جايين الساعه 12.30
قولت اعصر على نفسي ليمونة عشان ورايا شغل بكرة ومش عاوز حد يربطني
أفاجىء ان السواق ومعاه واحد بس صغير فالسن هما اللي جايين
طيب ياجماعه فين الشيالين اللي معاكو
الواد الصغير قاللي متقلقش انا هطلع الحاجة
والسواق زي الفيل ان ماهز نفسه ولا كإنه ليه علاقة غير انه سواق
الواد شال الثلاجة وبما ان السلم ضيق صعب عليا مش عارف يطلع ومش شايف قدامه
شلت معاه الثلاجة لغايت الدور الرابع ومافيش اسانسير
البوتاجاز كرتونته مدمرة ومتفأجئتش بيه غير لما دخل الشقة
طبعا لولا انهم طلعوه فوق انا مكنتش استلمته بالمنظر ده
طيب وبعدين فين التلفزيون لا التلفزيون مجاش ممكن بكره حد يجي يسلمهولك
ماشاء الله
عطلة أسبوع
تأخير فالمعاد والتسليم في نص الليل
البوتاجار كرتونته متقطعه
التلفزيون غير موجود فالشحنة
جايبين واد صغير مالهوش خبره في الشيل وطبعا ببص عالثلاجة لقيت فيه عضة ناحية الدراع
طبعا عشان عيد ميلاد كارفور معندهمش شيالين
وعشان النهادرة عيد ميلاد سيد الخلق تحليت بجزء من خلقه والتزمت ألادب والصبر وساعدت الولد وشيلت معاه
اي حد عاوز نصيحتي
اشتري من اي مكان غير كارفور
كارفور اغلى من بره فكل صنف 100 جنيه على ألاقل
فيما عدا التلفزيون ال جي معمول عليه عروض هناك
عندك أماكن كثيرة والتسليم فوري في نفس اليوم والحاجة كفائتها عالية
واصطف عمال وشيالين موجودين ويخدموك بعنيهم
كارفور إسم على الفاضي
انا لسه راجع من شوية ومقهور من البهدلة اللي إتبهدلتها بس قدر الله وماشاء فعل .
اسف على إلاطالة

**starlanos** · 13-01-2014 04:23 AM

الف مبرووك
وشكرا لنقل التجربة

**أبو آسر** · 13-01-2014 04:39 AM

كارفور فعلا في الأجهزة الكهربائية متشتريش منه غير التليفزيونات اللي عليها عروض غير كده أسعاره أغلى من برة
وأول مرة بصراحة أسمع إني أشتري الحاجة وأدفع فلوسها واستلمها بعد أسبوع !!
أنا أدفع واستلم الحاجة وأنا واقف وتجيلي لحد البيت وأحاسب على التوصيل مفيش مشكلة بس اعمل حسابك لما تشتري حاجة تجهز الشيالين من عندك أي بواب عمارة عندك أو في عمارة جنبك ظبط معاه وهو هيجيب واحد ولا اتنين معاه وهيطلعوا الحاجة بدل التهريج ده

**saddam** · 13-01-2014 05:44 AM

صديقي المواطن
ربنا يعوضك ويصبرك وتجربة وعشتها وتعلمت منها ومحدش ياخد خبرة ببلاش وأنا من واقع خبراتي في كارفور وسبينس وشارع عبد العزيز وكام محل كده في القاهرة وإسكندرية فقولا واحدا أحسنهم
سبينس ثم شارع عبد العزيز ثم كارفور
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**OMAR11112010** · 13-01-2014 11:33 AM

انا دلوقتي معايا فلوس كاش يبقي اشتري واشيل علطول قدامك شارع عبد العزيز اسال كذا محل وفاصل كويس وابقي خليك عارف سعرها بره وهتلاقي ناس خبرة في شيل الاجهزة انا جبت تلاجة من هناك طلع بيها علي ضهره الدور ال 12 من غير ما يريح ولا يحصل فيها حاجة لكن اي حد في الشارع هتقوله تعرف تشيل هيقولك اشيل واعمل مصلحة

**Mohamed_Hamid** · 13-01-2014 01:10 PM

أنا من رأيى برضه انك تبعت شكوى للفطيم وادارة كافور الفرنسية باللى حصل يمكن يظبطوهم شوية

**DODGE2013** · 13-01-2014 03:37 PM

احد يشتري اجهزة من كارفور ولا هايبر ماركت ؟؟ ده اخره تشتري كيلو جبنه وزتون هههههههههههههههه

الاجهزة الكهربائية الواحد يشتريها من اماكن متخصصه فيها او الوكيل ليها على طول